الرئيسية » » وان طال السفر / محمد عبد الماجد

وان طال السفر / محمد عبد الماجد

Written By abobakr saif on الأربعاء، 20 يونيو، 2012 | 10:45 ص

ليما (محترف الفصل المسائي)..والطاهر سادومبا (قريب غطا) 

< المحترف البرازيلي (ليما) الذي تعاقد معه المريخ في فترة التسجيلات الاخيرة ...ليس هناك مبررا واحدا لتعاقد المريخ معه ، غير عملا بالمثل الذي يقول : (الفى والدك بقالدك).
 
< اقصد الفي مدربك بقالدك.
 
< ريكاردو الظاهرعليه جاب (ليما) دا عشان يصلح ليه (الفول).
 
< دا محترف تصليح فول ساكت.
 
< اغلب الظن ان (ليما) هو النسخة (الضفرية) للاعب المريخ محمد عبدالله ضفر في البرازيل.
 
< يعني ليما دا (ضفر) البرازيل.
 
< الزول دا لو فتشوه ما بعيد يكون كان بيلعب في النيل الحصاحيصا ...بتاع البرازيل.
 
< يا زول اقيف.
 
< كمان البرازيل فيها (نيل حصاحيصا).
 
< لو قبلنا ان البرازيل فيها (حصاحيصا)...كيف نصدق ان البرازيل فيها (نيل).
 
< لكن ما علينا.
 
< الزمن دا أي حاجة جائزة.
 
< تصوروا مرة في واحد قال كان ماشي في (برازيليا) لقى ليه (لوري تراب).
 
< زولكم استغرب...اتهجم عديل بقى زي الزول الاول مرة يشرب ليه بيبسي..قال : معقول ..البرازيل فيها (لوري تراب)، والله انا كنت مفتكر لواري التراب دي قصرا على (ام بدات والثورات).
 
< زولكم مشى شوية ...لقى ليك لوري التراب مكتوب فى خلفيته (يا ريتني لو اقدر اقول فيك الكلام الما نكتب).
 
< يعني عاوز تقول شنو في (لوري تراب).
 
< انا ما عارف ليه الناس بتخلى أي حاجة وتقعد تتغزل في (لواري التراب).
 
< عواطفنا كلها بنكبها في لواري التراب.
 
< يمكن عشان نحن ناس عواطفنا (ترابية).
 
< وفلافستنا سواقين لواري التراب.
 
< في لوري تراب قطع كبري الفتيحاب...شفت خلفيتو ..لقيت الخلفية مكتوب فيها (من شوفتو طولنا).
 
< ليك حق تتطول.
 
< لكن لواري التراب دي هسع ما موضوعنا.
 
< لواري التراب دي عاوزة ليها بحث براها.
 
< الراحل عزالدين الصبابي في حوار في قناة النيل الازرق مع الاستاذة عفاف حسن امين ..قال انه كان يحب قراءة ما يكتب في خلفيات العربيات.
 
< وكان الصبابي مولع بمتابعة ما يكتب في لواري التراب.
 
< قال عزالدين الصبابي انه اعجب بمقطع كتب في لوري تراب كان على هذا النحو (بس تشيل فيني وتودي).
 
< اما انا فقد عجبت من صاحب لوري تراب كاتب في اللوري حقو (وسط الزهور متصور).
 
< يا ود الناس وينها الصور.
 
< دي زي الحفلة.
 
< مرة مشيت لي حفلة شاي ...قعدنا فيها من خمسة لي منتصف الليل ..ما شفنا
 
فيها كباية شاي واحدة.
 
< مع ذلك الحفلة كان اسمها حفلة شاي.
 
< مرة تانية.
 
< تانية خالص.
 
< مشينا لينا حفلة.
 
< في الصباح قالوا لينا الحفلة بي محمد الامين.
 
< في الضهر اتراجعو...قالوا لينا الحفلة بي نور الجيلاني.
 
< العصر لقو الوقت ضايقهم ...قالوا لينا الحفلة بي اسامة الشيخ.
 
< وفى واحد وقت الواطة مغربت قال ليهم اعملوا لينا الحفلة سريع ...قبل ما
 
تجيبوا لينا نصرالدين الخليفة.
 
< كمان نصرالدين الخليفة دا منو؟.
 
< نرجع لي (ليما).
 
< ليما دا قالوا بقيف للكورنر ...زي الزول الواقف للصورة...يضحك السنة كلها.
 
< زولكم دا مشى استاد المريخ ...(اتخلع).
 
< اتخلع من الاستاد.
 
< انت يا اخوي البرازيل دي كنت فيها (كورس).
 
< معقول برازيلي يتخلع من استاد المريخ 
 
< والله إلا تضربو كهرباء.
 
< لكن (خلعة) عديل كدا ...ما اظن.
 
< منذ ان جاء محترف المريخ البرازيلي (ليما)...ثبت تواضعه ...وتأكد فشله.
 
< محترف جابو للمريخ (مسكول).
 
< جمال الوالي مسكل ساكت.
 
< زولكم شال شنطتو وجاء على الخرطوم.
 
< محترف شفقان.
 
< زي الزول البمسكلو لي صاحبو ...يقوم يرجع هو للرقم.
 
< او يقعد يخلي أي شيء.
 
< يفك أي شيء.
 
< ويقول ليك (المسكل) ليك دا منو؟.
 
< تجيك رسالة.
 
< جري على تلفونك.
 
< لو انت سبقتو على تلفونك ..بقول ليك الرسالة دي من منو؟.
 
< يا ود الناس مالك انت؟.
 
< زول (خبار).
 
< محترف المريخ ليما وصل لمطار الخرطوم ...قبل ما يرسلوا ليه (التذاكر)...في استعجال اكتر من كدا.
 
< قالوا صديق على صالح اتهجم وقت لقى (ليما) وصل الخرطوم ...مما جعل احد اعضاء دائرة الكرة في المريخ يعلق على وصول اللاعب قائلا: ان بلة جابر عندما تعاقد معه المريخ لم يصل من بورتسودان بهذه السرعة التى وصل بها (ليما) من البرازيل.
 
< بلة جابر كان فيه شوية (تقلة).
 
< محترف المريخ ليما جاء للمريخ زي (السوط).
 
< مع ذلك ريكاردو طالبه بان ينقص وزنه 3 كيلو.
 
< يا ريكاردو الزول دا لو نقص 3 كيلو ..ما بفضل فيه شيء.
 
< ببقى على (الكاب).
 
< هو فيه شنو؟..عشان ينقص 3 كيلو.
 
< بعدين يا ريكاردو انتوا (ليما) دا جايبو (اعارة) 6 شهور.
 
< يعني ما في داعى ينقص 3 كيلو.
 
< الاعارة والله ربع كيلو كتيرة عليها.
 
< عاوز تنقصو 3 كيلو مرة واحدة.
 
< المهم الزول دا ما جاء قاعد يتفرج.
 
< يا اخوي (الفرجة) دي ما عاوزة ليها (شنكار)..وما عاوزة ليها (كدارة).
 
< ناس موسى الزومة ديل اتفرج عليهم ساكت.
 
< وليك علي تجيك (قرحة) في النظر.
 
< قرحة في (الشوف).
 
< ليما دا من الان بالمطافشة البعمل فيها دي ممكن نقول عنه انه محترف (الفصل المسائي).
 
< النوع دا شكلو كدا زي الزول اللعب الكورة على كبر.
 
< كورتو دي كورة (مدير كورة)...ما كورة لاعب.
 
< اقول ليكم حاجة.
 
< ادمجوا القطاع الرياضي من مدير الاستاد ...وعينو ليما (مدير عام).
 
< غير دي ما بنقع ليكم في حاجة.
 
< احسن ليكم بدل ما تضيعوا قرشوكم في الفاضي.
 
< قروش شنو؟.
 
< هو ليما كمان بقروش.
 
< قالوا (ليما) دا جابوه بـ (7) اسكراتشات.
 
< الطريف في الامر ان الاستاذ مامون ابوشيبة طالب ان يتعلم مدافعي المريخ بعض الكلمات الاجنبية التى يمكن ان يتفاهموا بها مع (ليما).
 
< يعني ناس ضفر ونجم الدين وبلة جابر وموسى الزومة يتعملوا ليهم كلمات برتغالية ..او كلمات انجليزية.
 
< عشان الخاطب بينهم وبين ليما يكون ساهل.
 
< يا ابوشيبة انت بدل ما تعلم الجماعة ديل كلهم كلمات اجنبية ...علم (ليما) كلمات عربية.
 
< اسهل يتعلم ليما من ان يتعلم ضفر ونجم الدين وبلة جابر وموسى الزومة.
 
< يعنى 3 شهور تانى ...وتلقوا ليما بقرع في موية الاستاد...لابس ليه
 
عراقي وسروال ...وبنط جوز زي بلة جابر ..وبقول للمهاجم الخصم ..يا زول ها.
 
< لكن برضو الحاجات دي ما في ليها داعى.
 
< عشان ليما ...ما محتاج يتعلم لهذا الاشياء وهو قاعد كنبة.
 
< محترف (الفصل المسائي).
 
< ملحوظة : الغريبة اعلام المريخ المرة دي ما كسر تلج لي ليما.
 
هوامش
 
< الاستاذ حسين خوجلي اطلق على الطاهر سادومبا ...(قريب غطا)...باعتبار
 
ان المريخ فشل في تسجيل ادوارد سادومبا قاموا سجلوا الطاهر سادومبا.
 
< لكن برضو الطاهر سادومبا ..ما كعب معاكم.
 
< على قول الاستاذ حسين خوجلي الطاهر سادومبا ...(قريب غطا).
 
< غايتو المريخ لو سجل اليوغندي (كاسولي)...إلا كان تفتحوا ليه (كافتريا) في الاستاد.
 
< كورة شنو البلعبها ليكم (كاسولي).
 
< الدورة التانية متى سوف تبدأ.
 
< الظاهر الاتحاد العام منتظر بيها تسجيلات المريخ القادمة.
 
< تسجيلات المريخ دي ما بتصمد كتير.
 
< ساني قالوا اتألق في التمارين.
 
< غايتو التألق في التمرين دي ...زي العريس البقولوا ليك عندو صاحبو (مغترب).
 
< نحن التألق في التمارين نعمل بيه شنو؟.
 
< عصام الحضري بعد كدا مصر ما بتنقعد ليه؟.
 
< عارفين ليه؟.
 
< عشان الحضري كان داعم الفريق احمد شفيق.
 
< دائما الحضري يراهن على الفرس الخاسر.
 
< الهلال سوف يخوض مباراته في دور الترضية بـ (15) لاعبا.
 
< موقف الهلال اكثر من صعب.
 
< واحداث مالي سوف تشكل ضغط ارهابي اخر على الهلال في مالي.
 
< هذه الاشياء سوف تنعكس سلبا على الهلال.
 
< لذلك ترتيبات الهلال لدور الترضية يجب ان تكون على قدر المهمة.
 
< وإلا فان الهلال خروجه من البطولة الافريقية لا قدر الله سوف يكون اكيد.
 
< نتمنى ان يلحق ايكانغا بمباراتي الاسماعيلي.
 
< لا سيما وان مدرب الهلال الفرنسي يريد ان يجرب كل نجوم التسجيلات.
 
< عاوزين نشوف الجميع ...وعاوزين نحكم.
 
< كروت ايكانغا وساني ...اخبارها شنو؟.
 
< شايف انا في طناش.
 
< وفي صهينة.
 
< ومجلس ادارة الهلال ..مطلوب منه ايضا ان يحسم هذه الامور ...وان يتعامل مع هذا الامر بشيء من الجدية والمسؤولية.
 
< مجلس الهلال عليه ألا ينشغل فقط بمعتز رابح.
 
< الموضوع اكبر من معتز رابح.
 
< في ملفات في الهلال اكثر اهمية.
 
< قناة الشروق هل سوف تنقل مباريات القمة مع الاسماعيلي.
 
< على العموم ..فان الجميع في شوق ولهفة للقمة.
 
< اهلي شندي معسكره اكثر جدية من القمة.
 
< معروف ان الاهلي شندي سوف يواجه الهلال في اول مباريات الدورة الثانية.
 
< عاجل : يا العجب الناس ديل جابو ليك (عجب) جديد ..مخصوص عشان تفهمها من قاصرها ...وتمشي.

 المصدر : قون

Share this article :
 
Support : Creating Website | Johny Template | Mas Template
copyright © 2011. مدونة تلفزيون الهلال السوداني - All Rights Reserved
Template Created by Creating Website Published by Mas Template
Proudly powered by Blogger