الرئيسية » » اضغط (نجمة)..وشيل (النقطة) ..كلاكيت للمرة الثانية

اضغط (نجمة)..وشيل (النقطة) ..كلاكيت للمرة الثانية

Written By Admin on الجمعة، 21 سبتمبر، 2012 | 6:55 ص


وان طال السفر - محمد عبد الماجد                                                                           

الحضري نجم المباراة (سانيه) سلموا الجائزة في الدقيقة (83)
• مدخل اول.
• اول حاجة ..نثبت قون (سانيه).
• اشرب ليك موية ..واطلب قهوة.
• الهدف دا عاوز (يوسف شاهين).....وعمر الشريف ..وعمر الحريري...وامينة رزق.
• يا زول اقيف.
• امينة رزق ذنبها شنو هسع؟.
• امينة رزق ..مالها ومال البعملوا فيه ناس (ضفر) ديل.
• ضفر المباراة كلها يفتش في (ركبتو).
• عليكم الله في زول واعي كدا ..بفقد (ركبتو).
• ناس كاريكا ديل ..يروحوا للزول ركبتو.
• عشان كدا ..(ضفر) في المباراة دي ...اتوهم.
• كل 5 دقايق بقع.
• تقول بقرأ طب.
• يا ضفر ..انت مفروض لو وقع فيك (صاروخ) ...ما تقع.
• شنو (الحنكشة) البتعمل فيها ..في اخر عمرك دا؟.
• اها يا جماعة بعد ما تيجبوا يوسف شاهين ..وعمر الحريري وعمر الشريف
وامينة رزق ...جيبوا كمان زهرة العلا.
• غيرت رأيّ.
• انتوا مالكم.
• زهرة العلا ..دي في المشهد الاول ..ما كانت موجودة.
• لكن هنا ..عاوزين نعملها ..ضيفة شرف.
• مع ديل عاوزين لينا 5 كمبارس ( باسكال – نجم الدين – ضفر – الحضري – بلة جابر).
• عمر الحريري ..يدخل على عمر الشريف ..يقول ليه :
• اين انتم اخي العرب.
• عمر الشريف ...يقول : والله لاضربنكم حتى ..يشهد العرب والعجم بذلك.
• دا شنو (الفليم) البايخ دا.
• مشهد اول.
• التصوير الشعري للهدف.
اقول غنواتي في البلد البسير جنياتها
لي قدام
للولد البتل ضرعاتو في العرضة
ويطير في الدارة (صقرية)
ولو السمحة تلت ايد ومدت ايد
تقوم شايلاه هاشمية
يشيل شبالوا
خطفة ريد
وريدة روح
وحمرة عين ..
وايدية
• اها كلام محمد طه القدال دا ..(سانيه) ما طبقوا ليكم بالثانية.
• اقصد بالحرف.
• سانيه جيب قونو كدا ...حمرة عين ..وايديه.
• سانيه دا يا جماعة ...ناس ضفر ...ما بقدروا يمسكوه.
• الزول دا إلا تجيبوا ليه 17 عسكري.
• يثبتوه ...يكتفوه ..يعملوا ليه أي حاجة.
• عساكر شنو؟.
• سانيه دا جيبوا ليه قوات الامم المتحدة.
• برضو ما بتمسك.
• المارينز كيف؟.
• اصلهم الايامات دي رايحة ليهم (سفرة).
• عاوزين يجوا السودان بي أي سبب.
• سانيه دا ..لو شافو هدفو دا ...بقولوا (قاعدة).
• بقولوا تنظيم ارهابي.
• انت يا الحضري الظاهر عليك في الاعدادية ...ما كنت بتحضر حصة
...(الجغرافيا)...شكلك واقف غلط.
• وفي الثانوي ...واضح انك كنت بدك (الفيزياء)....عشان قاعد تعاين في
الكورة زي (الحمامة).
• شغلك دا...برجعك (الاعدادية) تاني.
• طبعا ...ما جبت ليك سيرة الجامعة.
• ولا عاوز ..اجيب ليك سيرتها.
• اعشان ...اثبت ليك حسن نية ...ندخل في نقطة تانية.
• مدخل ثاني.
• التصوير الدرامي للهداف.
• الديكور ...مجموعة من (الكراتين..وعلب الصلصة ...والقنا).
• الكراتين .....وعلب الصلصة ..عرفناها ...القنا في شنو؟.
• القنا ..بنحتاج ليه ..قدام ..انتوا مالكم بس ...نفذوا توجيهات المخرج
..(يوسف شاهين).
• ندخل في تفاصيل تانية.
• شوف (نجم الدين) واقف كيف؟..تقول عاوز يشرب....لبسوه ...عمة وطاقية
..قاعد ساكت ..تقول ماشي ليه (عقد).
• ضفر ...بتحرك ..يمسك ..(بطنو) ..يقع يقوم ..يلقى الكورة في القون.
• انت يا ضفر فاقد سوائل ...وإلا قايل نفسك لسع بتلعب في النيل الحصاحيصا.
• هوي ...المريخ دا فريق كبير.
• الحركات الكنت بتعملها في النيل لي ناس كرنقو ..ما تعملها لي ناس سانيه.
• باسكال ...يدخل شايل (الابريق) بي صبغتو دي...الكاميرا ..زوم.
• يحدث تداخل في اللقطات.
• انت يا باسكال ..ساعة الهدف كنت وين؟.
• يكون قاعد مع ناس كمال حامد في الاستديو يحلل في المباراة.
• اصلك طلعت بتاع (تحليل) ساكت.
• باسكال في المباراة ...كان زي التلميذ.
• ما ظاهر.
• نحن ما شفنا.
• غايتو كنا كل 15 دقيقة ..بنشوف لينا شعر ..مصبغ بجي فايت فينا.
• المشهد المؤثر ...(مركز الصراع)... العقدة الدرامية (عصام الحضري).
• عصام الحضري ..قاعد يعاين في الكورة.
• تقول مصور.
• يا الحضري ..شكلك كدا ..لو مشيت (الدهب)..المواضيع دي بتفتح معاك.
• اصلو قالوا انت زول قروش.
• المريخ بعد (التقشف) دا ...ما فيه حاجة.
• امشي الدهب.
• بتلقى ناس طه سليمان سبقوك.
• هسع طه سليمان ذنبو شنو؟.
• تدخل دا في دا.
• زمان ..قبل التطور دا ما يحصل.
• قبل ما يكتشفوا (التلج)...كان الزول لما يمشي يتصور ..بقولوا ليه تعال
..استلم الصورة بعد اسبوع.
• وكان في تحميض ..وجرجرة ...ومونتاج.
• حاجات كدا ..تسل الروح.
• هسع الصورة ..بتستلمها في (ثانيه).
• اقصد في (سانيه).
• ما شفتوا سانيه دا سلم الحضري ...الصور في لحظة.
• قلت ليكم الحساب بقى بـالـ (سانيه)...قعدتوا تغالطوا فيني.
• يا الحضري ...الصورة ببتسموا ليه.
• اضحك.
• فك الصرة.
• وإلا انت خايف لو فكيت الصرة ..ناس نجم الدين ديل ..صوتهم يرتفع.
• الحضري ..بعاين في الكورة.
• تقول الكورة دي ...دخلت في جمعة.
• انت يا الحضري بتلخبط وإلا شنو؟.
• الكورة تتهادل ..ونحن نغني ( هي اقدلي ..هي اقدلي ..)..والحضري بعاين.
• سانيه ...تقول (طيار حربي).
• يطير في الجو ..يلف كدا كيف ..ما عارف.
• يدخل في الغرف ..يطلع البرندة ..يقعد في الحديقة ..ويسجل قونو.
• الي الان ما في زول شاف الهدف.
• والحضري بعاين.
• اعاين ليه واضحك وامشي واجيه راجع.
• هدف سانيه دا ..في الاعادة ما واضح.
• انا اول مرة اشوف لي هدف رأسي ..بشوتو من منطقة ضربة الجزاء.
• سانيه سجل ليه ضربة جزاء بي رأسو.
• شوفوا الهدف ..وارجعوا لي.
• شو ..كو...انتر كابتر.
• الكلام دا بالهندي ...يعني يا الحضري انت كبرت.
• بقيت ما بتشوف بعد الدقيقة تمانين.
• بالروسي.
• فاتر شولدر ..كيف.
• يعني يا باسكال نحن كلمناك مية مرة ...قلنا ليك ما تصبغ لينا شعرك دا.
• انت قايلنا نحن اهلي شندي.
• نحن عندنا حساسية عديل كدا مع (الصبغة).
• قوووون ..(لملموا اللحافات ..وشوفوا ليكم شنطة حديد ...وارجعوا البلد).
• هدف سانيه دا ...زي اجازة اخر السنة في الداخلية.
• الطلاب ..يلملموا حاجاتهم من الداخلية بعد الامتحانات ويسافروا.
• عشان كدا ...يا الحضري شوف ليكم (شنطة حديد) كاربة ..ولملم شنكاراتك واتخارج.
• هدف في الدقيقة 85.
• زي اخر الحفلة.
• الناس بتبدأ ..تلقط في الكراسي.
• المريخاب خلاص بدأوا ..يحتفلوا.
• قالوا ليك مزمل ابوالقاسم ..علق صورة رمضان عجب ..في ترويسة عمودو.
• ومامون ابوشيبة ..قعد يحسب في الفرق.
• واسلام بنت سلك ..قعدت تضرب في الباسطة.
• يا سلك ..انت ما تمقلب ساكت.
• الباسطة دي ..قلنا ليك مية مرة ..ما تفتحها قبل المباراة ما تنتهي.
• ناس الهلال ديل ما مضمونين.
• والله الهلال دا عندو هجوم ..زي فريق المراجعين.
• الحسابات دي بجضمها ليكم في (سانيه).
• نص.
• في الوقت الفيه ..كان المذيع الداخلي للمباراة ..بقول ان نجم المباراة
هو عصام الحضري ...ومحمد فضل الله بعلن ذلك في التلفزيون ..(سانيه) سمع
طرف الكلام.
• سانيه ...الكلام ما عجبو.
• سانيه ..قال جيبوا لي (الجائزة) دي.
• جيبوها لي ..انا بسلمها للحضري.
• جابوا ليه (درع وموبايل).
• الدقيقة 40 من الشوط التاني ...سانيه اتقدم ..عشان شنو؟.
• عشان يسلم الحضري (الجائزة).
• الحضري افتكر الجائزة (تورتة).
• متعودة دائما.
• تورتة شنو يا ابوي ..مع ناس سانيه ديل.
• انا نفسي اعرف (سانيه)...فهم الكلام دا كيف؟.
• عرف كيف ان الحضري هو نجم المباراة...الكلمو منو؟.
• قطعتوا لينا نفسنا في (الجائزة).
• الزول دا اتعلم عربي وين؟.
• الحضري (42) سنة في الدقية (42) من الشوط التاني ...استلم الجائزة.
• جائزة اكبر لاعب في المباراة.
• قون ..واربع (عنقاريب).
• عشان تنوم على راحتك ..لقيت (الهمريب) دا ..وقعدت تجدع لي في كور مهند الطاهر.
• عامل لينا فيها شيطان.
• المباراة كلها (تتطاير) فينا زي (الحدية).
• لمن سانيه مسك ملفك.
• ضرب حسابتو..وشاف فارق السن ..وجاب قونو.
• وسلمك الجائزة في (برتكول) حربي رائع.
• قون ..واربع عنقاريب.
• هسع العناقريب دي ..دخلها شنو؟.
• الشيء الما عارفنها انتو...ان الحضري بعد قون سانيه فقد ليه 4 اسنان.
• طبعا الحضري مفكر.
• أي سن بفقدو الحضري جمال الوالي بدفع ليه مقابل السن 20 الف دولار.
• زي كنبة اكرم.
• عشان كدا ..الحضري بعد هدف ...سانيه ...قال فقد 4 اسنان ...ومليون ونص جنيه.
• اها الـ (4) اسنان ..عرفناها ...المليون ونص دي الشالها منو؟.
• حكم الراية ..كان بعيد من الحدث.
• يعني الزول الشال القروش منكم وفيكم.
• وإلا الحضري يكون عاوز كبر كومو.
• عاوز يتخن ...(التعويض).
• نحن بنعرف حركات الحضري.
• انت يا الحضري ..ما قلت عندك خبرة.
• ما قلت مفتح.
• المباراة باقى ليها 5 دقايق...كان تكتل اللعب.
• الشيء الغريب بالجد.
• سانيه ..كان لاعب المباراة بي عين واحدة.
• مع ذلك ..ناس باسكال ..ما قدروا يثبتوه.
• والله انت يا بسكال ..مفروض تشيل ليك (بطارية)..وإلا رتينة.
• معقولة ..زول لاعب بي فد عين ..يجيب فيكم قون بالشكل دا.
• ملحوظة : الحمدلله ...ما جات مطرة ..عشان ما تعملوها سبب.
هوامش
• في الممتاز ..المباراة الاولى فزنا فيها بهدف بشة.
• المباراة التانية تعادل 1-1.
• في الكونفدرالية ..ح نعكس النظرية دي.
• بدأنا بي تعادل 1-1 ...وح نختم في الكونفدرالية بانتصار ان شاءالله 1- صفر.
• شفتوا النظام دا كيف؟.
• نحن أي حاجة عندنا بي نظام.
• انتوا بتتعلموا متين؟.
• كلما يسجل المريخ ..ويتقدم على الهلال ...الهلال بعود للمباراة.
• الفاضل ابوشنب ..لو ادانا 10 دقايق بعد الهدف ...كان هسع ...مامون
ابوشيبة واسماعيل حسن في الدمازين.
• طبعا عاوزين يرجعوا البيت...لكن الدرب راح عليهم مشوا الدمازين.
• طشوا.
• كل ما تجيبوا هدف في الهلال ..الهلال برجع.
• وعندما يتقدم الهلال ..المريخ لو لعب سنة ..ما بعادل.
• الشوط التاني ..ناس المريخ دخلوا الملعب (فنايل) بس.
• ما شفنا أي حاجة.
• فريقكم دا انتوا ما نزل الملعب.
• انا عارف انو المريخ اتأخر شوية في النزول لارض الملعب ...لكن كونو
يكون ما نزل نهائي ..دي والله ما عارفها.
• غايتو الحضري نزل.
• لكن تاني ما شفنا زول.
• اتذكرت.
• شوفت فاروق جبرة ..واقف على الخط.
• انت يا سكواها ..دخلت في اخر الزمن عملت شنو؟.
• ما عارف الدخل سكواها وإلا فيصل العجب.
• سكواها ما فاضل ليه إلا يشيل ليه (ترمس).
• ما عمل أي حاجة.
• حايم ساكت.
• سكواها ..خلوه ..ما قلتوا العجب ..خطير ..وبيلعب.
• اها وين العجب.
• اختفى نهائي.
• شكلو كدا اختلف مع ريكاردو.
• التعادل مع المريخ ..افرحنا نسبة للكثير من الاسباب.
• اولا دفاع الهلال كان قاعد ساكت.
• ولولا تألق جمعة ..كان الهلال يمكن ان يخسر بعدد من الاهداف.
• تاني حاجة.
• عجبنا ليك الضغط الحصل للنجمة في الشوط التاني.
• والله جنس ضغط.
• ضغنا ..وشلنا النقطة.
• ضفر تقول في الحرب العالمية التانية.
• باسكال ..تقول واقع من طيارة.
• نجم الدين زي الزول الحايم في حوادث الخرطوم.
• الحضري ..لا عارف يضحك ولا عارف يبكي.
• انت مالك يا الحضري.
• قالوا ..قالوا عليك شقى ومجنون.
• تاني اوعك تقول مسافر.
• اوعك تقول راجع ...هدف سانيه دا على الاقل بقعدك 6 شهور.
• من الاسباب التى افرحتنا بالتعادل ايضا ..هو ان الهلال لعب المباراة في
ظروف صعبة.
• هيثم مصطفى حفظه الله ورعاه ..(ما جاهز)..حسب اعتياد غارزيتو على ذلك.
• اللاعب الذي لم يكن جاهز فعلا هو ايكانغا.
• ايكانغا ..يومين في الخرطوم ..ويومين برة السودان.
• مع ذلك اساسي في التشكيلة.
• انا ما عارف الزول دا غارزيتو بجهزوا وين؟.
• يكون بجهزوا في (المطار) مع العفش.
• علاءالدين يوسف ايضا لم يكن في الفورمة ..واشرك في اخر اجزاء المباراة.
• عمر بخيت فقدناه في ظرف حرج.
• سادومبا فقدناه في التسخينة.
• سانيه لاعب مصاب.
• جمعة مصاب.
• فييرا ما جاهز.
• بكري ما جاهز.
• خليفة ..ما جاهز ..رغم اجتهاده.
• لذلك فان التعادل يبقى مكسب كبير في ظل هذه الظروف.
• غارزيتو ..لو لم يكن محتاط بالبدائل الجيدة ..كنا ح نشرب ما نروي.
• وهذا شيء نحفظه لي غارزيتو.
• ايضا من مكاسب التعادل ..انه ابقى الفارق كما كان عليه قبل المباراة.
• يعني الممتاز دا تاني ما تفكروا فيه إلا سنة 2050.
• هسع ما عندكم طريقة.
• سانيه لاعب مصاب....بعين واحدة.
• فداسي استبدل في زمن مبكر.
• بكري المدينة ابتعد عن المشاركات ..فأثر ذلك في مستواه.
• صالح الامين ..افتقده دفاع الهلال.
• عودة صالح ضرورية.
• ايكانغا ..كلموه لو عاوز يلعب تاني ما يسافر.
• السفر ظهر في مستوى ايكانغا ..الذي كان ثغرة في وسط الهلال.
• كثير من الكور قطعت من ايكانغا ..وشكلت خطر على الهلال.
• البرنس تظل مكانته شاغرة ..انتصر الهلال او تعادل.
• مكانة البرنس ..(خالية)...رضي غارزيتو ام لم يرض.
• دفاع الهلال شكلو كدا ..ما بنستر لينا قدام.
• ريكاردو في شوط المدربين بمشي اهلو.
• جمعة ..يستحق الجنسية.
• بل يستحق منصب في القصر.
• جمعة كان فدائي رغم الاصابة .....وقام بكل واجبات الدفاع ..وقنع هجوم
المريخ من أي هدف.
• فريق المريخ ..ما يفكر تاني في الانتصار على الهلال.
• احسن ما يمكن ان تخرجوا به (التعادل).
• خليفة ..صلح الوسط ..ونزار حامد كان رائعا ..والطاهر حماد صنع الهدف.
• ناس المريخ كانوا فرحانين بقذيفة يسارية.
• الي ان شافوا قذيفة رأسية...فهموا حاجة.
• عاجل : ريكاردو عقدو قرب ينتهي مع المريخ ..ولم ينتصر على الهلال.
Share this article :

+ التعليقات + 1 التعليقات

غير معرف
22 سبتمبر، 2012 1:45 م

ياود عبدالماجد يعجبني كلامك شديييييييييييد وبريحني خاااااااااااااااااالص
ربنا يحفظك ويرعاك

إرسال تعليق

 
Support : Creating Website | Johny Template | Mas Template
copyright © 2011. مدونة تلفزيون الهلال السوداني - All Rights Reserved
Template Created by Creating Website Published by Mas Template
Proudly powered by Blogger