وارغو ..القعاد في (الكنبة) ما عاوز ليه (لياقة)

وان طال السفر - محمد عبد الماجد                                    

< لا اعرف ...كم اكمل وارغو من السنوات في كشف المريخ ...(نسيت الحكاية دي).
< بمناسبة (النسيان) دا.
< واحد مشي يصيد ليه سمك...اول ما رمى سنارته ..نسي الموضوع.
< قعد يقول : يا ربي انا رامي (السنارة) في البحر دا ليه؟.
< اكون عاوز اكوي ...لكن البكوي ..ما برمي ليه (سنارة).
< عاوز اكتب ....البكتب برمي سنارتو؟!!.
< اخر حاجة طلعت ليه (سمكة) من البحر ..وقالت ليه : عاوز تصيد سمك..ما معقول تكون نساي كدا.
< موضوع (النسيان) دا ..هسع فيه حاجة.
< بتتعارض مع أي زول يا جماعة.
< عشان ما تلخبطوا لينا ساكت.
< نرجع لي وارغو.
< وارغو لعب كم سنة في المريخ ...قلت ليكم (نسيت).
< بتلخبط مرات ...اقدم فيصل العجب في المريخ وإلا اقدم وارغو؟.
< غايتو وارغو اقدم في (الكنبة).
< والشيء المتأكد منو هو ان وارغو اقدم محترف في المريخ.
< الزول دا جاء المريخ (قاصر) ..هسع وارغو دا في المريخ اوشك من ان يصبح مساعد مدرب.
< بقى زي فاروق جبرة.
< الموضوع دا فيه حاجة يا جماعة.
< وارغو قدّم عديل في المريخ والي الان لم يصبح وارغو (اساسيا) في فريق المريخ.
< يا وارغو...اسمعنا.
< امشي معاي خطوة ..خطوة.
< انت قعادك القعدت في المريخ دا ..لو قعدت في فرقة عقد الجلاد ..كان هسع بقيت (عضو).
< كنت بقيت اخضر من (انور عبدالرحمن).
< اقول ليك حاجة اسهل من دي.
< لو مشيت خشيت اتحاد المهن الموسيقية يوم ان اتيت للسودان بدل توقيعك في المريخ ..كان هسع بقيت (محمد الامين) عديل كدا.
< كان بقيت رئيس الاتحاد ...كنت جهجهت (حمد الريح).
< وارغو دا قالوا في جواز سفرو مكتوب المهنة : (احتياطي)...السكن : (الكنبة) جنوب يس حارس المرمي.
< يس دا وين؟.
< الاسم دا انا سمعت بيه قبل كدا.
< الذي يحدث لوارغو الان ..يخلينا نرجع ..ونشوف حكاية اللاعب دا شنو؟.
< بطقطق ليكم الموضوع.
< عندما اراد فريق المريخ ان يسجل (وارغو)...ناس المريخ (الاعلام السالب) سخن الحكاية ..وقالوا الاهلي المصري دخل طرف في المفاوضات.
< الاعلام السالب دي فيها حاجة يا جماعة.
< سالب وسالب وسالب.
< كمان نحن بنلعب.
< وارغو هو صاحب اعلي نسبة اهداف في بطولة الاندية الافريقية الي الان ..صاحب الرقم القياسي ..فقد سجل وارغو (13) هدفا في بطولة الاندية الافريقية عندما كان يلعب في اينمبا ..وجاء للمريخ وهو هداف للبطولة الافريقية.
< طيب الزول دا حصل ليه شنو؟.
< مالو؟.
< في زول زعلو؟.
< ديل يكوّنوا ناس الهلال ..اصلو اللاعب (البتلحوه) ناس الهلال ديل في (السجانة) ما بنفع.
< السجانة دي فيها حاجة يا جماعة.
< لاعب في البطولة الافريقية سجل 13 هدفا ...جاء للمريخ وسجل هدفين فقط في اول مواسمه مع المريخ.
< تقول جابوه المريخ (مصور).
< تقول (منتج).
< اول هدف سجلو وارغو كان في (الشجرة)...في مباراة ودية ...المريخاب احتفلوا بالحكاية دي وعملوا ليهم (سماية) للهدف دا.
< الهدف الرسمي - سجلو وارغو في اتحاد مدني ..هدف جاري بيه من النص ..تقول (ممنوعات).
< هسع اتحاد مدني في الممتاز مافي.
< وارغو وقت جاب الهدف دا ...ما صدق ..اصيب بحالة هيسترية ..وبقى زي (الشافع) البجي جاري من الموقف قبل الناس ويقول ليك ناس ابوي وصلوا.
< وصلوا من وين ما تسألوني؟.
< ما بحب الاسئلة الكتيرة.
< عندنا زول (تليح).
< النوع الما بفتح ليك إلا بي (دو).
< تفك ليه (قطر) ..ما بفتح.
< تفك ليه (دو)...بجرك خمسين.
< زول (تليح).
< الزول دا ان قعد معاك في (صينية) واحدة ..بعذبك عذاب ...ببقي ليك زي
حكم الراية في أي حاجة رافع رايتو.
< يمشي على السلطة يرفع ليه (عجورة)....طوالي (بقشطك) بي سؤال : انت العجور دا جايبو من وين؟...وعشان يطعّم السؤال ..بقول ليك : والله (عجوركم) دا طاعم خلاص.
< يا ود الناس ..العجور ..ما كلو عجور ...يعني عاوز تقنعنا انو (العجور) دا جاء من سلالة (الموز).
< مشي عليك الله ..ما تقيف لينا في (العجور).
< يرفع ليه (بنجراياي)....يخلي أي حاجة ..ويقول ليك ..اسمع (البنجر) دا من السوق المركزي.
< يعني كيف من السوق المركزي.
< مالك انت عاوز تجيب لينا (الطوحال) في الرباط الصليبي.
< لزوم (الفلهمة) ...العجور من السوق المركزي الخرطوم ...البنجر من السوق المركزي الخرطوم بحري ..والجرجير الشايفو قدامك دا من سوق ام درمان ..اما البصل الابيض دا تصور جايبنو من شندي.
< هسع (الجرجير) ذنبو شنو؟.
< دي سلطة ..وإلا برلمان ..المشكلة بالشكل دا.
< الحتة دي فيها حاجة يا جماعة.
< ويا ريت بعد كدا الزول (اللديح) دا بكتفى بالاسئلة دي.
< والله تقول ممتحن (ادبي).
< تقول مع امتحانو ادبي ..شايل (احياء).
< بقعد (يصنقر) ليك كدا في الاسئلة ..زي الشافع الجديد في الخرطوم ..يسألك من أي حاجة.
< انت يا عمو ساعتك دي سويسرية؟.
< يا عمو ..انا شايفك قبل كدا في حدايق السلام.
< اها الزول اللديح دا كان قاعد في الصينية ..بسأل كدا.
< بصنقع صنقيع للاسئلة.
< يمشي على (البامية)...طوالي (يطقك) بي سؤال.
< البامية دي (مفروكة).
< لا يا ود الناس ...البامية دي (شهادة عربية).
< هسع الكلام دا ..دخلو شنو بي (وارغو).
< سيب العجور ..سيب البنجر ..سيب البامية المفروكة ذاتها ..وكمل لينا حكاية (وارغو) دا.
< ما تبقي زي الزول الشايل ليه مجموعة مفاتيح ...يركب مفتاح مفتاح في الباب ...والباب ما يفتح.
< اخر مفتاح ..يطلع هو مفتاح الباب.
< بعد روحك ما تطلع.
< حاجة تغيظ ..حتى (المفاتيح) بتتعلم الغتاتة.
< نرجع لي (وارغو).
< وارغو دا وقت جاء للمريخ ...ناس المريخ ..قالوا خطفوه من الاهلي المصري.
< فرحانين شديد.
< زي كراسي الحفلة.
< دي فيها حاجة غلط.
< جابوه ..طوالي عملوا ليه مؤتمر صحفي ..وشركات راعية ...وحفلة شاي ..وسيرة ..وحنة.
< نحن شفنا الحكاية كدا.
< الحكاية كبرت اوي.
< قلنا الله يستر علي ناس (ريتشارد).
< ريتشارد الوقت داك كان بيلعب في الهلال.
< شلنا هم على ناس (مرق).
< ناس بابكر سلك ..شافوا الاحتفالات ...قاموا (خبّزوا).
< خبزوا طوالي ...ولا كضبوا.
< قلت ليكم الموضوع وسع اوي.
< بعد المؤتمر الصحفي ...عينك ما تشوف إلا النور.
< وارغو طلع كلام ساكت.
< حصل شنو؟..ما تسألوني.
< الزول دا مالو ..ما تسألوني.
< ناس سلك (الخبيز) العملوه داك ...ما عرفوا يعملوا بيه شنو؟.
< اخر حاجة ..وارغو جاب ليه هدف في الشجرة.
< ناس سلك استغلوا الموقف ...طوالي وزعوا خبيزهم.
< طلعوا (الخبيز)..قالوا الظروف ما معروفة ..الخبيز دا بقوم (يعتت) احسن نلحق ونوزعو في الهدف الذي سجله وارغو في الشجرة.
< يمكن تاني ما نشوف لينا هدف.
< الموسم الاول ....وارغو سجل هدفين فقط.
< تاني ما عمل أي حاجة.
< الموسم التاني ..بنشوفو يسخن كدا ..ويقوم ويقعد ...وناس مزمل ابوالقاسم يكتبوا.
< والله تسخينتو ما ساهلة.
< والله قعدتو في الكنبة ..قعدة لاعب كبير.
< بين الشوطين في الاستراحة ..وارغو دا عمل ليه حركة ...لاعب عادي ما بعملها.
< ديل ناس مزمل.
< عليكم الله هسع انا عاوز اسألكم سؤال ..وارغو القاعد في (كنبتكم) السنة كلها فرقو شنو من فلانتاين القاعد في بيتو.
< والله خسارة كنبة ساكت.
< الغريبة ..وارغو بتمرن ..وبتدرب ..وملتزم بالتمارين ..وبصرح في الجرايد وبقعد كنبة.
< يا وارغو ..(الكنبة) ما عاوزة ليها تعب ...الحاجات البتعمل فيها دي ما حاجات (كنبة).
< الكنبة ما عاوزة ليها لياقة ...ما تتعب في الفاضي ساكت.
< وانتوا يا ناس المريخ ما تشربوه عصاير ..ولا تجيبوا ليه فراخ.
< الكنبة دي (موية الفول) كتيرة عليها.
< ويا جمال الوالي ...عليك الله في داعي تصرف ليك مرتب 10 الف دولار في الازمة الاقتصادية دي في لاعب قاعد كنبة.
< انا قلت حاجة غلط يا جماعة.
< عشرة الف دولار في الشهر ..تقعد الزول في (اكسفورد)...تجوا انتوا تقعدوا بيها (وارغو) في الكنبة.
< بنك وقاعد في الكنبة.
< غايتو زول مرتاح في الدنيا زي وارغو دا عمري انا ما شفتو.
< قعاد ..وعشرة الف دولار.
< ناس سادومبا ..يجروا السنة كلها ..وما لاقين نص الدولارات البيدوك ليها دي.
< والله سادومبا مسكين عديل كدا.
< وارغو لقى الراحات في (الكنبة)...بقوا كل ما يجبوا ليه (عرض خارجي)..يرفض العرض.
< زول لاقي (الكنبات) المكندشة دي ..مالو ومال التعب.
< لكن مفروض وارغو دا يعمل ليه مشروع استثماري في كنبتو دي.
< احسن ليه ...من يقعد كدا.
< ملحوظة : طبعا ما جبت ليكم أي سيرة للمطر.
هوامش
< في مباراة الجمعة ...امام الاهلي شندي ..ان شاءالله الهلال يعود الي مستواه المعروف.
< وان شاءالله يطلع لينا من حتة (التعادلات) دي.
< أي تعادل تاني ...بعمل مضاعفات خطيرة.
< يا ناس الهلال التسجيلات باقي ليه اقل من شهرين.
< صلحوا الدفاع والاطراف.
< كل مرة الهلال يدخل التسجيلات وفيه خلل في الدفاع والاطراف ..ويسجل مهاجمين ولاعبي وسط.
< هسع الناس كلها عارفة في مشاكل في الدفاع ..برضو يمشوا يسجلوا ليهم مهاجمين.
< لو الهلال كان فيه اطراف ...كان هسع الفرق بين الهلال والمريخ في أي بطولة بكون 12 نقطة.
< في حاجة لفلانتاين...لماذا لا يحل مجلس ادارة نادي الهلال مشكلة فلانتاين؟.
< كان يمكن ان يبعث الهلال مندوبا الي نيجيريا ..عشان يشوف مشكلة اللاعب دا ..ويمنحه حقوقه كاملة ..عسي ولعل تحل مشكلة الطرف الشمال في الهلال.
< دور الاربعة ..والنهائي في الكونفدرالية الهلال سوف يكون في حاجة لفلانتاين.
< خاصة وان فلانتاين في نيجيريا مواصل تمارينه.
< اضف الي ذلك ان فلانتاين يمكن ان ينقذ الهلال بعد الاصابات التى تعرض لها معظم لاعبي الهلال.
< هل فشل مجلس ادارة نادي الهلال في حل اشكالية فلانتاين؟.
< الموضوع دا يا البرير ما عاوز ليه (مبادرة رئاسية).
< الموضوع في منتهى السهولة.
< الجماعة ديل لا بحلوا ..ولا بدفعوا.
< عاجل : لو جبت ليكم سيرة (المطرة) كان تعبتوا معاي.