الهلال والمريخ هموم مشتركة..

لقاء كل يوم / رمضان أحمد السيد  

{ والشغل الشاغل لجماهير الهلال والقراء هذه الايام امران لا ثالث لهما بالنسبة للهلال وموضوع واحد للمريخ!! في الهلال والسؤال المسيطر علي الساحة مصير الثنائى وماذا تم بخصوصهما؟!

{ والامر الثاني موضوع المدرب ووصوله وتوقيع العقد معه.. في المريخ الاهتمام بمصير الثنائي اكرم وعلاء الدين خاصة بعد التناول الاعلامي والدخول في مواد قانون العقوبات الاماراتي!!!

{ ونبدأ بالاخير وكنا عبر رسائل او خدمة قوون المباشرة قد طمانا المريخاب ـ وحمدلنا ـ السلامة بانهاء الازمة واطلاق سراح الثنائي بعد ان استلم الشاكي او المضروب او المعتدي عليه مبلغ خمسة وثلاثين الف درهم وكان اول من بلغنا الخبر وبحكم علاقاته بالامارات وهو يصل البلاد للتو قطب الهلال الشاب خالد العباسي!! ومن المنتظر ان يكون علاء الدين قد وصل مع الساعات الاولي من صباح اليوم وكان قد تلقي اتصالات من زملائه للاطمئنان عليه علي راسهم قائد المريخ هيثم مصطفي.

{ بالنسبة للهلال فان اهتمام الجماهير الهلالية بالثنائي المحترف واوراقه يؤكد الحرص علي فريق الكرة واكتماله قبل انطلاقة الموسم الكروي ولكن بعد عرض التشكيلات وخيارات المدرب في اللاعبين وتوفر عناصر الخبرة بجانب 4 محترفين علي مستوي اثنين من القدامي واثنين من الجدد قد طمأن الجماهير وكونه الفيفا وهي تطلب من الوكيل الاوراق والبلاغ وكل ما هو متعلق بالحادث الذي تعرض له وحال دون المشاركة او المساهمة في ارسال البيانات عبر السيستم كلها تنبيء بالاخبار السارة ونتمني ذلك.

{ والامر الهلالي الثاني هو المتعلق بالمدرب وبالفعل وعلي حسب ما اشرنا في زاوية الامس فقد وصل مع الساعات الاولي لصباح الامس هذا في حد ذاته خبر سار يحسم ويقفل ملف هذا المدرب من كونه سيحضر ام لا كما كان يتردد!! ويبقي الامر الاخر او الجزئية المهمة في التعاقد معه والذي سيتولاه رئيس النادي شخصيا السيد الامين محمد البرير ونتمني ان يكلل بالنجاح في وجود صاحب الملف الخاص بتعاقدات المحترفين د حسن علي عيسي عضو المجلس.

لا توجد ميزانيات للقمة؟؟!!:

{ العمل الاداري وخاصة المالي والميزانيات يجب الا يسير بصورة عشوائية علي الاقل في اكبر ناديين في البلاد الهلال والمريخ وهما يشاركان افريقيا في البطولة الكبري.

{ لم نسمع بميزانية وضعت وحددت تتابع سير الاعداد والاستحقاقات والمعسكرات والسفر الخارجي للمباريات وغيره وكم المطلوب وما هو الموجود.. وكم يبلغ العجز، ومن اين سيغطي كل ذلك؟!!

وماهي الخطط والمشاريع العاجلة لعمليات الانقاذ والتدعيم!! وهل توجد مديونيات!!

علي الاقل الاقطاب والحادبين والدولة يجب ان تكون في الصورة حتى تكون هناك مساهمة مقدرة، اما حكاية رزق اليوم باليوم. فمع الولوج لعالم الاحتراف فانها لاتجدي.

لحن الختام

{ نجوم الصف الثاني في الهلال بدءا بالحارس بهاء الدين والمدافعين صالح الامين وخليفة وفداسي ونجوم الوسط محمد أحمد والشغيل وبشة. وثنائي الهجوم عبده جابر وبكري المدينة يحتاجون لتمارين مكثفة وتأهيل سريع حتى يكونوا في الموعد لدخول التشكيلة الاساسية خاصة وازدحام برنامج الموسم والمشاركات الخارجية وارتباطات القوميين مع مباريات للمنتخب وتحوطا للاصابات والاخفاقات ، لانريد لمستوى الاحتياطي ان يكون اقل مستوى من الاساسيين باي حال من الاحوال.

{يا سلام على بطولة الخليج.. قوة وحماس واثارة ومستويات رفيعة. الهدف أو الاهداف تاتي في الزمن القاتل.. وياخوفي على البحرين المنظم بعد تعادله مع عمان وخسارته من الامارات ومواجهته القادمة مع قطر هي التي ستحدد تأهله كثاني للمجموعة أم لا وربما يلعب فارق الأهداف دورا في الامر بعد تأهل الامارات من فوزين على قطر والبحرين. واقتراب قطر من خسارة من الامارات وفوز علي عمان. وللبحرين وعمان نقطة واحدة لكل. والعماني سيختم مبارياته في المجموعة بالامارات المتصدر!! لقاء البحرين وقطر سيكون نهائيا مبكرا للبطولة.. ومعركة لاتعرف انصاف الحلول.                                            

على مجلس البرير واعلامه ان‮ ‬يكون أكثر جرأة وشجاعة ويعترف بالفشل‮

لقاء كل يوم / رمضان أحمد السيد                   

حدث ولا حرج‮!!!‬
‮{ ‬الناطق الرسمي‮ ‬للهلال الذي‮ ‬ملأ الدنيا وشغل الناس لا اتحدث هنا عن خطاب شطب هيثم مصطفي‮ ‬وانما سهرنا معه حتي‮ ‬الساعات الاولي‮ ‬من الصباح وهو‮ ‬يلاحق سكرتير اتحاد الكرة بمنزله ويقول انه اتي‮ ‬بالبشريات لجماهير الهلال لنتفاجأ ويتفاجأ الجميع بان الامر برمته لم‮ ‬يكن سوي‮ ‬مجرد محاولات اظنها وعلي‮ ‬النحو والواقع الذي‮ ‬نعيشه قد اصيبت بالفشل الذريع بدليل ان الهلال بالامس استفاد من خانة لومامي‮ ‬السنغالي‮ ‬وسجل مكانه مشطوب ومعطوب المريخ الشغيل‮.‬
‮{ ‬وبدلا من ان‮ ‬يرمي‮ ‬مجلس واعلام البرير باللائمة علي‮ ‬اتحاد الكرة عليه ان‮ ‬يكون اكثر جرأة وشجاعة ويحمل الامر برمته لمجلس الهلال والذي‮ ‬كثرت جلطاته في‮ ‬فترة وجيزة لو كان هناك نوع من الحياء لما بقي‮ ‬عضو في‮ ‬المجلس حتي‮ ‬الان بما فيهم الرئيس،‮ ‬والذي‮ ‬اضاع معظم وقته وزمنه وسهره حتي‮ ‬الساعات الاولي‮ ‬من الصباح مع المحترفين وابداء الرغبة وفلاشات الكاميرا‮ ‬ليؤكد بانه موجود ويمكن ان‮ ‬يقتحم مكاتب الاتحاد بعد عملية هيثم مصطفي‮ ‬بدلا من ان‮ ‬يضطلع بما هو اهم ويتابع عملية الاجراءات الرسمية‮.‬
‮{ ‬وانه بحق لامر مؤسف ونحن ندخل عالم الاحتراف ونقع في‮ ‬مثل هذه الاخطاء الساذجة‮!‬
‮{ ‬ورغم الاخطاء‭ ‬‮ ‬القاتلة من ادارة الهلال الا ان اتحاد الكرة هو الاخر لا ندري‮ ‬الاسباب او المبررات التي‮ ‬تجعله‮ ‬يقصر فترة التسجيلات او التعاقدات او ربط موضوع السيستم مع الفيفا بعشرين‮ ‬يوما فقط في‮ ‬حين ان معظم الدول ان لم‮ ‬يكن كلها‮ ‬يستفيد من الشهر كاملا ـ‮ ‬ثلاثون‮ ‬يوما ـ ولا ندري‮ ‬سببا‮ ‬يجعل اتحاد الكرة لا‮ ‬يضيف الاسبوع الاخير لمعالجات المشاطيب مع المحترفين وهو‮ ‬يعلم الكثير من المشاكل والعقبات علي‮ ‬نحو ما حدث في‮ ‬فترات سابقة‮!!!‬
‮{ ‬الطريف او الغريب في‮ ‬الامر ان الاتحاد‮ ‬يقال بانه درب الاندية خاصة التي‮ ‬تمثلنا على المستوى الخارجي‮ ‬على هذا‮ ‬السيستم‮!!‬
‮{ ‬نعود للهلال ولجزئية اخري‮ ‬ورئيس الهلال عبر قناة الشروق‮ ‬يقول بانهم ملتزمون باتفاقية الجنتلمان ولن‮ ‬يسجلوا اي‮ ‬لاعب‮ ‬يشطبه المريخ‮!!‬
وهاهو‮ ‬يسجل الشغيل‮!!‬
ألم‮ ‬يكن من الاجدر ان‮ ‬يحتفظ بلاعبيه هيثم وعلاء ويلجأ لمعالجات تربوية بدلا من ان‮ ‬يكون الهلال هو الخاسر من العقاب على نحو ما‮ ‬يحدث الآن وهو‮ ‬يسجل الشغيل المهموم بعملية‮ ‬غضروف لاندري‮ ‬متى سيكون لائقا بعدها‮ ‬يشارك رسميا‮. ‬خاصة اذا ما ارتبط تسجيله بالفترة التكميلية وعودة المحترفين بعد توفيق الاوضاع مع السيستم‮.‬
‮{ ‬اراد الهلال ان‮ ‬يضحى بمحترف على امل ان‮ ‬يكسب محترفين وفي‮ ‬حالة الفشل وعدم تجاوب الفيفا سيكون كسب الشغيل‮!! ‬هذا هو المنطق في‮ ‬حين أن خانة الشغيل‮ ‬يمكن ان‮ ‬يملأها‮ ‬اكثر من ‮٤ ‬لاعبين في‮ ‬كشف الهلال‮.‬
‮{ ‬وفي‮ ‬النهاية مع كل موسم جديد للتسجيلات تتكرر الاخطاء ولا حياة لمن تنادي‮!‬
‮ ‬لحن الختام‮:‬
‮{ ‬يعتقد مجلس الهلال أن الاحداث المريخية سببها شطب الشغيل والاعتراض عليه من كثيرين لذلك بادروا بتسجيله على اساس ضربة للمريخ‮.‬
ومن الواضح ان الهلال لن‮ ‬يستفيد منه،‮ ‬وسبق ان سخر منه اعلام الهلال كثيراً‮.. ‬واذا كان البعض‮ ‬يردد انه سيخصص لمراقبة هيثم مصطفى فمن قال بان هيثم مصطفى سيلعب ضد الهلال‮!! ‬ولماذا هذا التناقض اذا كان مستواه الفني‮ ‬وتقدم العمر بشطبه من الهلال فهل هو في‮ ‬حاجة لمن‮ ‬يراقبه؟
‮{ ‬يقول الطيب ابراهيم وهو‮ ‬يرد على سكرتير المريخ عصام الحاج والبحث عن لقب لهيثم مصطفى بالقول‮: ‬كان اسمه سيدا‮. ‬وفي‮ ‬المريخ نقترح عليه‮ (‬سيبا‮)!!‬
‮{ ‬ويقول خالد احمد الطاهر من ام ضوابان بان خليفة هيثم مصطفى هو هيثم‮. ‬فلا‮ ‬يوجد هيثمان في‮ ‬السودان والقارة السمراء والوطن العربي‮.‬
‮{ ‬معقولة الهلال‮ ‬يشطب هيثم ويسجل اللاعب الذي‮ ‬كان‮ ‬يراقبه‮!! ‬هذا هو لسان حال الكثيرين‮!!‬

‮{ ‬في‮ ‬هذا المجلس اي‮ ‬شئ معقول‮!! ‬ونص وخمسة‮..‬

يا سلك فريقكم بقوا كلو (معاجين) اسنان

وان طال السفر / محمد عبد الماجد                                                                             

من بين العبارات الجميلة ..والفلسفية والعميقة لشاعر الشعب محجوب شريف ..عندما حملنا اوراقنا اليه ...نسأله عن (جرح) الانفصال ...يوم ان فصلنا (سياسيا) بين الشمال والجنوب ...قوله لنا في اجابة عميقة : ( اجتماعيا نحن فشلنا في خلق تواصل والفة وعشرة بين الشمال والجنوب ...لذا كان طبيعيا ان يحدث الانفصال..لم يكن الانفصال نتاج صراع سياسي فقط).
صمتنا في حضرته ...طمعا في المزيد من التوضيح ..والتفسير...نعرف ان محجوب شريف يوصل (المعلومة) خدمة ديلفري..لي عند الباب.
يبسط الاشياء ..ويقدمها ليستوعبها كل الناس.
عاد محجوب شريف ..واكد قوله بهذا الشرح الوافي وقال : ( لو دخلت حمام أي اسرة شمالية سوف تجد في (جحور) الحمام وشباكه، وبين الحائط والماسورة ..مجموعة من (فرش الاسنان) ...سبعة او عشرة (فرش اسنان)...هذه الفرش هى قراءة طبيعية لزيارات تقوم بها الاسر لبعضها البعض).
فرش اهل البيت تظل تمارس (سواكها) اليوم ..اما فرش الزائرين ..تظل مهجورة ..ومثبتة على الجدران..(مجرد ذكري لزول جاء وفات).
صمتنا ...وكان صمتنا يعني ان يزيد محجوب شريف في توضيحه ..وفلسفته اكثر.
اضاف محجوب شريف : (يعني اذا زارك صديقك (عثمان) وبات معاك (خميس وجمعة) في البيت ..سوف يشتري (فرشة اسنان) ويتركها في الحمام عندما يذهب ..وكذا الحال ..تفعل خالتك التى قدمت من البلد ..وقعدت معاكم اسبوع ..ونفس الشيء يحدث من (خالد) الذي جاء ليستخرج (جنسية) ، سيترك (الفرشة) ويغادر...وايمن الذي يريد ان يخرج جواز سفر سوف يفعل نفس الشيء ...وهدي التى تأتي من الداخلية لزيارات عمها في كل شهر).
يذهبوا اولئك الزائرين ..وتبقى (فرش اسنانهم) في البت تذكر عن تواصلهم وزياراتهم.
وانت نفسك قد تذهب ..وتبيت برة البيت ..وتشتري ليك (فرشة اسنان) تسوك بيها ..وتخليها قبلها وترجع.
اذن هذه (الفرش) ...هى عناوين لزيارات الخميس والجمعة ...وهى تباعا قد تكون لخالتك وسلوي وخالد وعثمان وايمن ، صاحبك وقريبك ..وزميلك في العمل او في الدراسة.
الفرشة الحمراء حقت عثمان ..والخضراء حقت خالد ..والبيضاء حقت ايمن ..وهكذا.
قال محجوب شريف ذلك ثم اضاف ..قائلا ...انا ما حصل دخلت لي (حمام) اسرة شمالية ..وقالوا لي الفرشة دي فرشة (جون) او فرشة (مايكل)..او (ميري)...هم يقولون دائما ..دي فرشة عمر ود خالتنا ..ودي فرشة تهاني زميلة اماني في الجامعة..الخ.
عندها عرفت ماذا يقصد محجوب شريف بقوله الذكي هذا ...والذي يشير فيه ان التداخل بين الشماليين والجنوبيين قد يكون في السوق او في العمل او في النادي ..لكن على النطاق الاسري وداخل البيوت هو غير موجود ..لذا حدث الانفصال..لأن الالفة الاسرية بين الشمال والجنوب (معدومة).
الحديث عن (فرش الاسنان) هذا ..ذهبت اليه ..تذكيرا ..بقول سابق للعزيز بابكر سلك ...الذي شبه ذات يوم فيصل العجب بـ ( صباع المعجون) ...وقال ان العجب متل ( صباع المعجون) الذي كلما ظننته خلص ...عصرته طلع ليك منه (معجون).
قدر ما تقول كمل ..تلقي فيه حاجة ..(دا العجب).
يا سلك العجب ...ما خليتو فيه حاجة..ضغطوه ضغط شديد.
أي حاجة ممكن تسفيدوا منها ...من فيصل العجب دا عملتوها.
زي الحبشي العندو (ديك) ضبحو ....عمل كرعينو (كوارع)..وشد لحمتو (شوربة)...وعمل رأس الديك (باسم)..والمصارين والكبدة والفشفاش ...عملها (ام فتفت)...ريش الديك عملوا (سيوتر) في البرد دا ...والدم حق ضبيحة الديك ..(جير) بيه الصالون.
يعني ما في حاجة طلعت (اف) من الديك دا.
دا قبل ما يضبحوا ..عمل صوتو (العوعاي) نغمة في موبايلو.
اقول حاجة مبالغة كدا.
الزول دا ...قبل ما يضبح الديك (حلبو).
يعني البقي والما ببقي طلعو من (الديك) دا.
ناس المريخ ...هسع (العجب) ما خلوا فيه حاجة.
وبابكر سلك ...لسع (ساكي) الحكاية دي ...عاوز يطلع ليه شيء من المعجون دا.
يا سلك بعد كدا ..إلا تعمل (المعجون) دا خاتم.
ما فيه شيء تاني.
طبعا نحن في الهلال ...ما بنصل للمرحلة دي ..(المعجون) بنجدعو من يصل النص.
المعجون بنجدعو بي حالو.
حكاية عصر المعجون دي ..ما عندنا.
المريخاب ..(قلق) ..ما خلوا فيه حاجة ...قلق اعاروه ..ورجعوه ..وشطبوه.
أي فكرة كدا ..تختر ليكم في الباك ...عملوها في (قلق).
قلق مشي يلعب في الاهلي عطبرة ..يا ناس عطبرة ...(انتوا ناسنا) ..قلق دا تاني والله إلا (يعلق) ليكم على المباريات..او يحلل ليكم (الكورة) في تلفزيون عطبرة.
معجون قلق دا ما فيه الحبة.
عشان الموضوع يبقى ليكم واضح.
الشيشية ذاتها ما خلت ليها حاجة في صباع المعجون دا.
المريخاب ..ما زي الهلالاب ...(المعجون) يخلوه بي حالو.
المعجون اذا نشف ..وانتهى ...ما تجدعه ..يمكن تحتاج ليه يوم ..ويفك حيرتك.
لا سيما ان الدنيا ..(برد)...وما في زول بقدر يمشي (الدكان) في السقط دا ...لذلك (لف واعصر) المعجون ..واشرطه كمان ..بطلع ليك معجون قدر حق السواك.
عندنا زول في الحلة ..زي المريخاب ديل ...(المعجون) وقت ينتهي ..بعصرو بالزردية.
ما بخلي فيه شيء.
تلقى قاعد الصباح بصارع ليك في (المعجون) ...تقول في حلبة مصراعة.
تشبيه بابكر سلك ...جميل ورائع ...ويثبت ان (الدهن) فعلا في العتاقي.
نتفق مع بابكر سلك في ان فيصل العجب فعلا زي صباع المعجون ..قدر ما تقول انتهى تلقى فيه حاجة.
وان كنت اقول ان فيصل العجب بعد انتقال هيثم مصطفى الي المريخ سوف ينزل درجة من (المعجون) وسيصبح (مسواك) شجرة حنة او نخيل ساكت ..وهو بذلك ادني من (مسواك) الاراك.
العجب اكتر من كدا يا سلك عاوزين تطلعوا منو شنو؟.
اخر حاجة فيه ...عملها في تسجيل هيثم مصطفى وعلاءالدين يوسف ...وصل معاه الاتحاد حضر التسجيل ورجع.
العجب تاني إلا تخلوه للحاجات دي.
كابتن تشريفي ساكت.
المريخ الان ...وعلى نسق تشبيه الاخ بابكر سلك بقى كله (معاجين).
بقى دكان بتاع جميلة لمعاجين الاسنان.
الوصيف بقى كل معاجين.
المريخ بقى فيه اكتر من معجون.
بداية من فيصل العجب المعجون (ابومرجيحة)...مرورا بمعجون عصام الحضري (44) سنة معجون ابوالهول....نهاية بمعجون (فييرا)...نهاية بمعجون (البرنس).
معجون فيصل العجب (ابومرجيحة) على ما يبدو كدا ..بقى ما فيه حاجة ..خلاص انتهى ..عشان كدا ..المعجون دا ح يقعد في (الكنبة).
المسألة دي بالنسبة ليكم واضحة طبعا.
واحتمال كمان يستغنوا عن هذا المعجون دا نهائي في يونيو القادم ..عشان صلاحيته انتهت ...(أي ان يونيو القادم هو التاريخ الذي سيصبح فيه فيصل العجب في حل من تعاقده مع المريخ).
يعني يا سلك ..معجون (ابومرجيحة) دا ...لو عصرتوه تاني ...يمكن (يسممكم) عديل كدا ...لأن صلاحيته انتهت.
وضحت النقطة دي.
معجون (ابوالهول)...الشهير تجاريا باسم عصام الحضري ...العصر ما بطلع منو حاجة.
لكن (الدولار)..ممكن يجيب منو شيء.
المعجون دا ..بجي منو بالدولار.
بعيدين الحضري دا لو العصر ..بجيب منو شيء ...كان ناس الاهلي المصري ما فكوه.
المصريون ...(المعجون) بفكوه بعد ما ينشف.
فييرا ...طبعا 3 سنوات مع المريخ و6 سنوات مع الهلال ...يعني برضو بقى (معجون).
هيثم مصطفى ...ما عاوزين نتكلم عنو.
لكن يا سلك ...كلام ليك كدا ...(باسكال) ذاتو بقى (معجون).
فريقكم دا يا بابكر ...الاتسوك في الشوط الاول ...اتسوك ..والما اتسوك ..يقنع ساكت.
ملحوظة : غايتو...اطمئنوا ...ما في (تسوس) بصيب المريخ.
هوامش
تاني الواحد وقت يدخل مباراة للمريخ ..يقول للزول الجنبو ..الاطول منو ..اسمع عليك الله شوف لي (كنبة) المريخ دي فيها كم (معجون).
ولمن يقوم لاعب يسخن ....الزول القصير يقول للزول الطويل : اسمع (المعجون) البسخن دا منو؟.
ولمن المريخ يسجل هدف...عليك الله شوف لي الهدف دا جابو ياتو (معجون).
المنافسة بين (المعاجين) في الموسم الجديد في المريخ ح تكون شديدة.
من هو اكثر معجون مقاوم للتسوس؟.
وما هو المعجون الذي يمكن ان يجعل اسنانك اكثر (بياضا)....بياض وإلا بلطي.
خلاص ما تزعلوا ...عشان انتوا مريخاب ...ما هو المعجون الذي سوف يجعل اسنانك اكثر (صفارا).
في البيت ...جني وجن (المعجون) البروح.
وجني وجن الشافع البيلعب بالمعجون.
قالوا ناس الهلال امس سجلوا ليهم (معجون) جديد.
ان شاءالله خير.
معجون عنده (غضروف) كمان.
منو الكان بصدق ...هيثم مصطفى يمشي المريخ ...والشغيل يجي الهلال.
البرير ..يكون عاوز يثبت الموقف شوية ...عارف هيثم مصطفى دا ما بتمسك إلا بالشغيل.
عشان كدا جابوا ليه (معجون) اصلي كدا.
معجون مجرب قبل كدا.
معقولة ..ناس البرير ديل يفاوضوا سيدي بيه ..ويسجلوا (الشغيل).
دا زي الفلهمة العورة ..والحوامة بالبطارية في ليلة كمال القمر.
اخر السوق ...الهلال عنده خانات فاضية ..في اوقات الشدة دي ..البرير لو لقى (عمك تنقو) ذاتو بسجلو.
الحافلة وقت تكون قايمة ..بتموها بي أي زول.
ان شاءالله زول ما يكون ماشي.
على العموم ..نتمنى لنصر الدين الشغيل النجاح في الهلال ..والشفاء من (الغضروف).
الحاجة التى يتميز بها ىالشغيل ...هي الروح القتالية ..والحماس الذي يلعب به.
يعني ممكن (يفور) النص شوية.
تاني ما عاوزين أي زول يحوم بي هناك.
ما عاوزين نشوف أي (معجون).
في الموسم الجديد ...الواحد لو قعد يتابع ليه مباراة قمة بين الهلال والمريخ ...إلا يكون ذاكرتو قوية.
لو دقس ..او سرح ساكت في المباراة ..بلخبط الكيمان.
الباشا وهيثم مصطفى وعلاءالدين يوسف وكلتشي في المريخ ..وبهاءالدين والشغيل في الهلال.
مباريات القمة في الموسم القادم عاوزات ذاكرة قوية..وبديهة حاضرة.
اقل حاجة ..بتطلع برة الشبكة.
يا ناس المريخ في الموسم الجديد الاحمر حقكم دا ..دبلوه ..عشان الواحد ..ما يلخبط.
ناس المريخ عاملين فيها عندهم (وفاء)...اللاعب يصاب في كشوفاتهم ..يشطبوه ..لا يعالجوه ..لا يكلموه ...لا يزوره ساكت.
هسع عليكم الله الشغيل دا ما اتقطع معاكم قطيع.
الزول دا ضربو كم (لغم) في سبيل المريخ.
في النهاية تشطبوه بالشكل دا ..وفي المستشفي ...ما تمشوا تزروه.
هسع يا ربي البرير فاكر نفسو ..رد الصاع صاعين لي ناس المريخ.
شكلو فاكر كدا.
اقول ليكم حاجة ...موضوع (المعاجين) دا انا ما بخلي ..برجع ليه تاني.
بكرة ان شاءالله ح اكتب ليكم عن (سيدا) الجديد ..نصرالدين الشغيل!!.
عاجل : تاني ما اشوف لي مريخابي بشكي من (التسوس).
 

خطأ الحضري ...مزمز ميرندا

وان طال السفر / محمد عبد الماجد                                                                    


< عندنا زول في الحلة اسمو (ابودمغة)...ابودمغة دا زول ما ساهل ...الحلة كلها بتشكر فيه.
< زول قديم ..من زمن (الحافلة) كان بكون فيها (مقعد) واحد..وزمن تذكرة باص الجريف ممكن توديك (فرانكفورت) ...الدنيا كانت بي خيرها.
< ما في زول بسألك ...ولا في زول بقول ليك الساعة كم؟.
< ولاية الخرطوم دي زمان كانت شمال حدها نهر النيل الازرق ...جنوبا السكة الحديد ...شرقا جامعة الخرطوم ..وغربا استاد الخرطوم.
< الموضوع انتهى على كدا ...ما في كلام كتير ...ولا فى جرجرة.
< هسع الحكاية اتلخبطت ...استاد الخرطوم بقى شرق ...وسوبا بقت قلب الخرطوم.
< زمان (سوبا) دي ما بتمشي ليها إلا تكون ضامن ليك (جمعة) قدامك ...هسع تمشي وتجي في 5 دقائق.
< ما عارف ..نحن سكنا برة البلد ..وإلا كمان سوبا بقت جوة...والا الحاصل شنو بالظبط كدا.
< ولاية الخرطوم هسع ..تسافر ..سفر ...بعد اربعة يوم طيران ..تكتشف انك لسه في حدود ولاية الخرطوم.
< هسع ما تشر لينا الموضوع في ولاية الخرطوم...خليك احسن مع ابودمغة.
< ابو دمغة دا كان زول صعب النوع القدر ما يلقى ليه (شافع) حايم في الشارع ..بثبتو ليك..وبقول ليه يا ود ماشي وين في انصاص الليالي دي؟...لو لاقهو (الصباح)..بقول ليه كلامو دا (ماشي وين في انصاص الليالي دي؟).
< عشان كدا من الساعة سبعة صباحا ...ما في (شافع) بحوم ليه في الشارع.
< ما في زول بقدر يقول فيه كلمة...زول (جنب) ...ما بقصر في أي حاجة...اى حتة فيها (جوطة) بتلقى بتصدر الموقف هناك.
< ابو دمغة دا ...كان لو حصلت ليك أي حاجة ..بتلقى اول زول (دافر) ..قدام الناس.
< الواجب ما بتلفت فيه...وبندولو شايلو في جيبو ..بس ما تقول عندك صداع.
< لو عاوز تجيب ليه (نفسيات)..قول ليه ما شفتك في عزاء ود السارة.
< يزعل ..ولونو يقلب...ويسل سكينو من ضراعو.
< اظن كدا ..اني قلت ليكم قبل كدا الزول دا صعب..(لو جاه مسكول بالغلط ساكت ..شكلتو بدور).
< ما بتفاهم.
< لو في زول مات ...تلقى غاطس لي نصو في (ود اللحد)..مكفكف العراقي والسروال..وقافل الموبايل.
< والفراش لو ما رفعوه ..ما بتزحزح من الصيوان.
< الموية الناقصة بتمها ...الكرسي الطاشي بجيبو...والسكر ان كمل بجيبو.
< زول واجب بس.
< ابودمغة دا ..كان لو حصلت ليك أي حاجة ...(بدفر) ليك خروف قدامو ..وبفتح الباب وبجيك داخل.
< سماية ...كرامة ..عرس ...عودة من سفر ...اي حاجة بتحصل ليك بجيك ناطي بي خروفو.
< ما عندو مناسبة بمشي ليها بدون (خروف).
< الخروف دا اقل حاجة يمكن ان يقدمها ليك.
< كيلو ..ونص كيلو ...وكراع ..دي ما عندو ...ولا في حساباتو.
< ابودمغة دا من (الخروف) ولي فوق.
< الزول (ابودمغة) دا ..بدون مناسبة كدا ..ذكرني ليك ..عصام الحضري (44) سنة.
< ما عارف العلاقة شنو؟....ما تسألوني شن جاب لي جاب.
< انتوا يمكن تشوفوا ما في علاقة بين عصام الحضري ...وابودمغة دي.
< يمكن تضايقو من المقارنة دي؟
< لكن بوقع ليكم الكلام ..وبشرحو ليك.
< وإلا اقول ليكم اشرحو ليكم ليه ...انت في زول فيكم طالبني (كلمة).
< بعدين انا مع (البرد) دا ..ذاتو ما فايق لي شرح.
< الحمدلله لقيت لي (مناسبة)..اسألكم ..انتوا (البرد) النزل فجأة دا شنو؟.
< ما خلينا حاجة للروس ...تقول في (موسكو).
< بقى ما عندنا أي فرق من الروس.
< لكن خلوني اشرح شوية.
< مش مرات بتمشي العيادة ..تحجز ..وتقعد مع الجماعة تنتظر دورك.
< ومش مرات بتلقى ليك زول قاعد في العيادة ..وبتابع في الكشف زي المسلسل التركي.
< انت بكل حسن نية تفتكر الزول دا حاجز.
< تمشي تسألو تقول ليه : انت دورك الكم؟.
< يقول ليك ابدا انا ما حاجز ...لكن منتظر لي زول.
< يا زول الجابرك على (البرد) دا شنو؟.
< يا ود الناس عليك الله وقت انت ما حاجز مالك ومال التلتلة دي؟...يمين نحن الواحد لو ما اتمكن من المرض ..ما بمشي ليه لي دكتور.
< عندنا زول لو ما موتوه عديل ..ما بمشي ليه لي دكتور ...جنو وجن الدكاترة.
< تمشي ليك لي دكتور ..لي حاجة بسيطة كدا ..يقول ليك ...لازم نشيل (الطوحال).
< في الساهلة ..والصعبة بشيلوا (الطوحال).
< انا ما عارف الدكاترة ديل مشكلتهم شنو مع (الطوحال).
< هسع الطوحال دا ...ما موضوعنا.
< عشان ما الف وادور ليكم كتير..بدخل ليكم في الموضوع.
< انتوا الزول إلا يجيكم عديل كدا.
< (أختير الخطأ الذي أرتكبه عصام الحضري حارس مرمي المريخ السوداني وقائد المنتخب المصري خلال مباراة فريقه مع ليوبار الكونغولي بذهاب الدور قبل النهائي ببطولة الكونفيدرالية الأفريقية بين أغرب الأخطاء التي رصدها موقع »تي أن« الأرجنتيني في تقرير له عن أغرب أخطاء عام 2012 .الموقع علق على خطأ الحضري الذي إختاره بين تسعة أخطاء هي الأغرب في 2012 بقوله :« أسطورة الكرة المصرية عصام الحضري أحيا كرة ميتة لتصبح هدفا سخيفا في مرماه بعد خطأ مربك ». يذكر أن ، هذا الهدف كان سبباً في إقصاء المريخ من الكونفيدرالية الأفريقية بعدما فشل الفريق في تحقيق نتيجة تعوض خسارته في الكونغو بهدفين لهدف).
< خد مزمز ميرندا.
< الحضري قبل هذه الخطأ..قال عاوز يعمل ليه انجاز مع المريخ ..ويشيل ليه بطولة خارجية.
< ونحن صدقنا ..قلنا الزول دا كبير في السن ..ما بتكلم ساكت..(برضو العمر ليه احكام).
< وقال الحضري ...ان البطولة الوحيدة التى لم يحققها في مسيرته الرياضية هى الفوز بالكونفدرالية.
< قلنا ممكن ...الحضري دا حارس كبير.
< اها الحضري طلع ليه بي (غلطة) ...الفيفا ..سجلت ليه الخطأ ..والمواقع العالمية رصدته ضمن ابرز اخطاء في العالم سنة 2012م.
< شفتو الزول وقت يعمل ليه (فضيحة) تظل هذه الفضيحة ملازمه طول العمر.
< الجماعة نسوا كل انجازات الحضري ..(3 بطولات امم افريقية)..واحسن حارس في القارة الافريقية في 3 بطولات امم ..والكثير من الانجازات القارية والمحلية مع الاهلي المصري.
< الناس نسوا كل الحاجات دي ..ومسكوا ليك في (الغلطة) الوقع فيها الحضري ..في اخر عمرو.
< يعني يا الحضري طلعت ليك بانجاز (سلبي) مع المريخ ...وتداولت غلطتك في المواقع ..وكانت موضوعا لكل الناس للسخرية والضحك على (سذاجة) هذا الحارس العجوز ..الذي وقع في (خطأ)..لاعب سلة ما بقع فيه.
< المريخاب طبعا ممكن يقولوا الموضوع دا ..طلعوه هلالاب (الارجنتين)....اصلو قالوا الارجنتين ديل نصهم بشجع (ميسي) في برشلونة ..والنص التاني بشجع الهلال.
< عشان كدا غلطة الحضري دي ...خلتهم ينشقوا من الضحك.
< غايتو مجلس المريخ ..(ما تبقى منو)..مفروض يعمل ليه لجنة تحقيق طوالي مع عصام الحضري.
< عصام الحضري حرم المريخ من الفوز ببطولة الكونفدرالية التى كان المريخ قريبا منها لولا الخطأ الذي وقع فيه الحارس المصري العجوز وكان السبب الرئيس في ان يخرج المريخ من امام فريق متواضع.
< الشيء الغريب ..الحضري جابوه عشان المريخ يشيل بطولة ...الحضري قام طلع المريخ من البطولة.
< الحكاية دي زي (الكديسة) البتجيبها في البيت عشان (الفئران)..تقوم تلقى الكديسة بقت ليك مشكلة جديدة فى البيت مع الفئران.
< يوم تلقاها شربت اللبن ..ويوم تلقاها اكلت اللحمة ..والفئران ...تدخل وتطلع قدام (الكديسة).
< اعلموا لجنة تحقيق مع الحضري... موضوع (الغلطة) التى كانت ضمن ابرز الاخطاء في عام 2012م ..مفروض ما تمر ساكت.
< مش الزول دا بصرف (17) الف دولار في الشهر.
< اسألوه ..والله 17 الف دولار ..لو كان بيأخذها (غفير) مدرستنا ..(عمرو 71 سنة) ما كان بدخل فيه هدف بالشكل دا.
< يا ود الناس ..ممكن اسأل سؤال.
< اسأل.
< هسع (ابودمغة) دخلو شنو بالكلام دا.
< ملحوظة : قلت ليكم ما فاضي للشرح في (البرد) دا.
هوامش
< عبدالله حسن عيسي ومتوكل ..رفضا (العدول) عن الاستقالة.
< اول مرة الجماعة ديل يتمسكوا بكلتمهم كدا.
< المريخاب طبعا بحبوا (التحنيس).
< ح يقعدوا يحنسوا في الجماعة كدا ..لمن السنة تنتهي.
< مفروض المفوضية تشوف شغلها.
< يعني ح نقعد ننتظر عبدالله حسن عيسي لمن يرجع عن استقالته.
< الزول دا ..كلامو واضح ..قال ما بسحب استقالته.
< هاشم ملاح ..ظهوره في الفضائيات دائما بكون (خصما) عليه.
< يا هاشم ...عليك الله ..من مصلحتك تاني اعتذر من أي لقاء تلفزيوني.
< كفاية علينا (عسقلاني) واحد.
< ما تبقوا لينا كلكم (عسقلانيات).
< سادومبا الذي يتمناه الاهلي المصري بكل تاريخه وبطولاته ..فرط فيه مجلس ادارة نادي الهلال.
< فرطنا في سادومبا ..وقعدنا ننتظر رد الفيفا.
< هسع لو سادومبا في كشف الهلال ما كان الزول دا طمنا شوية.
< عصام الحاج دا ..بفرتك المريخ.
< الزول دا ماشي كويس في (الفرتكة)..تصريحاته ذاتها فيها الكثير من التجني والسخرية من الاخرين.
< متوكل احمد علي ..مفروض تضموا لرابطة من روابط الهلال.
< الزول دا قنع من المريخ ..ونفسو مرقت.
< فيصل العجب ..عقده بنتهي في يونيو.
< والعجب قال ما بقعد (كنبة).
< يلا ورونا الحكاية دي بتتعاملوا معاها كيف؟.
< عشان اديكم طرف الخيط..اهلي شندي بدأ مفاوضات مع فيصل العجب.
< المريخاب بحترموا رموز الهلال ..وبهينوا في رموز المريخ.
< لو كنتوا عاوزين تكرموا فيصل العجب ..كان تعيدوا تسجيلو في التسجيلات الماضية.
< بالمناسبة بلة جابر ذاتو قال ما بقعد كنبة.
< وموسي الزومة ..برضو قال ما بقعد.
< تاني ما في زول بقعد ليكم كنبة.
< ما معقول تلعبوا ولاد الهلال ..ناس الباشا وكلتشي واكرم وهيثم وفييرا ..وتقعدوا اولادكم في الكنبة.
< بل اولاد المريخ ..قلق والشغيل ..بيلعبوا الان في الاهلي عطبرة.
< عاملين فيها عندهم وفاء.
< والله انتوا الوفاء ما بتعرفوا تمنحوه إلا لي اولاد الهلال.
< ما بتعرفوا قيمة اللاعب إلا اذا لعب في الهلال.
< عصام الحاج دا ..زي ما قلت ليكم ح يبقي براه فى مجلس المريخ.
< ح يكون زي بوابة عبدالقيوم.
< عصام الحاج قدر على جمال الوالي ..وقدر على عبدالله حسن عيسي ..واتسنتر
في مجلس المريخ براهو.
< حتى متوكل احمد علي الذي كان يمكن ان يسبب له (ضيق)..اتخلص منو.
< عصام الحاج دا كان قعد شوية ..بحول نادي المريخ الي (صالحة).
< عاجل : الحضري مرتب ديسمبر دا مفروض (دولار) ما تدوه.

بعد هيثم وفييرا وانهيار المجلس ..المريخاب فاضل يعيّنوا ليهم (عسقلاني)

وان طال السفر/ محمد عبد الماجد                                                                      

                                                            
قلنا في كتابات سابقة ..ان المريخ الوصيف او (الضل) ..يسير على خطوات الهلال ، ويعيد انتاج كل الاشياء الجميلة في الهلال لكن بتشويه واضح.
زي الطالب البشف (يبص) ، من الطالب القاعد جنبو الاجابة الصحيحة ..وبنقل أي حاجة في ورقة اجابة زميله بما في ذلك اسمه ورقم جلوسه.
خاصة في امتحان الانجليزي.
ما بخلي حاجة.
في زول بشف (رقم الجلوس).
ناس المريخ عملوها.
وهذا هو المريخ (الضل) يؤكد ما نقول ..ويثبت يوم بعد يوم انه نسخة مشوهة من الهلال.
وان كنا نقول ان الهلال لا توجد منه نسخة مشوهة.
الهلال جميل ..اينما كان.
المريخ بعد ان وقع في كشوفاته هيثم مصطفى ..يكذب ..ولا يتجمل ، وان ظنوه تجملا. والتشبه بالهلال فلاح كما يقول الاستاذ يس عمر حمزة.
المريخاب وصلوا حد انهم اصبحوا يقلدونا حتى في (عدم شرعية) المجلس ..عليكم الله في هوس اكتر من كدا.
انتوا يا مريخاب ...فاكرين (عدم الشرعية) دي حاجة سمحة؟.
ديل في مشاكلنا بقلدونا.
والله عدم الشرعية حاجة ما حلوة....وحاجة كدا ..بتقطع المصارين ...(ليس من الضحك بالتأكيد).
ناس همد ديل يكونوا فاكرين عدم الشرعية دي فيها (اراضي)...قايلنها (باسطة).
وإلا يكون فاكرين (عدم الشرعية) دي بوزعوا معاها (سكر).
دي زي الزول الصحي الصباح ..لبس قميصو (المشخط) ..داك ..وطلع من البيت.
في اثناء طلوعه من البيت ..لقي ليك (صف) طويل واقف قدام احد المؤسسات الكبرى.
زولكم ما كضب ..مشى وقف في (الصف) دا...قال في نفسو ..الناس ديل ما بقيفوا في (صف) ساكت.
يكون بوزعوا (جداد) مشوي في الصف دا..(طبعا انا ما محتاج اقول ليكم زولكم دا كان في هذا الوقت الصباحي نفسو في جداد مشوي).
ولا عاوز المح ليكم ..تلميح ساكت.
قال بينو وبين نفسو : اكيد في حاجة سمينة في المركز دا.
وقف واتسنتر في الصف ..وبقى كمان يوقف في الناس.
بقى في صفو بنظر ..يا زول امشي قدام ..اقفل الصف هناك ..يا جماعة ما تخلوا زول يدخل ساكت...يا شباب صفكم بالطريقة دي ما بمشي ..سدوا (الفرقات).
يلا مشي ..ادتونا (البرد).
زولكم وقت قرب للباب ..قال اخير يعرف حاجة ..قال للزول القدامو ..اسمع انت (الصف) دا صف شنو؟.
الزول الواقف قدامو قال ليه دا صف (الجلد) ..اي زول واقف في الصف دا مقررة عليه عشر جلدات...انت جاي من وين؟..ما عارف حاجة..انت بتقيف ساكت.
فاكرها (تأشيرة) للسعودية!!.
موش مفروض زولكم بعد ما عرف المعلومة دي يتخارج من الصف دا ..وينكشح.
زولكم ما انكشح .. صلح نظارتو (تقول طلب فول ) ، وقال للزول الواقف قادمو احسن اقيف وانجلد عشر جلدات ..عشان الجماعة ديل ..بكرة بزيدوا الحكاية.. بدل عشر جلدات بعملوها عشرين ..احسن الزول يخلص.
والله الناس ديل ما مضمونين.
زمان (الكبريتة) كان فيها مية عود.
هسع (الكبريتة) بقت زي المشروع فيها (عود) واحد ..تقول عاوزين يزرعوه.
الغريبة بعد ازمة الغاز والحصل في (الكبريت) ...الجماعة ديل الي الان بغنوا في (النار ولعت).
النار دي ح يولعوها بي شنو؟..مع (كبريتكم) البقى فيها (قشة) واحدة.
الموضوع دا والله لا بخصنا لا من بعيد لا من قريب ...ولا عندنا معاه قضية ...تولع ما تولع بي طريقتهم.
حكاية التقليد ..دي بذكرني بي حاجات عابرة كدا.
زول مشي ليه (مطعم)...جر ليه كرسي وقعد ...(زي ما أي زول يمشي ليه مطعم ويجر الكرسي ويقعد فيه)...ويكورك ..قبل أي حاجة يا ولد تعال نضف التربيزة دي.
زولكم نادي الجرسون طلب ...(عدس).
الزول القاعد جنبو في نفس التربيزة قال للجرسون ..عليك الله جيب لي معاك (عدس) برضو.
في زول بقلد ليه زول في (عدس)...نحن العدس عند (ايمان لندن) مكجننو.
الله يقطع سنين العدس ..محل ما يكون.
الزول ضرب العدس ..قبل ما العدس يكمل ..كورك للجرسون ..وقال ليه عليك الله جيب لي نص فرخة مشوية.
الجرسون قبل ما يرجع من التربيزة ..الزول القاعد جنبو رفع رأسو ..وقال للجرسون عليك الله جيب لي معاك برضو نص فرخة ، وتكون مشوية كمان.
ما طبيعي تكون (مشوية) ..يعني ح تكون بتقرأ (طب).
ضرب نص الفرخة ..الزول (الاصلي) تاني كورك للجرسون وقال ليه جيب لي عليك طلب (كمونية)...قال النشوف الزول دا بقلدني في (الكمونية) دي ..وإلا الموضوع دا كلو (صدفة) ساكت.
صاحبكم قبل ما الجرسون يرجع ..قال للجرسون : وانا كمان جيب لي معاك طلب (كمونية).
الله ..الله ..الله ..دي الحكاية مقصودة بقأ.
الزول (اتجوغر) ..واكل الكمونية ...ونادي تاااني الجرسون وقال ليه جيب لي (نيفة).
اصلها بايظة ..بايظة.
الزول الجنبو ..برضو طلب (نيفة).
اسمع مع (النيفة) جيب لي كوارع.
الزول برضو قال عاوز مع (النيفة) كوارع.
المسكين ..ضرب (النيفة) ..وضرب (الكوارع) ..وما قدر يتحلى من الزول المارضو دا.
قال في نفسو ..(في السر) يعني بينو وبين نفسو ..يا ربي (احلي) هنا وإلا امشي (احلي) في البيت؟.
زولكم القاعد جنبو ..قال ليه احسن نمشي نحلي في البيت.
اها ..في (تقليد) اكتر من كدا.
ناس المريخ شغالين معانا بالنظرية دي ..(التحلية) بقلدونا فيها.
والله انا لو رئيس نادي الهلال ..كنت جبت لي عشرة (رباطة) وسجلتهم في كشوفات الهلال ..وشطبتهم في اليوم التاني...عشان تسجلوهم ..وكشفكم يبقى كلو (رباطة) يا مريخاب.
يا جماعة ..انتوا دي سمعتوا بيها ..حصل قابلتكم؟.
حصل في نادي قلد ليه نادي في (الاستقالات).
ناس المريخ ..عملوها ..بقوا اليوم والتاني واحد فيهم (يستقيل).
كل ما نصحي الصباح ..نسمع ليك بي واحد استقال من المريخ.
استقالاتكم دي العاقبة تحصل في مجلس الوزراء.
نحن في الهلال عندنا نائب الرئيس ابومرين (استقال) ...المريخ فيه نائب الرئيس عبدالله حسن عيسي برضو (استقال).
دا يقولوا عليه شنو؟.
زي الحفلة البتكون بالنور الجيلاني في البرد دا ..يمين ما تفهم أي حاجة..بتاع العشا ..كل ما يمر فيك ..تنزل ليك صحن...تقول شغال في الميناء.
عندنا الامين العام للهلال الكاروري (استقال) ..عندهم في المريخ الرئيس جمال الوالي (استقال).
طبعا الحتة دي عاوزة ليها شرح.
تلقاكم قلتوا ليه ..ما استقال في المريخ الامين العام زي ما استقال في الهلال الامين العام..طول ما المريخ ..بقلّدوا الهلال ..وبشيلوا منو الحاجة بي ضبانتها.
والموضوع بعد ما ابينو ليكم ..سوف يظهر ليكم بوضوح ..لأن هناك تفسير وتعليل منطقى ..يتمثل في ان الامين العام في الهلال ..بعادل رئيس في نادي المريخ.
هسع الدولار بساوي كم جنيه؟.
اسكتوا خلوه ساكت ...ما عاوزين نقفل نفسكم ساكت.
عندنا قريبنا ..برة البلد ...كل ما يقول راجع البلد اجازة ..يسمع بارتفاع الدولار يخلي الرجعة.
الزول دا عرسو ..كل سنة بأجلو سنة ...تقول عرسو دا واضعاه اللجنة المنظمة للدوري الممتاز ....كل مرة يأجلو.
على العموم عشان جمال الوالي بس ..نحن ح نجاملكم..لأن (المشجع) في الهلال بعادل (رئيس) في المريخ.
عملنا ليكم تخفيضات 10%.
لكن يا مريخاب عشان ما تتحرجوا في (البرد) دا ..نزلنا ليكم في القيمة.. خاصة ان رئاسة الهلال يشغلها الان الامين البرير.
الاحراج في البرد ...زي الزول الببيع ليه (تلج) في هذه الايامات فى موسكو.
في زول في حلتنا ..بقوم ..كل يوم الصباح ...من دغش بدري..وبمشي ليه لي تلاجة تلج ..وبقول للولد ..اسمع يا ولد عندك تلج.
الولد طبعا في البرد دا ..بقول ليه : لا ابدا ما في تلج.
زولكم كل صباح بمشي للولد ويسألو من (التلج).
يوم الولد ...قال والله انا إلا اشوف نهاية الزول دا شنو؟...قام اشتري ليه لوح (تلج) ووضعو في التلاجة.
اول ما الزول جاء الصباح وسألو ..وقال ليه : اسمع في تلج.
الولد قال ليه : ايوا في تلج.
عمكم قام ليك فيه ...قال ليه ..عليك الله هسع دي عملية تعملها ...هسع دا برد يجيبوا فيه (تلج).
هسع موضوع التلج دا ...خليه ..واصل لينا في الموضوع الاساسي ..ما تبقى زي سواق الحافلة ..اول ما يتحرك من الموقف بكون بتكلم ليك عن (برشلونة) وميسي وفرق الـ (16) نقطة من ريال مدريد ...واول ما تصل المحطة الاخيرة ..تلقى سواق الحافلة بتكلم ليك عن (التوب) الاشتراه اول امس للمدام...وعن رسوم الجامعة للبنت الكبيرة.
نظام شنو؟....نظام الحالة بقت واحدة ...ودخلنا في المواضيع الاسرية.
نرجع للاستقالات.
العضو المحترم عصام كرار في الهلال براهو بساوي ليه 7 اعضاء في المريخ.
عشان الحساب ..يبقى ليكم واضح.
ما عاوزين غلاط.
عصام كرار بساوي متوكل احمد علي ومحمد الريح وجمال الكيماوي و4 همد..والموضوع دا برضو جاملناكم فيه.
المريخاب ..انتهوا من موضوع (الاستقالات)..ودخلوا لينا في حتة (المجلس غير شرعي).
والله مجلسكم دا من يوم ما جاء ...حسيت ليك انو المجلس دا ما شرعي.
ما عارف ليه جاني الاحساس دا؟.
نفس الجدل الدخل فيه الهلالاب ..دخل فيه المريخاب ...شرعي ..ما شرعي ...النظام الاساسي وقانون الرياضية ..وابو القوانين.
محمد الشيخ مدني ..طبعا لو في صالون وقع ساكت ...بفتي ليك فيه.
يطلع ليك النظام الاساسي للفيفا...ولوائح الاتحاد المحلي لكرة القدم في الخرطوم.
ما عارف دخل (الصالون) باللوائح دي شنو؟.
الفيلم دا نحن دخلناه.
شاهدناه بكل هذه التفاصيل.
شفناه.
الحاجات دي كلها مرت علينا.
نحن هسع قاعدين نضحك عليكم ..عشان انتوا بتكرروا في نفس الاخطاء.
عصام الحاج بقى زي (الباب) الواقف براهو ..زي الامين البرير في الهلال.
عصام الحاج بقى زي بوابة عبدالقيوم.
والمواضيع دي طبعا كلها محركها جمال الوالي.
جمال الوالي في الاول كان عاوز ناس عصام الحاج وازهري وداعة الله يستقيلوا ...يوم ان قرر المجلس صرف النظر عن تسجيل البرنس وفييرا.
عصام الحاج وازهري وداعة الله (شفوت)..فوّتوا على جمال الوالي الفرصة.
قام جمال الوالي قال احسن اهد المجلس من الجهة التانية.
جمال الوالي جاب ناسو تاني وقال ليهم قرروا تسجيل هيثم مصطفى وفييرا ..وبالطريقة دي يمكن ان يستقيل عبدالله حسن عيسي والحاج زيدان ومحمد الريح ومتوكل ..يقوم المجلس يفقد شرعيته.
شفتوا جمال الوالي مشغل ومحرك الحاجات كيف؟.
حالتو دي (مستقيل).
المضحك في الامر ..ان هناك محاولات لعودة همد وجمال الكيماوي.
همد وجمال الكيماوي ..ممكن يرجعوا تاني بعد انتهاء التسجيلات.
خلاص ايام الدفع راحت.
يا همد ...انت زولنا ..اوعي تتمقلب.. لسع في قروش طالبها النادي الكاميروني من محترف المريخ الكاميروني مكسيم ..ما تتمقلب ساكت.
عليكم الله هسع مكسيم دا اسم محترف وإلا اسبير.
انتوا الناس ديل بتجيبوهم من وين؟.
اصبر شوية يا همد ..لمن الصورة تتضح بشكل واضح.
قالوا ليك محمد الريح عضو مجلس المريخ المستقيل ..قلبو انقطع في التسجيلات.
عصام الحاج ..البظهر كل اسبوع في التلفزيون ...في التسجيلات (قرش) ما دفعو.
عصام الحاج اكتفى بالظهور (الانيق) في التلفزيون.
شفتوا كيف؟.
ناس يدفعوا ..وناس يظهروا.
هسع بعد الاستقالات ..وبعد منوال (المجلس غير شرعي)..والمفوضية تتدخل ..والوزير يرجئ التدخل في استقالات المريخ.
المسلسل التركي ..الذي شاهدناه في الهلال ..هسع بنشاهد فيه في المريخ.
ما عاوز اقول ليكم فى النهاية (البطل) بموت..زي ما حصل في الهلال!!.
ما عاوز اخرب ليكم الحلقة الاخيرة.
لكن الحاجة البقولها ليكم.
هسع يا ناس المريخ ح يعينوا ليكم (عسقلاني).
عسقلاني ..زي عسقلاني الهلال.
موش انتوا بتقلدونا ..فاكرين ...الحكاية ساكت كدا.
الموضوع فيه (عسقلانيات) يا مريخاب.
ما تفرحوا ساكت.
باقي نحن ..عشان تكونوا عارفين ... أي حاجة عندنا بي نظام.
وبعد ما يعيّنوا ليكم (عسقلاني) ...العسقلاني بتاع المريخ ح يطلع ..ويتكلم ليكم كلام سمح.
في الكلام ما بتلفت.
العسقلاني حقكم يا مريخاب ح يقول ليكم ..ح نعمل توأمة مع ريال مدريد ..وح نطبق نفس النظام.
اصلو الناس البتجيبهم المفوضية ..وتعينهم ..بكونوا بي نفس الملامح.
وح يقعد يتكلم ليكم عن الاحتراف ..والنظام العالمي الجديد.
ما تشتغلوا بالكلام دا.
نحن (العسقلاني) العينوه في الهلال طلع بتاع كلام وشو... ساكت.
عشان كدا ..ما تضيعوا وقتكم ساكت.
الحاجات دي حافظنها حفظ.
بمناسبة الاستقالات دي....في واحد قال لي ناس اهلي شندي ديل عاوزين (فييرا)...عشان يستقيلوا اعضاء من مجلس الاهلي شندي.
قلت ليه لكن لو فييرا مشي الاهلي شندي ح يستقيلوا ثلاثة فقط من مجلس اهلي شندي ...والمجلس ما بفقد شرعيته.
الموضوع دا إلا تجيبوا ليه (البرنس)...لو عاوزين مجلس الاهلي شندي يفقد الشرعية.
انتوا فاكرين فقد الشرعية ...موضوع ساهل.
الموضوع دا ..ما لعب ...الموضوع دا فيه مفوضية ولجنة الاستئانفات.
الموضوع دا ما بقدر ليه إلا هيثم مصطفى.
تاني.
والله هيثم مصطفى دا لو دخل مجلس الوزراء ..بريحنا ليك من نص الوزراء ديل.
ومجلس الوزراء ذاتو ببقى غير شرعي.
استفيدوا من الحتة دي.
وما تقعدوا تصنقعوا لينا ساكت وتعليقايتكم كلها تبقى في (البرد).
في السودان ..ما تسمعوا الكلام دا ...ما في (برد) بكتل ليه زول.
ملحوظة : وإلا في زول عندو كلام تاني.
هوامش
دموع سادومبا ...هي الاخرى تثبت ما يرتكبه الامين البرير في الهلال.
محترف يبكي ..وجماهير معتصمة ..وتسجيلات مهددة بالانهيار.
اقل حاجة هو ان يخرج سادومبا بصورة جميلة ..وبعد ان يستلم حقوقه كاملة ..ليعطي انطباع جميل عن الهلال.
سادومبا ...يجب ان تكرمه روابط الهلال وان تودعه وداعا يليق بهذا النجم الخلوق ..والذي قدم مواسم اكثر من رائعة مع الهلال وكان هدافا للابطال وهدافا للكونفدرالية.
نتمنى ان يتكرر سادومبا الف مرة في الهلال.
الحمدلله ان قطب الهلال الكاردينال ..قام بالواجب ..ومنح سادومبا حقوقه كاملة.
لا نرحب ان يخرج احد من الهلال بأسي او وجع ...حتى الخارجين الي المريخ.
دموع سادومبا ..اثبتت ان الهلال جميل ..ورائع ..وان جماهير الهلال قادرة على ان تمنح الالفة ..والانس.
يختلف الهلال عن كل الاندية في العالم ..بجماهيره الرائعة.
في كل الظروف ....لا اخشى على الهلال في ظل هذه الجماهير الوفية والمخلصة والواعية.
رهاننا دائما وابدا على الجماهير.
تسجيلات الهلال باذن الله وتوفيقه سوف تكتمل.
ولكن الوقوع في مثل هذه الاخطاء ...امر غير مقبول ...كما ان الجماهير لم تعد تستحمل مثل التهور.
سيدي بيه اهلو لقبوه (الساحر)...وان شاءالله سوف يكون هذا المحترف اضافة حقيقية للهلال.
لا نخاف على الهلال إلا من مجلس الادارة.
السنة دي في المريخ ح نفقد (وارغو).
غايتو الحاجة العملها وارغو... عبدالجبار الما بعرف يلعب كورة ما عملها.
عبدالجبار دا جنسو شنو كمان ..وعمل شنو؟.
ناس الهلال ديل الي الان ما اتحركوا ..وما عرفنا برنامجهم الاعدادي.
ناس المريخ برنامجهم طلع ...وحتى المباريات الودية عرفوها.
ناس خالد بخيت ديل ...ما يتحركوا.
اعملوا ليكم همة شوية.
الموسم الفات عملتوا لينا الموسم كلو مشاكل مع هيثم مصطفى ...اها الموسم دا ما عندكم أي عذر.
الاضافات الجديدة لكشف الهلال تحتاج لمعسكرات طويلة حتى يتم التجانس والتآلف بين المجموعة ككل.
من الاشياء الجميلة ...والتى لم يضع لها حساب ...هي عودة محمد احمد بشة لكشوفات الهلال.
بشة ان شاءالله سوف يكون اضافة كبيرة لوسط الهلال.
دفاع الهلال طبعا بقى ما فيه أي مشكلة.
بس غارزيتو دا مفروض يرجع بدري ...ويشوف شغلو.
بالمناسبة ..خايف غارزيتو يرجع ما يلقي هيثم مصطفى ..يقوم يعمل ليه مشكلة من البواب.
الزول دا ما بقعد من غير مشاكل.
وخايف كمان وقت يعرف انو هيثم مصطفى مشى المريخ ..يقوم يشاكل الحلة كلها.
شد حيلك ساكت يا غارزيتو.
السنة الفاتت مبارياتك كلها كانت ضد هيثم مصطفى.
هسع هيثم مصطفى بقى ضدك بالجد ...جد.
لو حصل أي تعطيل او خلل ادي لعدم اكتمال تسجيل أي محترف من محترفي الهلال ..يمكن ان تحدث كارثة.
يمكن ذلك ان ينسف الموسم بحاله.
جماهير الهلال ..ما بتحتمل أي خطأ تاني.
لا من المجلس ...لا من الاتحاد العام لكرة القدم السوداني.
ما عاوزين أي لخبطة.
الجماهير معتصمة.
انت يا مجدي شمس الدين ما عارف الكلام دا.
ما تقعد تصرح فينا ساكت.
لموا تصريحاتكم عليكم.
يعني انتوا الا يجبوا ليكم (ليما).
بالمناسبة ...الاحداث الاخيرة ..نستنا نودع ليما ...(تقول سايق ليه عربية باسطة).
نفسي استوعب ..بلة جابر وموسي الزومة ح يلعبوا مع هيثم مصطفى كيف؟.
المعادلة دي (رياضيا) ما بتجي.
هيثم دا في المريخ ..لبسوه شعار براهو ...عشان ما تخربوا ليه كورتو.
بلة جابر الي الان ما استوعب حكاية تسجيل هيثم مصطفى في المريخ ...عاوزنو يستوعب تمريراته.
يا بلة دي فرصتك ..السنتين دي ممكن تقرأ فيها طب.
سلك ذاتو قالوا الايامات دي بضرب في (الباسطة) ويكتب.
زمان كان مكتول بـ (فتة العدس).
ومعاوية الجاك ..قالوا غيّر تلفونو.
والله (الخلعة) ما سمحة بعد العمر دا.
زمان كنا بنقول ليكم الفرق كبير بين هيثم مصطفى وفيصل العجب..انتوا كنتوا بتقعدوا تغالطوا.
مزمل ابوالقاسم عمل حوار مع هيثم مصطفى بعد 24 ساعة اربع صفحات.
العجب المسكين ...عملوا معاه حوار (330) كلمة بي التلفون ايام كان في المخبأ السري.
والعجب ذاتو الوقت داك لو ما كان عاوزو الهلال ...ما كان في زول اشتغل بيه.
قالوا ليك ..هيثم مصطفى في المريخ ...بضع برنامج الزيارة لعبدالله حسن عيسي ..ولنادي المريخ ..ومتوكل.
هو البحدد البرنامج.
وبعتذر كمان على كيفو.
انتوا وين ضفر؟.
اقطع (ضراعي)..ان كان ضفر فاهم حاجة.
عاجل : كورتكم يا ناس المريخ بقت زي الزول البياكل (العصيدة) بالشوكة والسكين.

هيثم مصطفى بعد (24) ساعة في المريخ ..اصبح رئيسا للمريخ (عمر يوم واحد)

وان طال السفر / محمد عبد الماجد                           

المريخ اصبح عبارة عن تجمع لرابطة قدماء لاعبي الهلال
< من بدري ..ارتبط عند الناس ..ورسخ ان التطور والتقدم يأتي من الشمال.
< هذه قاعدة جغرافية ..ثابتة..لا يكسرها حتى شواذها.
< تأتي الحضارات والثقافات من الشمال ...كلما اتجهت شمالا ...كان (التقدم) حاضرا.
< لذا كتب الطيب صالح روايته (موسم الهجرة الي الشمال) ..بفهم انفتاح الثقافات ..والاندهاش بحضارات الشمال ..وتقدمهم الكبير.
< وقد سبق الطيب صالح في ذلك عصر (العولمة) ...واستطاع ان يدخل بنا بروايته تلك الي عوالم غريبة عندنا ..ومدهشة.
< وقتها كان الناس تطبق يديها ..وتقعد في الضللة ...تسمع عن فرنسا والبرازيل واستراليا وجنوب افريقيا وماليزيا ..كما تسمع عن العوالم الغريبة ...هذه الدول كانت بالنسبة لهم مثل المشترى وزحل وعطارد.
< الحاجة الوحيدة البعرفوها ان ماليزيا عاصمتها كوالالمبور.
< غير كدا ...ما كانوا فاهمين أي حاجة.
< وكان ان تذهب الي (روما)...مثل ان تذهب الي سطح القمر...اذ كانت لندن وباريس وموسكو ..عبارة عن نقاط صغيرة في خريطة العالم.
< بنفس القوة التى ادخلنا بها الطيب صالح في (الشمال)..جاء وادخل في نفس الوقت روايته (موسم الهجرة الي الشمال) للكثير من الجامعات الغربية ...وقد ترجمت الرواية وطبعت باكثر من 7 لغات.
< هذا (فهم)..لا يبعد كثيرا عن الذي سوف اتحدث عنه في الفقرات الاتية.
< الاتجاه شمالا ..دائما هو اتجاه نحو التطور.
< هكذا تدور الكورة الارضية.
< وكورة القدم برضو.
< في المحيط المحلي الضيق ...الهلال يوجد في العرضة (شمال)...وهى المنطقة التى نشأ فيها سيد عبدالعزيز وعبدالرحمن الريح وابراهيم عوض واحمد الجابري وسيف الدين الدسوقي وكل عمالقة الفن والادب في السودان ...خرجوا من (حي العرب) ...ومن المناطق المتاخمة لاستاد الهلال...وفيما يعرف بسوق القش.
< المريخ يقع في العرضة (جنوب)...تلك المناطق التى دخلتها الكهرباء قريبا ( انتو كهربة نادي المريخ رجعوها؟).
< قالوا ناس الكهربة ..عملوا ليهم (تخفيض)..وقبلوا بالاقساط.
< طبيعي ان يكون الهلال اكثر تحضرا وتقدما من المريخ ..ومنطقى حتى من ناحية (الجغرافيا) ان يكون المريخ متخلفا عن الهلال.
< ثبت في كل العقليات المريخية ...الاحساس بالدونية ..عندما ينظرون الي الهلال.
< لذلك احساس المريخاب بالهلال ...دائما احساس تصبغ عليه الدهشة والحيرة ...والعمل بمبدأ (الما بتلحقو جدعو).
< هناك (عقدة) يعاني منها كل المريخاب ...اذ يشعرون ان الهلال فريق لا يمكن الوصول اليه.
< هم يعرفون ذلك ..ويتحدثون في ساعات الصفاء والنقاء دائما عن الهلال باحساس تغلب عليه الدهشة والاعجاب.
< ناس الهلال ديل حيرونا.
< لذا فان كل المريخاب يسعون لكل ما هو (هلالي)..ويحاولوا التعلق به ..والتشبث بستائره.
< نحن الاشياء التى تأتي لنا من المريخ ...تظل (درجة ثانية)...او درجة سابعة ان جاءت لنا من المريخ.
< في المريخ الاشياء التى تأتي لهم من الهلال ..تتصدر القائمة ..ويصبح الهلالي في المريخ مواطن من الدرجة الاولى ..بل يحظى بمرتبة الشرف من الدرجة الاولى.
< البمشي من الهلال كله ..بلقى نفسو في المريخ هو (الملك)...الناهي والآمر في المريخ.
< يمكن ان اتمثل بشيء بسيط ..وهو ان كل الالقاب ..والافكار التى تخرج في الهلال ..تقلد في المريخ.
< سرقوا اسم (الزعيم) عندما كان الاسم حصريا على الهلال ..وحاولوا التجسس على (سيد البلد)..وذهبوا ابعد من ذلك ولاحقوا حتى الالقاب التى تطلق على لاعبي الهلال ..وقلدوه في لاعبي الوصيف.
< خرجت صحيفة هلالية متخصصة ...خرجت بعد فترة صحيفة وصيفية اخرى متخصصة في المريخ.
< نفس الشيء.
< كل الافكار ..تخرج في الهلال ..وتسرق منها ..وتقلد في الوصيف.
< حتى لقب (الوصيف) الذي يثبت على المريخ بالدرجات والنتائج ...حاولوا يلصقوه بالهلال.
< اترك هذا ..واذهب الي عهد جمال الوالي والذي كان عهد (استنساخ) في المريخ لكل ما هو هلالي.
< جمال الوالي مدهوش بالتجربة الهلالية ..حد الانبهار.
< حتى انه مرة نزل من المقصورة ..وطالب من مدرب المريخ ان يلعب بنفس الطريقة التى يلعب بها الهلال.
< جمال الوالي واضح انه كان في حياته شديد التأثر بالسيد صلاح ادريس رئيس نادي الهلال السابق.
< قد يكون صلاح ادريس بالنسبة لجمال الوالي (استاذا)..لذا كان متأثرا به لهذا الحد في حياته.
< لذلك فان التجربة (الاربابية) في الهلال ...حاول جمال الوالي ان يطبقها في المريخ.
< بس طبعا ما كتب عمود ..وما لحن ليه اغنية.
< حتى استقالة صلاح ادريس وابتعاده عن الهلال ...جاء جمال الوالي وكرر في المريخ نفس السيناريو.
< دخل جمال الوالي للمريخ ..بطريقة غريبة ..وكان رجلا مثيرا للدهشة ..مثل الطريقة التى دخل بها صلاح ادريس للهلال.
< وذهب جمال الوالي ابعد من ذلك حينما خرج من المريخ بذات الطريقة الغريبة التى خرج بها صلاح ادريس.
< استقال فجأة كدا.
< سيرة جمال الوالي في المريخ عبارة عن صورة (مقلدة) لسيرة صلاح ادريس في الهلال.
< اتجه صلاح ادريس للاحتراف بصورة كبيرة ..وكان من الذين نادوا بالتوسع فيه.
< جاء جمال الوالي وطبق كل نظريات صلاح ادريس التى اخترعها ..ووضعها في المريخ.
< نحن نفكر وهم ينفذوا.
< التجنيس ..كانت حيلة ذكية من صلاح ادريس ..استفاد منها جمال الوالي ..وبلغ القدرة حد ان يمنح اللاعب الاجنبي (الجنسية) من مطار الخرطوم وهو على سلم الطائرة.
< الجنسية في المريخ قلنا اسهل من (الشريحة).
< نشّط صلاح ادريس (الاعارة) وفعّلها ..بعد غيابها من لوائح الاتحاد السوداني لكرة القدم ..فجاء جمال الوالي (ورعي بدون قيد) في الاعارات.
< اذن كل هذه الافكار ...طلعت من الهلال ..وقلدها المريخاب ...دون ان يحفظوا للهلال حقوق النشر.
< هذا بالنسبة للافكار ..تعالوا وشاهدوا اعادة انتاج (تجارب) الهلال في المريخ.
< قبل سنوات كان مدرب الهلال الكرواتي (برانكو) ..والذي حقق مع الهلال الكثير من الانجازات والبطولات ..ورحل من الهلال بعد تجربة بكل المقايس كانت ناجحة.
< خرج برانكو من الهلال ..فسعي المريخ بي (ايدينه العشرة)..عشان يتعاقد مع برانكو.
< كان لهم ذلك ..تعاقدوا مع برانكو ..وتخلوا عنه دون نجاح يذكر ..رغم تجربة برانكو الناجحة في الهلال.
< بعد برانكو ..لاحق المريخ مدرب الهلال السابق مصطفى يونس والذي كان صاحب تجربة ناجحة ايضا في الهلال.
< غير ان سعي المريخاب للتعاقد مع مصطفى يونس اصطدم بلوائح وقوانين كمال شداد الذي منعهم من هذا الحلم بعد ان احضروا مصطفى يونس وقدموه للاعلام ..وشاهد معهم مباراة للمريخ من استاد المريخ.
< بعد يونس ....كان الاتجاه نحو ريكاردو الذي قدم ثلاثة مواسم غاية في الروعة مع الهلال.
< كان للهلال في عهده سلطة وسطوة ..ونجاحات على النطاق المحلي والخارجي ..فقد اصبح للهلال في وجود ريكاردو طعم ولون ورائحة مختلفة.
< ريكاردو الذي نجح نجاحا كبيرا في الهلال رغم ضعف الامكانيات ..ومواجهته للكثير من العوائق ...جاء وفشل فشلا ذريعا في المريخ ..ولم يصبر المريخاب لريكاردو غير موسم واحد ..خرج بعدها ريكاردو ..تلاحقه اللعنات والشتائم.
< رغم من ان ريكاردو وجد كل الامكانيات (المادية) في المريخ ..ولكن مع هذا لم ينجح ..خرج بكأس السودان فقط من موسم فيه الكثير من الالقاب والبطولات.
< بطولة كأس السودان كان يمكن ان يخرج بها (فاورق جبرة) المدرب الوطني ..اذ لا تحتاج هذه البطولة (المتواضعة) لمدرب اجنبي.
< تأثر جمال الوالي بصلاح ادريس ..يوضح ويظهر حتى في اتجاه المريخ للتعاقد مع التونسي محمد عثمان الكوكي مدرب اهلي شندي السابق.
< وهذا امر اظنه يثبت تأثر جمال الوالي بصلاح ادريس ..وتقليده ..ومتابعة خطواته حتى وهو في نادي ولائي صغير مثل اهلي شندي.
< يعني المريخ الان بقلد في اهلي شندي.
< نذكر ان الهلال رغم النجاحات التى تحققت في المريخ من بعض المدربين ..إلا انه لم يسع قط للتعاقد مع مدرب نجح في المريخ او كان يدربه.
< نجح في المريخ كروجر واتوفيستر وحسام البدري ..ولم يخطر في بال أي هلالابي ان يدرب احد اولئك المدربين الهلال.
< في جانب اللاعبين ...الذين انتقلوا بعد (الشطب) من الهلال الي المريخ ..حدث ولا حرج.
< في اوقات كثيرة ..يوشك ان يكون فريق المريخ هو (تجمع رابطة قدامي لاعبي الهلال).
< قدماء لاعبي الهلال يا جماعة عندهم فرع في المريخ.
< سجل المريخ لاعب الهلال السابق مجاهد احمد محمد الذي انتقل للمريخ من نادي جزيرة الفيل بعد ان لعب موسمين في جزيرة الفيل.
< سجل المريخ مشاطيب الهلال اكرم الهادي سليم وعلاءالدين بابكر واحمد الباشا.
< سجلوا هيثم طمبل ..بعد رحلة احتراف فاشلة في جنوب افريقيا ..ولحقوا طمبل بـ (كلتشي) بعد انتهاء تعاقده مع الهلال.
< اذن كل (عضم) المريخ الحالي هو من نادي الهلال.
< وهذا يؤكد ان تجربة جمال الوالي في المريخ هى اعادة لتجارب انتهت صلاحيتها في الهلال.
< ذلك الامر يثبت ان المريخ فقط عبارة عن (ردة فعل) ...وهو يستفيد من حالة (الغبن)..والتعبئة التى تجيش عند بعض الخارجين من الهلال ..فيأتي بهم وهم في هذه الحالة ..فقط من اجل الاستفادة من حالتهم النفسية تلك في النزال والتنافس مع الهلال.
< اخر ملاحقات المريخ للهلال هو اتجاهم نحو كابتن الهلال هيثم مصطفى بعد (17) سنة لعبها مع الهلال.
< 17 سنة ...اختزلها المريخ ..وهيثم مصطفى ..وطوي بها صفحة جميلة في الهلال.
< الغريب في الامر ان عصام الحاج وقبل ان يكمل هيثم مصطفى 24 ساعة في المريخ ..قال ان هيثم صمطفى فيه شخصية القائد والرئيس ..وممكن في القريب العاجل يبقى رئيسا للمريخ.
< نحن هيثم معانا (17) سنة في الهلال ..ما قلنا كدا ..انت يا عصام الحاج (الامين العام لنادي المريخ) عاوز تبقى هيثم مصطفى رئيسا للمريخ بعد (24) ساعة في كشوفات المريخ.
< شفتوا اللعب بالعقول وصل وين؟..ولاحظتوا كيف يندهش المريخاب بالهلالاب ..ويمنحهم رئاسة المريخ بعد 24 ساعة فقط في المريخ.
< بالمناسبة المريخاب عندهم رئيس رايح.
< واحد استقال ..وواحد زعلان.
< أي زول بمشي للمريخ من الهلال ممكن يبقى رئيس.
< المرحوم حسن ابوالعائلة افضل رئيس في تاريخ المريخ ..وجمال الوالي (الهلالابي الاصل ) ابرز رئيس في تاريخ المريخ..وها هو هيثم مصطفى يرشح لرئاسة المريخ من قبل الامين العام لنادي المريخ.
< رئاسة عمر يوم واحد.
< والله عشنا وشفنا.
< ملاحقة المريخاب للهلالاب ..واحساسهم بالدونية تمثل حتى في ملاحقة واغراء بعض المشجعين وتحفيزهم من اجل الانسلاخ من الهلال والانضمام للمريخ.
< تابعنا قبل سنوات حكاية المشجع (لب)..الذي اغروه وحفزوه حتى انسلخ من الهلال وانضم للمريخ.
< وتابعنا قبل فترة قصية قصة (بطة) التى منحوها عشرين مليون جنيه ..عشان انضمت للمريخ وتركت تشجيع الهلال.
< عليكم الله في دونيه اكتر من كدا.
< الصغير يظل صغيرا ..والوصيف وصيفا.
< ملحوظة : والما عاوز يشوف ..ما يشوف.
هوامش
< عصام الحاج ..مشكلتو شنو مع جمال الوالي.
< الوالي يدفع ..وعصام الحاج يظهر في التلفزيونات.
< عصام الحاج عندما تحدث عن الراحل حسن ابوالعائلة ..قال هو افضل رئيس في تاريخ المريخ ..عصام الحاج ..قالها بصورة استبعد بها بشكل نهائي (جمال الوالي) من القائمة.
< الوالي يدفع بس.
< الحاج زيدان استقال.
< وفي الانتظار عبدالله حسن عيسي ومتوكل احمد علي واخرون.
< هسع مجلس المريخ يصبح مجلس غير (شرعي).
< حتى دي عاوزين تقلدونا فيها.
< قالوا في (اعتصامات) في نادي المريخ.
< وقت اقول ليكم ...الجماعة ديل بقلدوا فينا في الصاح والغلط ...ما بتصدقوني.
< كمان في (الاعتصام) لاحقننا.
< اكيد فاكرنو حاجة سمحة.
< يمكن يقولوا (الاعتصام) دا ..خطة جديدة من غارزيتو.
< ناس مامون ابوشيبة ديل أي حاجة بتحصل في الهلال بقولوا فيها (سر).
< فاكرين البطولات والانتصارات من الحاجات دي.
< بعد استقالة جمال الوالي ...مع (التقشف) الحكومي دا ..تاني إلا تقلدوا (اهلي شندي).
< الهلال مع تقشفكم دا ما بتقدروا عليه.
< التقليد بدأ من (الكوكي).
< انا مستغرب من حاجة.
< مستغرب ان جهاز الامن اوقف حامد تبيدي الذي يعمل في الجهاز من الكتابة في الصحف.
< واعتبر الجهاز ...ان الانتساب والعمل في الجهاز ..لا يتوافق مع العمل الرياضي.
< في نفس الوقت جهاز الامن الراعي الرسمي لفريق الخرطوم (الوطني) تدخل بصورة واضحة وكبيرة في تسجيلات الخرطوم.
< ما فهمت الحتة دي.
< حرام على تبيدي ..حلال على الجهاز.
< يا عصام الحاج ..عشان تكون عارف..شهر ديسمبر فضل فيه اسبوع.
< يعني جهز مرتب عصام الحضري من الان.
< احسن ليك اتصرفوا منذ الان ..قبل ما تتفأجوا بالشهر.
< 17 الف دولار ..عاوزة ليها حركة برضو.
< وبالمرة كدا ..يا ازهري وداعة الله ..شوف العداد حق الكهرباء ..معاكم.
< سمعت ..(تحت ..تحت) كهربتكم قربت تكمل.
< ما معقولة كل مرة تعملوا ليكم (نفرة) للكهرباء.
< الموضوع دا ما بصح.
< انتوا برضو (الوصيف) الشرعي للهلال.
< غايتو الكهربة لو كملت تاني في المريخ ...إلا جمال الوالي يسحب استقالتو.
< عصام الحاج دا ..غير الكلام ...ما عندو ليكم حاجة.
< تقشف شديد.
< تقشف حتى في الكهرباء.
< قالوا عصام الحاج ..زي الزول العندو 7 اولاد ممتحنين ..يدخل غرفة ..غرفة ..ويطفي في الانوار في نادي المريخ.
< يا ولد اطفي اللمبة.
< المروحة ذاتها قالوا بقى يشغلوها في 3.
< كهرباء مافي.
< كلموا الفادني دا ..خلوه يتبرع ليكم بي (كهرباء).
< محتاج ان اوضح ...ليس لي أي علاقة بي حساب في الفيس بوك باسمي.
< ما عندي حساب.
< علمت ان هناك حسابا في الفيس بوك باسمي ..ولزم منى هذا التوضيح والتحذير.
< عاجل : يا عصام الحاج ..(الكوكي) دا في تونس قالوا منتظر حق التذاكر ..كفاية قروش الفندق دفعها الاهلي شندي                                               

المريخ يخرج من سباق البرنس

لقاء كل يوم / رمضان أحمد السيد

سيدا ماركة مسجلة للهلال

التسجيلات بدات بالبرنس وتنتهي بهيثم مصطفى

عودة القائد.. ثم ماذا بعد؟؟

السيناريوهات الكاملة لقصة نجم استثنائى!

{ كل ما يدور حول برنس الكرة السودانية والهلال هيثم مصطفي يؤكد المكانة الكبيرة والنجومية الطاغية لهذا اللاعب غير العادي والاستثنائي الذي قضي 17 عاما في الملاعب بكل حيوية ونشاط ويمكن ان يقدم الكثير والمزيد!!!

{ والحديث عن هيثم مصطفي لا ينتهي ابدا وفي كل يوم او مع صباح كل يوم وان شئت قل في لقاء كل يوم تجد اخبارا جديدة وموضوعا جديدا وقصة جديدة!!

{ البداية مع البرير وجار زيتو والمشاكل والاستهداف والتوقعات او التلميحات هنا وهناك لقرارات البرير وجار زيتو يؤكدان بانه لا مكان للاعب ولا يمكن ان يعطي ويخدم الفريق في وقت يستعين به المدرب القومي مازدا لينقذ المنتخب الوطني امام اثيوبيا بالخرطوم.

{ وفي ذات الاتجاه وبعد ان شعر اللاعب بالمضايقات ونفد صبره اكد بان موعد حديثه قد اقترب وسيكشف الكثير والمثير مما هيأ الجميع لهذه اللحظة.

{ وبالفعل بعد تصريحات اللاعب الشهيرة تجاه المدرب ورئيس النادي، اصبح امر الكابتن هيثم مصطفي حديث المجالس واصبحت النغمة الجديدة هل سيتم شطبه، وماذا بعد الضغوط الجماهيرية الكبري.

{ الحق يقال ان تصريحات البرنس فعلت فعلتها فكان من الصعب لرئيس متهور علي حد قول احمد ادم ان يستحملها!!!

{ واللاعب يرفض كل تهديد ووعيد ويسخر من بعض الكتابات الاستفزازية هنا وهناك ويرفض وساطة المجلس المطالبة باعتزاله لتكريمه بدلا من شطبه، ولكن اللاعب يصر علي الاستمرار وعدم الاعتزال وانه قادر علي العطاء.

{ والمجلس في حيرة من امره والمدرب يشترط شطب البرنس قبل التوقيع علي العقد النهائي والتسجيلات تنطلق والايام تمر يوم ويومان وثلاثة والمدرب يعود من رحلته القصيرة من اديس ابابا ويعلن غضبه لعدم تنفيذ قراره وكلها في النهاية سيناريو لاخراج عملية الشطب والتاكيد علي انها فنية ويأتي الشطب!!! وتقوم الدنيا ولا تقعد وتبدأ الاعتصامات وتتواصل!!!!!

{ وهنا تأتي الاخبار بعدم اكتمال الشطب ما لم تسدد استحقاقات اللاعب والبالغة سبعمائة مليون جنيه ويتضح ان اللاعب استلم منها نصف المبلغ وهكذا بين شد وجذب وما يمكن ان يفعله المجلس واللاعب وموقف اتحاد الكرة تأتي التاكيدات بان اللاعب وبعد قرار الشطب انه وعلي نحو ما انفردت وتميزت قوون سيظهر تلفزيونيا ويكشف الكثير والمثير فكانت لحظات ترقب ليري الجميع ما يمكن ان يحدث.

{ وياتي اللاعب بتأكيدات جديدة في هجومه علي رئيس النادي والمدرب والتأكيد علي حقوقه والمطالبة بها!! بعدها وبعد ترقب وانتظار لقرار لجنة اللاعبين غير الهواة وبعد انتظار وترقب تقر بالمبلغ وتعلن عدم شرعية شطب اللاعب ما لم يستلم حقوقه وقبل ان تمر ساعات علي القرار يسرع البرير ويوفي بالمبلغ مائة وخمسون كاش وشيكان بواقع مائة مليون كل شهر وقبل بها الاتحاد واعلن شرعية شطب اللاعب!! ليبدأ موال جديد ومع ايقاع ثورة الغضب والاعتصام وجمعة الرحيل ينشط الاخوة المريخاب ويعلن البعض عن رغبتهم في ضم البرنس وزميله علاء الدين وتتحول الانظار وتتصاعد الازمة من جديد من مؤيد ورافض وبين حائر وغير مصدق من الاهلة.

{ ومع كل هذه السيناريوهات والاحداث هناك تصعيد من المعارضة وطعن في صحة قرار الشطب علي اساس ان المجلس غير شرعي وقبل ان يقرر المريخ موقفه ومدي موافقة الثنائي في التوقيع له ياتي قرار لجنة الاستئنافات بقبول الطعن وان المجلس غير شرعي وبالتالي شطب اللاعبين هيثم وفييرا غير شرعي.

{ وبعدها يجتمع او اثنائها يجتمع مجلس المريخ ويقرر صرف النظر نهائيا عن تسجيل الثنائي!!!

{ والمجلس الهلالي يستمر في عمله ونشاطه ولا يبالي بما حدث وفي ذات اللحظة تحرك واحضر اللاعب عمر بخيت لمكاتب الاتحاد وجدد له ليستمر لاعبا مع الهلال!

{ والكرة الان في ملعب المفوضية وكيفية تنفيذ القرار هل يحل مجلس الهلال؟؟ هل يعتبر اللاعبان البرنس وفييرا مقيدين في كشوفات الهلال!! ظهرت نغمة القرار الفني!!

{ ونسب لرئيس لجنة التسجيلات انه حتي ولو لم يعتمد شطب النجمين فان اللوائح تقول بانهما لن يعودا لكشوفات الهلال الا في الفترة التكميلية!!!

{ وقرار لجنة الاستئنافات عقد الامور اكثر هل يمكن للاعبين ان يسجلا باي ناد اخر او يحترفان خارجيا!!؟

{ من الواضح في النهاية ان ازمة شطب البرنس ستتواصل وستكون الامور اكثر تعقيدا وسيكون موقف الهلال ومجلسه صعبا وحرجا في المرحلة القادمة حتي ولو استمر.

{ مشاكل لا حصر لها ستظهر خاصة مع ظهور المدرب وغضب الجماهير منه وكذا مجلس الادارة الذي ضرب بعرض الحائط كل المناشدات والمطالب بعدم شطب القائد، وان هذه الطريقة لا تتناسب مع كباتن الهلال ودونكم البرنس الذي قضي 17 عاما في الهلال.

لحن الختام:

{ روج المريخاب وملاوا الدنيا ضجيجا واكدوا بانهم اقتربوا من البرنس وفييرا ولكن اتضح في النهاية ان ثنائى الهلال لا يمكن الوصول اليه!! سواء اكانت الاسباب مالية او اختلاف في وجهات النظر او احراج للبعض او.. او.. او.

{ وفي النهاية يبقي البرنس هيثم مصطفي ماركة مسجلة للهلال ولا شيء غير الهلال!!!

{ اما حكاية الاحترافية وركل الانتماءات جانبا وغيرها كلها تنطبق علي كل اللاعبين في العالم حتي ميسي الاصلي ورونالدو ولكن البرنس حالة خاصة.

{ بتوضيحه ومداخلته هل يريد ان يقول سكرتير الاتحاد بان قرار شطب البرنس وفييرا نافذ ام ماذا؟؟

{ وبرضو علي طريقة مجلس الهلال الذي اراد ان يمرر رئيسه اجندته القرار فني!!!

{ لا احد يفهم شيئا.

{ جولة جديدة والازمة المتصاعدة وحقا التغطية مستمرة!!!!                                                                                

وارغو ..القعاد في (الكنبة) ما عاوز ليه (لياقة)

وان طال السفر - محمد عبد الماجد                                    

< لا اعرف ...كم اكمل وارغو من السنوات في كشف المريخ ...(نسيت الحكاية دي).
< بمناسبة (النسيان) دا.
< واحد مشي يصيد ليه سمك...اول ما رمى سنارته ..نسي الموضوع.
< قعد يقول : يا ربي انا رامي (السنارة) في البحر دا ليه؟.
< اكون عاوز اكوي ...لكن البكوي ..ما برمي ليه (سنارة).
< عاوز اكتب ....البكتب برمي سنارتو؟!!.
< اخر حاجة طلعت ليه (سمكة) من البحر ..وقالت ليه : عاوز تصيد سمك..ما معقول تكون نساي كدا.
< موضوع (النسيان) دا ..هسع فيه حاجة.
< بتتعارض مع أي زول يا جماعة.
< عشان ما تلخبطوا لينا ساكت.
< نرجع لي وارغو.
< وارغو لعب كم سنة في المريخ ...قلت ليكم (نسيت).
< بتلخبط مرات ...اقدم فيصل العجب في المريخ وإلا اقدم وارغو؟.
< غايتو وارغو اقدم في (الكنبة).
< والشيء المتأكد منو هو ان وارغو اقدم محترف في المريخ.
< الزول دا جاء المريخ (قاصر) ..هسع وارغو دا في المريخ اوشك من ان يصبح مساعد مدرب.
< بقى زي فاروق جبرة.
< الموضوع دا فيه حاجة يا جماعة.
< وارغو قدّم عديل في المريخ والي الان لم يصبح وارغو (اساسيا) في فريق المريخ.
< يا وارغو...اسمعنا.
< امشي معاي خطوة ..خطوة.
< انت قعادك القعدت في المريخ دا ..لو قعدت في فرقة عقد الجلاد ..كان هسع بقيت (عضو).
< كنت بقيت اخضر من (انور عبدالرحمن).
< اقول ليك حاجة اسهل من دي.
< لو مشيت خشيت اتحاد المهن الموسيقية يوم ان اتيت للسودان بدل توقيعك في المريخ ..كان هسع بقيت (محمد الامين) عديل كدا.
< كان بقيت رئيس الاتحاد ...كنت جهجهت (حمد الريح).
< وارغو دا قالوا في جواز سفرو مكتوب المهنة : (احتياطي)...السكن : (الكنبة) جنوب يس حارس المرمي.
< يس دا وين؟.
< الاسم دا انا سمعت بيه قبل كدا.
< الذي يحدث لوارغو الان ..يخلينا نرجع ..ونشوف حكاية اللاعب دا شنو؟.
< بطقطق ليكم الموضوع.
< عندما اراد فريق المريخ ان يسجل (وارغو)...ناس المريخ (الاعلام السالب) سخن الحكاية ..وقالوا الاهلي المصري دخل طرف في المفاوضات.
< الاعلام السالب دي فيها حاجة يا جماعة.
< سالب وسالب وسالب.
< كمان نحن بنلعب.
< وارغو هو صاحب اعلي نسبة اهداف في بطولة الاندية الافريقية الي الان ..صاحب الرقم القياسي ..فقد سجل وارغو (13) هدفا في بطولة الاندية الافريقية عندما كان يلعب في اينمبا ..وجاء للمريخ وهو هداف للبطولة الافريقية.
< طيب الزول دا حصل ليه شنو؟.
< مالو؟.
< في زول زعلو؟.
< ديل يكوّنوا ناس الهلال ..اصلو اللاعب (البتلحوه) ناس الهلال ديل في (السجانة) ما بنفع.
< السجانة دي فيها حاجة يا جماعة.
< لاعب في البطولة الافريقية سجل 13 هدفا ...جاء للمريخ وسجل هدفين فقط في اول مواسمه مع المريخ.
< تقول جابوه المريخ (مصور).
< تقول (منتج).
< اول هدف سجلو وارغو كان في (الشجرة)...في مباراة ودية ...المريخاب احتفلوا بالحكاية دي وعملوا ليهم (سماية) للهدف دا.
< الهدف الرسمي - سجلو وارغو في اتحاد مدني ..هدف جاري بيه من النص ..تقول (ممنوعات).
< هسع اتحاد مدني في الممتاز مافي.
< وارغو وقت جاب الهدف دا ...ما صدق ..اصيب بحالة هيسترية ..وبقى زي (الشافع) البجي جاري من الموقف قبل الناس ويقول ليك ناس ابوي وصلوا.
< وصلوا من وين ما تسألوني؟.
< ما بحب الاسئلة الكتيرة.
< عندنا زول (تليح).
< النوع الما بفتح ليك إلا بي (دو).
< تفك ليه (قطر) ..ما بفتح.
< تفك ليه (دو)...بجرك خمسين.
< زول (تليح).
< الزول دا ان قعد معاك في (صينية) واحدة ..بعذبك عذاب ...ببقي ليك زي
حكم الراية في أي حاجة رافع رايتو.
< يمشي على السلطة يرفع ليه (عجورة)....طوالي (بقشطك) بي سؤال : انت العجور دا جايبو من وين؟...وعشان يطعّم السؤال ..بقول ليك : والله (عجوركم) دا طاعم خلاص.
< يا ود الناس ..العجور ..ما كلو عجور ...يعني عاوز تقنعنا انو (العجور) دا جاء من سلالة (الموز).
< مشي عليك الله ..ما تقيف لينا في (العجور).
< يرفع ليه (بنجراياي)....يخلي أي حاجة ..ويقول ليك ..اسمع (البنجر) دا من السوق المركزي.
< يعني كيف من السوق المركزي.
< مالك انت عاوز تجيب لينا (الطوحال) في الرباط الصليبي.
< لزوم (الفلهمة) ...العجور من السوق المركزي الخرطوم ...البنجر من السوق المركزي الخرطوم بحري ..والجرجير الشايفو قدامك دا من سوق ام درمان ..اما البصل الابيض دا تصور جايبنو من شندي.
< هسع (الجرجير) ذنبو شنو؟.
< دي سلطة ..وإلا برلمان ..المشكلة بالشكل دا.
< الحتة دي فيها حاجة يا جماعة.
< ويا ريت بعد كدا الزول (اللديح) دا بكتفى بالاسئلة دي.
< والله تقول ممتحن (ادبي).
< تقول مع امتحانو ادبي ..شايل (احياء).
< بقعد (يصنقر) ليك كدا في الاسئلة ..زي الشافع الجديد في الخرطوم ..يسألك من أي حاجة.
< انت يا عمو ساعتك دي سويسرية؟.
< يا عمو ..انا شايفك قبل كدا في حدايق السلام.
< اها الزول اللديح دا كان قاعد في الصينية ..بسأل كدا.
< بصنقع صنقيع للاسئلة.
< يمشي على (البامية)...طوالي (يطقك) بي سؤال.
< البامية دي (مفروكة).
< لا يا ود الناس ...البامية دي (شهادة عربية).
< هسع الكلام دا ..دخلو شنو بي (وارغو).
< سيب العجور ..سيب البنجر ..سيب البامية المفروكة ذاتها ..وكمل لينا حكاية (وارغو) دا.
< ما تبقي زي الزول الشايل ليه مجموعة مفاتيح ...يركب مفتاح مفتاح في الباب ...والباب ما يفتح.
< اخر مفتاح ..يطلع هو مفتاح الباب.
< بعد روحك ما تطلع.
< حاجة تغيظ ..حتى (المفاتيح) بتتعلم الغتاتة.
< نرجع لي (وارغو).
< وارغو دا وقت جاء للمريخ ...ناس المريخ ..قالوا خطفوه من الاهلي المصري.
< فرحانين شديد.
< زي كراسي الحفلة.
< دي فيها حاجة غلط.
< جابوه ..طوالي عملوا ليه مؤتمر صحفي ..وشركات راعية ...وحفلة شاي ..وسيرة ..وحنة.
< نحن شفنا الحكاية كدا.
< الحكاية كبرت اوي.
< قلنا الله يستر علي ناس (ريتشارد).
< ريتشارد الوقت داك كان بيلعب في الهلال.
< شلنا هم على ناس (مرق).
< ناس بابكر سلك ..شافوا الاحتفالات ...قاموا (خبّزوا).
< خبزوا طوالي ...ولا كضبوا.
< قلت ليكم الموضوع وسع اوي.
< بعد المؤتمر الصحفي ...عينك ما تشوف إلا النور.
< وارغو طلع كلام ساكت.
< حصل شنو؟..ما تسألوني.
< الزول دا مالو ..ما تسألوني.
< ناس سلك (الخبيز) العملوه داك ...ما عرفوا يعملوا بيه شنو؟.
< اخر حاجة ..وارغو جاب ليه هدف في الشجرة.
< ناس سلك استغلوا الموقف ...طوالي وزعوا خبيزهم.
< طلعوا (الخبيز)..قالوا الظروف ما معروفة ..الخبيز دا بقوم (يعتت) احسن نلحق ونوزعو في الهدف الذي سجله وارغو في الشجرة.
< يمكن تاني ما نشوف لينا هدف.
< الموسم الاول ....وارغو سجل هدفين فقط.
< تاني ما عمل أي حاجة.
< الموسم التاني ..بنشوفو يسخن كدا ..ويقوم ويقعد ...وناس مزمل ابوالقاسم يكتبوا.
< والله تسخينتو ما ساهلة.
< والله قعدتو في الكنبة ..قعدة لاعب كبير.
< بين الشوطين في الاستراحة ..وارغو دا عمل ليه حركة ...لاعب عادي ما بعملها.
< ديل ناس مزمل.
< عليكم الله هسع انا عاوز اسألكم سؤال ..وارغو القاعد في (كنبتكم) السنة كلها فرقو شنو من فلانتاين القاعد في بيتو.
< والله خسارة كنبة ساكت.
< الغريبة ..وارغو بتمرن ..وبتدرب ..وملتزم بالتمارين ..وبصرح في الجرايد وبقعد كنبة.
< يا وارغو ..(الكنبة) ما عاوزة ليها تعب ...الحاجات البتعمل فيها دي ما حاجات (كنبة).
< الكنبة ما عاوزة ليها لياقة ...ما تتعب في الفاضي ساكت.
< وانتوا يا ناس المريخ ما تشربوه عصاير ..ولا تجيبوا ليه فراخ.
< الكنبة دي (موية الفول) كتيرة عليها.
< ويا جمال الوالي ...عليك الله في داعي تصرف ليك مرتب 10 الف دولار في الازمة الاقتصادية دي في لاعب قاعد كنبة.
< انا قلت حاجة غلط يا جماعة.
< عشرة الف دولار في الشهر ..تقعد الزول في (اكسفورد)...تجوا انتوا تقعدوا بيها (وارغو) في الكنبة.
< بنك وقاعد في الكنبة.
< غايتو زول مرتاح في الدنيا زي وارغو دا عمري انا ما شفتو.
< قعاد ..وعشرة الف دولار.
< ناس سادومبا ..يجروا السنة كلها ..وما لاقين نص الدولارات البيدوك ليها دي.
< والله سادومبا مسكين عديل كدا.
< وارغو لقى الراحات في (الكنبة)...بقوا كل ما يجبوا ليه (عرض خارجي)..يرفض العرض.
< زول لاقي (الكنبات) المكندشة دي ..مالو ومال التعب.
< لكن مفروض وارغو دا يعمل ليه مشروع استثماري في كنبتو دي.
< احسن ليه ...من يقعد كدا.
< ملحوظة : طبعا ما جبت ليكم أي سيرة للمطر.
هوامش
< في مباراة الجمعة ...امام الاهلي شندي ..ان شاءالله الهلال يعود الي مستواه المعروف.
< وان شاءالله يطلع لينا من حتة (التعادلات) دي.
< أي تعادل تاني ...بعمل مضاعفات خطيرة.
< يا ناس الهلال التسجيلات باقي ليه اقل من شهرين.
< صلحوا الدفاع والاطراف.
< كل مرة الهلال يدخل التسجيلات وفيه خلل في الدفاع والاطراف ..ويسجل مهاجمين ولاعبي وسط.
< هسع الناس كلها عارفة في مشاكل في الدفاع ..برضو يمشوا يسجلوا ليهم مهاجمين.
< لو الهلال كان فيه اطراف ...كان هسع الفرق بين الهلال والمريخ في أي بطولة بكون 12 نقطة.
< في حاجة لفلانتاين...لماذا لا يحل مجلس ادارة نادي الهلال مشكلة فلانتاين؟.
< كان يمكن ان يبعث الهلال مندوبا الي نيجيريا ..عشان يشوف مشكلة اللاعب دا ..ويمنحه حقوقه كاملة ..عسي ولعل تحل مشكلة الطرف الشمال في الهلال.
< دور الاربعة ..والنهائي في الكونفدرالية الهلال سوف يكون في حاجة لفلانتاين.
< خاصة وان فلانتاين في نيجيريا مواصل تمارينه.
< اضف الي ذلك ان فلانتاين يمكن ان ينقذ الهلال بعد الاصابات التى تعرض لها معظم لاعبي الهلال.
< هل فشل مجلس ادارة نادي الهلال في حل اشكالية فلانتاين؟.
< الموضوع دا يا البرير ما عاوز ليه (مبادرة رئاسية).
< الموضوع في منتهى السهولة.
< الجماعة ديل لا بحلوا ..ولا بدفعوا.
< عاجل : لو جبت ليكم سيرة (المطرة) كان تعبتوا معاي.                      

يا ناس المريخ لو دي كورتكم ...اخير (تعادلاتنا)

وان طال السفر - محمد عبد الماجد            

                       
< في بدايات الربيع العربي وبعد ان هرب (زين العابدين بن علي) وزوجته ليلي الطرابلسي...كانت الثورة التونسية تلقي بظلالها على مصر والشعب المصري.
< لكن كان كل المراقبين ...واهل الحكم (المباركي) في مصر ..كلهم كانوا يقولون ...(مصر ليست تونس).
< منتهى العبقرية ..منتهى التحليل.
< تنحي مبارك وسقط حكمه بعد ان استبدل حكومته مرة ..فما اجدي التبديل شيئا.
< 18 يوم زلزلت حكم محمد حسني مبارك ..وتنحى الرجل بعد خطيب شهير القاه للشعب المصري نائبه في ذلك الوقت عمر سليمان.
< وجاء الدور على ليبيا بعد مصر.
< لكن معمر القذافي .كان يخرج من (خرابته) في باب العزيزية ...ساخرا وضاحكا.
< وكان يقول في كل خطاباته ..(ليبيا ليست تونس ولا مصر).
< لكن ليبيا سرعان ما تسقط ...بعد هروب زين العابدين بن علي وتنحي مبارك.
< قتل معمر القذافي ودفع الثمن غاليا حينما قال ان ليبيا ليست تونس ولا مصر.
< ما حدث في تونس ومصر وليبيا ..جاء وحدث في اليمن ..وقبل ذلك كان علي عبدالله صالح يقول اليمن ليست تونس ولا مصر ..ولا ليبيا.
< تنحى علي عبدالله صالح ..ونجحت الثورة اليمنية في ان تخرج علي عبدالله صالح من قصره.
< ما حدث في تونس ومصر وليبيا واليمن..يوشك ان يحدث الان في سوريا.
< والرئيس السوري بشار الاسد يقول ان سوريا ليست تونس ولا مصر ولا ليبيا ولا اليمن.
< ان الاسطوانة الثورية كانت مدورة في المنطقة العربية على ذلك النحو : (مصر ليست تونس ، ليبيا ليست تونس ولا مصر ، اليمن ليست تونس ولا مصر ولا ليبيا ، الجزائر ليست تونس ولا مصر ولا ليبيا ولا اليمن ، الاردن ليس تونس ولا مصر وليبيا واليمن ، سوريا ليست تونس ولا مصر ولا ليبيا ولا اليمن ولا الاردن ).
< الايامات اثبتت ان مصر مثل تونس ..وان ليبيا مثل مصر ...واليمن مثل ليبيا.
< وهلم جرا.
< بنفس هذا الفهم ..الامور في الهلال في الايام الاخيرة كانت تمضي على ذلك النحو.
< نفس الصورة.
< لكن هناك الصورة كانت سياسية ..والصورة في الهلال رياضية.
< الهلال اتعادل مع المريخ..فرحنا بهذه التعادل ...ليس لأن التعادل مكسب على المريخ.
< ولا لأن المريخ فريق كبير ...اذا لعبت امام المريخ يجب ان يكون هدفك الاول والاخير هو الانتصار.
< أي نتيجة غير الانتصار امام المريخ ..لا تفرح الهلالاب ..على هذا تعودوا الهلالاب ..وشبوا على ذلك الخلق.
< لكن التعادل الذي كان في قمة الممتاز هو كان تعادل مفرح للهلالاب ...لأن الهلال دخل المباراة في ظروف حرجة.
< فقدنا هيثم مصطفى بسبب عدم الجاهزية ...(حسب كلام غارزيتو).
< وفقدنا عمر بخيت الذي كان افضل لاعب في الهلال في الفترة الاخيرة في تمرين المباراء الرئيسي ..وابعد عن تشكيلة الفريق.
< وفقدنا سادومبا في (التسخينة).
< دي تسخينة شنو يا سادومبا.
< وقبل سادومبا ...كان علاءالدين يوسف مبعد بسبب الاصابة ..لذلك كان (التعادل) في مباراة قمة الممتاز مكسب للهلال.
< لا سيما وان التعادل ابقى الفارق بين الهلال والمريخ كما كان عليه قبل المباراة.
< الفارق 6 نقاط باعتبار ان المريخ يمكن ان ينتصر على الاندية التى سوف يقابلها.
< اذن كان قبولنا بالتعادل امام المريخ ..قبول منطقي ومفرح.
< جينا نلعب امام الخرطوم في استادنا...والكورة كانت شبه مضمونة.
< الناس حذروا من فريق الخرطوم الذي خسر من المريخ بسباعية.
< لكن ناس الهلال دائرة الكورة تحديدا قالوا لينا الخرطوم ليست المريخ.
< للاسف الشديد النتيجة التى خرج بها الهلال امام المريخ ...جاء وخرج بها امام الخرطوم.
< اتعادلنا امام المريخ ..وجينا واتعادلنا امام الخرطوم.
< وقعدنا هسع نحسب في تلك الحسابات المعقدة.
< و..و...و..
< و ..( مصر ليست تونس ، ليبيا ليست تونس ولا مصر ، اليمن ليست تونس ولامصر ولا ليبيا ، الجزائر ليست تونس ولا مصر ولا ليبيا ولا اليمن ، الاردن ليس تونس ولا مصر وليبيا واليمن ، سوريا ليست تونس ولا مصر ولا ليبيا ولا اليمن ولا الاردن).
< اعود واقول ان التعادل مع المريخ منطقيا لأن هذا التعادل مثلما افقد الهلال نقطتين ..هو افقد المريخ ايضا نقطتين ، وهو المنافس الاول للهلال في الممتاز.
< عشان كدا ما في خسارة كبيرة.
< تعادل الهلال والمريخ ابقى الفارق 6 نقاط بين الهلال والمريخ.
< تعادل الهلال والخرطوم ابقى الفارق بين الهلال والمريخ 4 انقاط ..من هنا كان التعادل امام الخرطوم مرا ..ومخيفا.
< الناس قالوا الله يستر من الامل.
< ناس الهلال في الحتات دي ما بقصروا..طوالوا نطوا لينا ..وقالوا : الامل ليست الخرطوم.
< طيب يا فالحين ..نعيش ونشوف.
< النتيجة التعادل التى كانت بين فريق الهلال والخرطوم ....جات واطبقت بين الهلال والامل.
< انتوا ما قلتوا الامل ليس الخرطوم.
< و..و..و...
< و... ( مصر ليست تونس ، ليبيا ليست تونس ولا مصر ، اليمن ليست تونس ولا مصر ولا ليبيا ، الجزائر ليست تونس ولا مصر ولا ليبيا ولا اليمن ، الاردن ليس تونس ولا مصر وليبيا واليمن ، سوريا ليست تونس ولا مصر ولا ليبيا ولا اليمن ولا الاردن).
< غايتو يا غارزيتو تعادلاتك بقت اكتر من تصريحاتك.
< بل اصبحت اكتر من مشاكلك.
< هسع الهلال في الكونفدرالية سوف يواجه الجمعة القادمة ان شاءالله فريق الاهلي شندي.
< ونحن من هسع خايفين ...واحد يطلع لينا ويقول لينا الاهلي شندي ليس الامل عطبرة.
< ونحن بنشيل ونصدق.
< اوعكم من (تعادل) تاني.
< بل اوعكم من (تعادل) رابع.
< التعادلات دي بقت تعمل لينا (طمام) عديل كدا ..بتعمل لينا لفة رأس ..ودوشة.
< اخير لينا نتهزم عديل كدا من نتعادل.
< كرهنا التعادلات مرة واحدة.
< الموضوع دا بذكرني ليك بحكاية زول جاء الخرطوم.
< اهلو قابلوا ليك في الميناء البري ...(لفحوا) ليك مع المغارب...زول شافهم مافي.
< كمان يقوم يعمل ليهم فضيحة ساكت.
< مشي نزل مع اهلو في المنشية.
< الاجواء في العاصمة عجبتو ليك ..زلوكم جاء الخرطوم اسمو (مختار)..اليوم والتاني بقوا يقولوا ليه مستر مختار.
< وهو شاف (المسترة) دي عجبتو ليك الاوضاع ..دخل ليك في الدور للاخر.
< زولكم بقى ولا (محمود يس).
< دخل في الدور لي اضنينو.
< الساعة خمسة بشيل (الجك) وينظر سيد اللبن في الباب.
< خلاص فتح ...الخرطوم نفعت معاه.
< الساعة سبعة بخت ليك الموبايل في الشاحن.
< مستر مختار بقى زول منظم ..وخطير ..ما فاضل ليه بس إلا يتكلم انجليزي.
< بس دا الفاضل ليه.
< مستر مختار الاسبوع الاول ما فاهم أي حاجة في (الصينية).
< الحاجة البجيبوها ليه في الفطور والغداء والعشاء ..بضربها ليك.
< ما بسأل.
< الاسبوع التاني فتح شوية ..عرف ليك الحكاية فيها (فراخ).
< التونة الكان بشوفها في التلفزيون ..بقوا يجبوها ليه في الصينية.
< زولكم ضرب ليك (التونة) كدا ..وقال لي خالو ..انت يا خال (التونة) دي موش بجيبوا معاه في التلفزيون (افراح عصام).
< وين افراح...والله ما شايف لي أي (فرحة) مع تونتكم دي.
< الكلام دا قالوا في الاسبوع الثالث ..بعد ما بقى يعلق على الاشياء ..ويثرثر في الصينية.
< الاسبوع الرابع ...صاحبكم لاحظ ان (الفرخة) ثابتة في الصينية.
< في الفطور ..(فرخة)..في الغداء ..(فرخة)...في العشاء ..(فرخة).
< اول حاجة كان مبسوط من الموضوع دا.
< الاسبوع الخامس ..كره ليك حاجة اسمها (فراخ).
< خلاص نفسو مرقت من الفراخ.
< بقى من يشوف ليه (فرخة) في الصينية ...يرفع ايدو من الصينية.
< الاسبوع السادس مستر مختار ..قرر يرجع البلد.
< زولكم مشي البلد ..امو حسب فرحتها بيه ..قبضت (الديك) من قفصو وحمرتو ليه.
< زولكم قاعد في الغداء ..نفسو في عصيدة او كسرة ..او أي حاجة بلدية كدا..شاف ليك (الديك) محمر في الصينية.
< طوالي رفع ايدو من الصينية ..وقال لي امو ..والله نحن (الفراخ) دي في الخرطوم كرهناها عديل كدا – الفراخ الاكلتها في الخرطوم تعمل ليها مزرعة دواجن.
< عشان كدا يا حاجة (الديك) دا شيلي لو فيه شوية روح ..دخلي (القفص)..لو كمان ما فيه رجا دخليه التلاجة.
< لو اتحرك ساكت دخليه القفص.
< يا غارزيتو ..هسع نحن بي نفس النظرية دي ...كرهنا (التعادلات).
< كرهناها عديل كدا ..بقت لينا زي (الفراخ).
< موش الزول وقت يتقل في (اللحوم) بشتهي (الفول).
< ملحوظة : انتوا يا ناس الهلال يعملوا ليكم شنو؟...يجبيوا ليكم (اللحوم) تقولوا عاوزين (الفول).
هوامش
< تبقى شهرين لانتهاء الموسم.
< خلاصة الموسم الرياضي في هذين الشهرين ...الممتاز وكأس السودان والكونفدرالية.
< وهذه البطولات تحتاج الي دعم خاص ...ومساندة قوية.
< 60 يوم ..يجب ان يدعم فيها الامين البرير كل الدعم من كل الهلالاب.
< مطلوب من الجماهير ومن اقطاب الهلال دعم الهلال في الفترة المقبلة بل في هذه الفترة.
< ادعموا المجلس وساندوه.
< ادعموا الجهاز الفني بقيادة غارزيتو ..وقدموا له كل احتياجاته ...حتى نحقق كل البطولات.
< الفترة القادمة هي لا فترة صراع ..ولا فترة مشاكل.
< فترة نريدها خالصة للهلال.
< الهلال في الفترة الحالية يحتاج الي جماهير اكتر.
< مطلوب من طه علي البشير ومن اشرف الكاردينال وان اختلف مع البرير ان يدعموا الهلال في هذه الفترة.
< ما ترفعوا يدكم من الهلال.
< حكماء الهلال كلهم يجبوا ان يلتفوا حول الهلال في هذا التوقيت.
< ميرغني ادريس قادر على جمع شمل الهلال.
< كل الناس فى هذا التوقيت يجب ان يكونوا مع الهلال.
< وإلا سوف تدفعوا تمنا غاليا.
< روابط الهلال وجماهيره ..يجب ان تكون حاضرة في الموقف القادم ..من اجل الدعم والمساندة.
< الدعم والمساندة فقط.
< اما الانتقادات التى يوجه الاعلام الرياضي للفريق تبقى ضرورية اذا كنتم تريدون ان يفوز الهلال بالبطولات.
< يبقى من الضرورة ألا تأثير هذه الكتابات في وقفة الجماهير ومساندتها لفريقها.
< الهلال يحتاج الي اجواء صحية ..واجواء فيها مودة ومحبة ليذهب الي الامام.
< فريق المريخ ..ماشي تحت الحيط.
< المريخ الذي نشاهده الان هو الاضعف على الاطلاق.
< المريخ ماشي بي مشاكل الهلال.
< المستوى الذي ظهر به المريخ امام الاهلي مدني ..يخلينا نقول اخير لينا تعادلاتنا دي بي مرارتها من ان يخدمنا الحكم او يساعدنا في الخروج بالنقاط الثلاث للمباراة.
< الحكم في مدني قالوا قدموا (النقاط الثلاث) للمريخ في طبق من فضة.
< عصام الحضري يواصل في كل المباريات استفزازه للجمهور.
< في استاد الهلال استفز جمهور الهلال.
< في شندي استفز جمهور الاهلي.
< وفي مدني استفز جمهور اهلي مدنى.
< لذلك كل مباريات المريخ اصبح فيها شغب ..وحجار.
< الاتحاد العام يجب ان يحسم موضوع عصام الحضري.
< اتمني ألا اشاهد نصر الدين الشغيل في المنتخب.
< هذا رغم غياب عمر بخيت ونزار حامد.
< لكن مع هذا ..الشغيل يجب ألا يختار مع المنتخب.
< في ظل وجود عصام الحضري في المريخ اصبح اكرم الهادي سليم هو الحارس الخامس في المريخ.
< طبعا الحضري لغى ليك حكاية الحارس التاني والحارس الثالث دي نهائي.
< شالها ليك برة.
< عشان كدا اكرم الهادي سليم اصبح الحارس الخامس.
< يا اكرم كدا جرب العب صانع العاب.
< يمكن تقدر تنافس ناس فيصل العجب ووارغو وفيصل موسي.
< لكن الحضري دا ما بتقدر تنافسو.
< مع ان الحضري ..بمسك الكورة ويفكها جوة.
< الكبر حصل.
< موسي الزومة هل هو اول لاعب سوف يشطب في ديسمبر القادم.
< غايتو يا ليما ..انت موسي الزومة دا فايتو بس بي انو ريكاردو قريبك.
< لو ريكاردو ما قريبك ..يا ليما في الكشافات ما بتقعد ..خلى (الكنبة).
< يا موسي الزومة ...خلي فاروق جبرة يصلح ليك اللعب ...وقت الحكاية بقت (قرابة) ساكت.
< من المدربين الشاطرين ....والذين لا حس ولا خبر لهم في الصحف مدرب اهلي مدني عمر ملكية.
< عمر ملكية مدرب شغال بدون تصريحات ...وهو في ذلك يختلف تماما عن محمد الطيب مدرب فريق الامل.
< نجاحات عمر ملكية مبنية على مجهوده الفني ...بدون (اضواء) وصخب اعلامي واعلاني.
< لذلك يجب ان يتم تكريم عمر ملكية فهو قد قدم في هدوء فريق محترم ..صاحب اداء رائع وممتع.
< الاتحاد العام يجب ان يحفظ عمر ملكية ..ويجب ان يبحث له عن فرص كورسيات خارجية.
< امثال عمر ملكية يجب ان يجدوا الدعم والسند من الجميع.
< خاصة ان عمر ملكية (مستقل) بعيدا عن الهلال والمريخ.
< وهذا شيء لوحده يجعل الناس تدعمه اكثر.
< يستحق عمر ملكية ان يكون افضل مدرب وطني في هذا الموسم.
< بل ان عمر ملكية يمكن ان ينافس المدربين الاجانب.
< عمر ملكية ما زي محمد الطيب ..شال ليه (نقطة) من الهلال وملأ الصحف كلها كلام وتصريحات.
< نقطة واحدة وعمل كدا.
< طبعا (النقطة) دي محمد الطيب بكون عذب بيها ناس عطبرة عذاب.
< المعروف ان محمد الطيب نال اكبر خسائر من امام الهلال والمريخ.
< لكن مع ذلك محمد الطيب بنتظر يشيل ليه (نقطة) من الهلال او المريخ
وبقوم يملأ الجرايد بي نقطتو دي.
< نقطة بعمل كدا.
< لو شال النقاط التلات بعمل شنو؟.
< يا ناس عطبرة ..استحملوا ساكت.
< والله (نقطتكم) دي ح تندموا عليها عديل كدا.
< الي الهلال.
< كل الهلالاب ..يحتاج لكم الهلال الان اكثر.
< عاجل : سا سا سا ...عبده جابر ..نحن فترنا من (السوسنة) دي يا سادومبا.

البرنس حلّوا مشكلتو بـ(قرار جمهوري) وشارك في المباراة بـ(قرار جماهيري)

وان طال السفر - محمد عبد الماجد                                                            

موسى الزومة بعد هدف بشه قعد يغني (اغالط نفسي بي اصرار واقول يمكن انا الما جيت)
• لا اريد ان اتحدث بصورة موسعة عن مباراة الامس التى لعبت بين الهلالوالخرطوم الوطني ..خشية من توسيع الفارق...لكن مع ذلك لا بد من الوقوف عند بعض النقاط.
• يبدو ان الموضوع سوف يفلت مني جبرا.
• واضح ان قضية هيثم مصطفى حفظه الله ورعاه مازالت قيد الصراع...ومازالت تلقي بظلالها على الهلال كله.
• لا اريد ان اتطرق لهذا الموضوع بشكل تفصيلي ...غير اني اقول ان هيثم مصطفى عندما شارك في اخر 20 دقيقة مع المنتخب السوداني الذي كان يباري المنتخب الاثيوبي وكانت نتيجة المباراة تعادلية استطاع ان يجعل المنتخب السوداني يتقدم 5 -3.
• وقد ارتكب دفاع المنتخب الاثيوبي ضربة جزاء مع هيثم مصطفى ...جعلت مهند الطاهر يسجل هدفه الثاني في المباراة والهدف الخامس للمنتخب السوداني.
• هذا رغم من ان هيثم مصطفى جاء للمنتخب من منازلهم ..بعد ان كان يبعد عن المشاركة مع الهلال ..وكان يخرج حتى من الـ (18).
• وعندما كان غارزيتو يصدح من وقت لاخر عن عدم جاهزية هيثم مصطفى ...جاء البرنس وفاز بنجومية اول مباراة كاملة يشارك فيها في هذا الموسم.
• عليكم الله ..هسع دي حالة لاعب ما جاهز.
• طيب لو جاهز كان عمل شنو؟.
• انا ما عارف (ايكانغا) دا بجهزوه وين؟.
• ايكانغا يوجد في احدى الحالتين.
• يا مسافر ..يا عندو كرت اصفر.
• ايكانغا يبقى افضل لاعب تكتيكي في السودان الان الي جانب عمر بخيت ..لكن مشكلته تبقى في السفر وفي الكروت التي يناله.
• امس الاول لولا ان غارزيتو اشرك خليفة ومحمد احمد وبهاءالدين ويوسف محمد وعلاءالدين البعيد عن الفورمة لما اشرك هيثم مصطفى.
• هيثم مصطفى امس الاول اشرك ما جاهز ..وفاز بنجومية المباراة.
• يبقى هيثم مصطفى لاعب يضع تاريخا خاصا لنفسه ...وهو في هذا الموسم رغم انه شارك في مباريات لم تتجاوز عدد اصابع اليد ..إلا انه مع ذلك سطر لنفسه تاريخا فريدا.
• ان يظل لاعب مسيطرا على الساحة الرياضية على هذا النحو شارك ام لم يشارك يبقى امرا غريبا.
• ان تهتف المدرجات لهيثم مصطفى ..شارك ام لم يشارك يبقى امرا مدهشا.
• لقد اعتدنا من الجماهير ان تنسى اللاعب ان ابتعد عن المشاركة ..لكن هيثم مصطفى كلما ابتعد عن المشاركة زاد لمعانا.
• وهذا شيء لا يحدث إلا لهيثم مصطفى.
• المبادرة الرئاسية حلت مشكلة هيثم مصطفى مع مجلس الادارة ..وجاء جمهور الهلال ليفرض مشاركة هيثم مصطفى في مباراة الهلال والخرطوم الوطني.
• يعني حلّوا المشكلة (رئاسيا) أي بقرار (جمهوري)...وشارك هيثم مصطفى في المباراة بقرار (جماهيري)..اي بقرار من مدرجات الهلال.
• اذن هذا تاريخا فريدا لهيثم مصطفى ..واعتقد ان مؤرخ الهلال الكبير علي الفكي وجد في هذا اللاعب تاريخا ناصعا ومثير ..يصعب ان يتكرر في ميادين كورة القدم بصورة عامة.
• نعود الي المباراة التى احزنتنا ..حينما كان (الحزن) هو العلاج.
• وتعادلنا ..حينما كنا نحتاج الي تعادل كي نصحى.
• التعادل الذي خرج به الهلال امس امام الخرطوم الوطني ...هو تعادل يحتاجه الهلال في هذا الوقت بشدة.
• هذا التعادل دق ناقوس الخطر ..وان تعامل الجهاز الفني للهلال مع المباريات المقبلة بهذه الصورة التى يتعامل بها الهلال مع مباريات الدوري
فان الدوري الممتاز يمكن ان يذهب الي اهلي شندي.• طبعا المريخ بي حالتو دي مستحيل يفوز بالممتاز.
• لذلك نقول اذا فقد الهلال الممتاز ..يمكن ان يفوز به اهلي شندي الذي فاز امس على نيل الحصاحيصا في الكاملين.
• واضح ان غارزيتو اصبح يتعامل مع الدوري الممتاز بصورة استعلائية ..وضحت حتى في استهتار لاعبي الهلال.
• لقد انعكس استعلاء غارزيتو على الدوري الممتاز على لاعبي الهلال الذين لعبوا باستهتار في المباريات الاخيرة للممتاز.
• غارزيتو عليه ان يعرف اهمية الممتاز ..وعليه ان يعرف ان الهلال مقبل في المباريات القادمة لمباريات غاية في الصعوبة.
• من اجل ان يثبت غارزيتو عدم جاهزية هيثم مصطفى ..كاد ان يفقدنا 3 نقاط ..وهو الان افقدنا نقطتين كانن في متناول اليد.
• نعم ان هذا التعادل يسأل منه الجهاز الفني للهلال.
• الاسوأ من ذلك ان مدرب الهلال حمد كمال ..اختلف مع سيف الدين مساوي ورفض الاشراف على الشوط الثاني للمباراة..وكذلك رفع غارزيتو يده من الشوط الثاني للمباراة بسبب اصرار الجماهير على اشراك هيثم مصطفى.
• هذه النقطة تحسب على غارزيتو ..ويجب ان يحاسب عليها ..كيف يقبل ان تفرض الجماهير لاعبا عليه ..هذا مع قناعتنا بقناعة الجماهير وجدوي مشاركته ..لكن تراجع غارزيتو عن استبدال هيثم مصطفى الذي كان نجما للمباراة نقطة تسحب علي مدرب الهلال الفرنسي غارزيتو.
• ونخشي هنا ان يكون الحديث عن شخصية غارزيتو وقوة طرحه (كلام جرايد)
..لأن تراجع المدرب عن استبدال لاعب بسبب الضغط الجماهيري يؤكد ضعف المدرب.
• الاخطر من ذلك ان لاعبي الهلال رفضو الانصياع لاومر غارزيتو بعد انتهاء
المباراة ..وهذا ايضا شيئا خطيرا ..يجب ان يعاقب عليه المجلس لاعبي الهلال ان تساهل فيه غارزيتو.
• لو ثبت ضعف المدرب فان ذلك يثبت ان هناك سيطرة تامة على المدرب من قبل دائرة الكورة ومجلس الادارة.
• نتمنى ان يكون غارزيتو تراجع عن استبدال هيثم مصطفى لاسباب اخرى يراها وحده ..وليس بسبب الضغط الجماهيري او بسبب مساوي او أي لاعب اخر في الهلال.
• اما عدم اشراف حمد كمال وغارزيتو على الشوط الثاني فان ذلك امر يستوجب المحاسبة الغليظة ..كيف يرفع الجهاز الفني يده من المباراة ..وهو الذي وضع الخطة والتشكيلة الغريبة التى شاركت في المباراة.
• الامر الاخطر من هذا ان الهلال ظل يعاني من دفاعه ..منذ بداية الموسم ...ومازالت شباك الهلال تستقبل اهداف مكررة ومعادة ...دون ان يجد ذلك معالجة او مراجعة من الجهاز الفني للهلال.
• هل فشل غارزيتو في ان يضع حلا لدفاع الهلال؟.
• لا يعقل ان يكون دفاع الهلال بهذا الضعف ..ان دفاع الهلال يلعب بمستوى فريق في الدرجة الثانية.
• وذلك امر يسأل منه المدرب والجهاز الفني للهلال ...لأن خامة اللاعبين
الموجودين في دفاع الهلال خامة طيبة ..ويمكن لي أي مدرب درجة ثانية ان يصنع منهم قوة دفاعية غير قابلة للانكسار.
• على المستوي الشخصي ..مازلت اري ان غارزيتو من افضل المدربين الذين تولوا تدريب الهلال.
• ومازال رهاننا على غارزيتو باقيا رغم الانتقادات التى نوجهه له من حين لاخر ..(يبقى تقديرنا لامكانيات غارزيتو في محلها).
• هذه الخلافات والصراعات الادراية لن تنقص من قدر غارزيتو شيئا ..وان
كان لنا في نفس الوقت ان ننتقده حول بعض الاشياء التى (تفقع المرارة).
• واحسب ان غارزيتو ضحية صراعات ادراية ودائرة كورة ( وفي قرارة نفسي ما
عندو ذنب) ..وان كان هو الذي سوف يدفع الثمن اخيرا ان ظل على هذه الصورة
مع قايد الهلال هيثم مصطفى.
• مطلوب من مجلس ادارة الهلال ان يحافظ على المدرب الفرنسي ..وذلك بحل
الاشكاليات الواقعة بينه وبين قايد الهلال.
• لا سيما وان هذه الاشكاليات اورثها المجلس للمدرب وهو لغنها لها ..ذلك
يجب ان يعدل مجلس الهلال صورة هيثم مصطفى عند غارزيتو.
• الغريب في الامر ان مجلس ادارة نادي الهلال وعبر المبادرة الرئاسية حل
اشكاليته مع هيثم مصطفى بعد ان كادت ان تنسف المجلس.
• لذلك نرى ان يحل المجلس مشكلة غارزيتو مع هيثم مصطفى ..مثلما حلوا
مشكلتهم معه ..حتى لا يضيع غارزيتو في هذه الاوضاع ..ونفقد بسوء الادارة
مدربا كبيرا.
• ان تحرك المجلس وحل الاشكالية تلك فان صورة غارزيتو سوف تتعدل عند
الجماهير ...التى نطالبها باحترام هذا المدرب ..وتقديره حتى لا نفقده.
• غارزيتو مدرب لا غبار عليه ..فقط هناك ملاحظات حوله ...واظن ان أي مدرب
ناجح يمكن ان تكون فيه تلك الملاحظات.
• دائرة الكورة ومجلس الادارة عليه معالجة هذه الملحظات ..لأن الاخطاء
التى يقع فيها غارزيتو هي اخطاء دائرة الكورة واخطاء مجلس الادارة.
• لكننا للاسف الشديد ..نحمل غارزيتو كل الاخطاء ..ونقسي عليه احيانا.
• وصيتي لجماهير الهلال ان يحافظوا على هذا المدرب ..كذلك اوصي لاعبي
الهلال ان يحترموا ويقدروا غارزيتو.
• واخص هيثم مصطفى ان يقرب اكثر للمدرب الفرنسي ..وان يعمل من اجل مسح
الصورة التى يحملها غارزيتو عنه.
• سوف يأتي اليوم الذي تصبح فيه العلاقة بين غارزيتو وهيثم مصطفى (سمنة
على عسل)..وهنا اطالب مرة ثانية ان يقترب اكثر هيثم مصطفى من مدربه.
• غارزيتو فقط يحتاج الي ان يعدل الصورة التى يحملها عن هيثم مصطفى
..واحسب ان ذلك الامر مسؤولية هيثم مصطفى ...وهيثم يعرف بقدراته وخبراته
الكبيرة وفطنته ان يكسب غارزيتو.
• اتمنى ان يكون هيثم مصطفى في هذه الايام قريبا من غارزيتو ..لأن الاخير
في ازمة حقيقية ..بدأ غارزيتو يفقد السطيرة على لاعبي الهلال ..وفلتت منه
المدرجات.
• ولا نريد ذلك لمدرب الهلال ..لا نحب ان نراه في هذه الصورة.
• اننا رفضنا يوما الصورة التى وضع فيها قايد الهلال هيثم مصطفى ..ونرفض
اليوم كذلك الصورة التى يضع فيها غارزيتو.
• على مجلس ادارة نادي الهلال اولا الحفاظ على هذا المدرب ..وعلى المجلس
حل كل اشكالياته.
• على لاعبي الهلال ان يكونوا اقرب لمدربهم وان يلتزموا بكل توجيهاته.
• اما جماهير الهلال فهي فرضا عليها احترامه ..وتقديره.
• اننا الان في خواتيم الموسم ...نحتاج الي تماسك اكبر ..ولا بد من
(محبة) اعظم تجمع الاسرة الهلالية كلها على قلب رجل واحد.
• الاوضاع التى نشهدها في الهلال اخيرا يمكن ان تكون سببا في ان نفقد كل
البطولات التى يقبض الهلال عليها الان بيد من حديد.
• مع هذا اعود واقول ..ان الهلال يعرف يتعامل في كل الظروف ..وهو لا خوف
عليه ..هلالنا قادر على الوقف والثبات.
• وحده يجابه الريح.
• ووحده يمضي بعيدا في ظل هذه الظروف الصعبة ..غير مبال بالصعاب والاهوال والاشواك.
• ان كل اشكالية نخرج منها ...نطلع منها اكثر قوة.
• نحن الان بالنتائج والوقائع ..الافضل على الاطلاق ..والاقوى.
• ملحوظة : مباراة الامل على الابواب ..اربطوا الاحزمة.
هوامش
• الناس قالوا بعد هدف بشه في الدوري الاولي للممتاز ...لقوا موسي الزومة
قاعد يغني في ركن ( واغالط نفسي بي اصرار واقول يمكن انا الما جيت).
• طبعا موسي الزومة شاف الهدف في التلفزيون ..ما صدق.
• معقولة دا انا.
• زولكم طوالي دخل غرفتو وقفلها عليه وقعد يغني في (واغالط نفسي بي اصرار
واقول يمكن انا الما جيت).
• قالوا شك في نفسو ..دا انا وإلا ما انا.
• زولكم اتوهم عديل كدا.
• عشان كدا ...من المباراة ديك تاني ما شفنا موسي الزومة مع المريخ.
• ريكاردو قنع من موسي الزومة ...ظاهر وباطن.
• اها هسع بنفس التفاصيل الموضوع حصل على ضفر.
• قالوا بعد هدف سانيه ...الحضري قعد يتحدث مع (ضفر).
• وضفر قعد يغالط في نفسو بي اصرار ..ويقول يمكن انا الما جيت.
• انت يا الحضري ..قاعد تتفرج في شنو؟.
• يعاين في الكورة ..تقول (بطيخة).
• ما اشتغل بيها الشغلة.
• غايتو هدف سانيه دا ..لو شالوا من عينه مصر ..تاني ما بتلعب في المنتخب.
• والله انت السليني ما خاطي عليك.
• المباراة كلها قاعد تطط فينا.
• تقول محمود المليجي.
• محمود المليجي هسع ذنبو شنو.
• زولكم قاعد ينطط حتى الدقيقة 85.
• الدقيقة 85 سانيه حسم ليكم المباراة بي فد عين.
• عين واحدة بس.
• عارفين سانيه سجل الهدف في الزاوية اليسار للحضري ليه.
• عشان سانيه انضرب في عينو اليسار.
• في الزاوية الضيقة.
• الهلال في المباريات الاخيرة اصبح يتعرض لاعبيه لاصابات عديدة.
• الحاصل شنو؟.
• وين الجهاز الطبي للهلال.
• معقولة نفقد سادومبا في (التسخينة).
• ليه؟.
• هو قاعد يسخن في (افغانستان) وإلا شنو؟.
• انت يا سادومبا بتسخن في فرن.
• عمر بخيت فقدناه في التمرين ..وهذا شيء يسأل منه الجهاز الفني للهلال
مدرب اللياقة تحديدا.
• في التسخينة فقدنا سادومبا ...في التمرين فقدنا عمر بخيت ..وفي مباراة
المريخ فقدنا سانيه ..وفي مباراة الخرطوم فقدنا نزار حامد.
• والله يجيب العواقب سليمة.
• المباريات القادمة ..ما بتستحمل أي حالة فقدان.
• كثفوا العلاج للمصابين.
• لعنة هيثم مصطفى بعد ان اصابة ابوتريكة (الخلوق) الذي اوقفه الجهاز
الفني للمريخ ..حلت لعنة البرنس على كرستنال رونالدو الذي دخل في حالة من
الحزن.
• رونالدو قال انا حزين.
• بلان رونالدو دخل في خلاف مع حارس وقايد ريال مدريد كسياس بسبب ان
خطيبة الاخيرة بتذيع اخبار الريال السرية.
• وذهبت لعنة هيثم مصطفى ابعد من ذلك ...بعد ان لمت في ميسي لاعب برشلونة
الذي ظهر (متشنجا) ومتعصبا مع مهاجم البرسا فيا.
• ميسي انفعل ..وغضب.
• الموضوع عادي يعني ..ما فيه أي حاجة.
• مباراة هلال كادوقلي والمريخ يمكن تتلعب في الموسم القادم.
• كل ما تجي المباراة دي يأجلوه.
• انتوا خايفين ليه يا ناس المريخ؟.
• الخريف ذاتو انتهى.
• الاهلي شندي قبض على ثالث الممتاز بيد من حديد.
• ناس شندي ما بيلعبوا.
• أي فريق غير الهلال والمريخ كان بشارك خارجيا ..كان بدهور في الدوري المحلي.
• إلا الاهلي ..ماشي لي قدام ..برة وجوة.
• بس تبقى مشكلة الاهلي شندي انه بخسر بسهولة امام المريخ.
• نحن في انتظار ان يرد الاهلي سطوته على المريخ وذلك بكسب الشكوى.
• عاجل : ريكاردو اتعلم حركات الفاتح النقر ..بقى لو كان لاعب مع
العباسية بهاجم الحكام.