الرئيسية » » وان طال السفر / محمد عبد الماجد

وان طال السفر / محمد عبد الماجد

Written By abobakr saif on الخميس، 21 يونيو، 2012 | 10:57 ص

رفع الدعم عن المحروقات وعن فريق المريخ 

 

< الدولة تتجه لسياسة (التقشف).
 
< سوف يغادر جميع مستشاري الرئيس القصر الجمهوري.
 
< وسوف تتكون الحكومة من (17) وزيرا اتحاديا وذلك بالغاء 6 وزارات من
 
جملة 31 وزارة...مما يعني ان تقليص الوزارات يقارب من الـ (50%) حيث تم
 
دمج بعض الوزارات.. علما ان التقليص يطال وزراء المؤتمر الوطني بنسبة
 
90%.
 
< الدستوري سوف يكون عنده (عربة) واحدة ...سحبت العربات والدراجات
 
..وخفضت حصة الوقود التى كانت تمنح لهم.
 
< واحتمال (العربية) ذاتها يكون فيها 3 عجلات.
 
< يعني (ركشة).
 
< قالوا ليك (البوري) ذاتو تاني ح يكون فيه (تقصيد).
 
< تاني ما في حاجة ساكت.
 
< نور طويل ...ما في....هي وين البطاريات للنور الطويل دي؟.
 
< تخريمة.
 
< موش على كيفي.
 
< في الهند قالوا في وقت من الاوقات كان في دستور بمنع ارتداء القميص
 
الفيه 6 زراير.
 
< فقد اعتبر ذلك تبزيرا.
 
< وقد صدر هذا الدستور عندما كانت هناك ازمة في الزراير في الهند.
 
< هسع الهند ذنبها شنو؟.
 
< هي وين (الزراير) عشان يعملوها 6 زراير في قميص واحد؟...دا بزار ساكت.
 
< قميص هو ...وإلا كلية طب.
 
< تقشف شديد.
 
< تاني أي (كباية شاي) ممنوع يعملوا فيها اكتر من ملعقة سكر.
 
< قهوة ساعة المقيل ...ما في.
 
< انتوا قايلين (التقشف) دا لعب.
 
< قالوا ليك اربعة بلعبوا كوتشينة 14...مع سياسة التقشف دا عارفين عملوا شنو؟.
 
< بقوا يلعبوا (حريق)....بلعبوا 14 بـ (9) ورقات.
 
< شفتوا (التقشف) دا كيف؟.
 
< موش قلتوا في رفع دعم عن المحروقات.
 
< التسعة في الكوتشينة ...بقت 4.
 
< نقصت خمسة.
 
< قالوا ليك الحالة بقت صعبة ....جوز (السفنجة) بقى فيه (فردة) واحدة.
 
< والفردة ...بقت (طرحة).
 
< احد ظرفاء المدينة ..قال لي زمان 5×4 كانت بـ (51).
 
< شفتوا الرخا دا كان كيف؟.
 
< الدنيا كانت بخيرها.
 
< بالمناسبة دي.
 
< شهر العسل زمان كان فيه 30 يوما.
 
< هسع شهر العسل بقى 4 يوم..قلصوا الحكاية ...يمكن عشان دا عصر السرعة
 
...الشهر بقى زي الاسبوع.
 
< زمان الساعة تلاتة دي كانت بتجي في (الغدا).
 
< هسع الساعة تلاتة بقت تجيك مع الفطور.
 
< انا ما عارف ...الفطور البعد ...ام الساعة تلاتة هي القربت.
 
< في حاجة غلط.
 
< انا ما عارف شنو؟.
 
< زمان ما في زول كان بمسكل ليك.
 
< أي زول بضرب...البتعرفو ...وما البتعرفو بضرب.
 
< هسع لو عاوزين يدوك خبر وفأة بمسكلوا ليك.
 
< زول يضرب ليك دا ...إلا يكون عامل الخدمة.
 
< قلت ليكم في (تقشف) شديد.
 
< التقشف ظهر في (المكالمات).
 
< ح يرفعوا الدعم عن المحروقات.
 
< رفع الدعم عن المحروقات ظهر في المريخ.
 
< انا ما عارف المحروقات دخلها شنو بالمريخ؟.
 
< يكونوا رفعوا الدعم عن المريخ برضو.
 
< زمان الحكاية كانت ماشي مع المريخ.
 
< البوفيه المفتوح ...انتوا قايلنوا كان فاتح لي بلة جابر براه.
 
< البوفيه المفتوح ...كان مفتوح لكل المريخاب.
 
< لكن كل واحد كان بنظر ليه من ناحيتو.
 
< في ناس فاتح ليهم على (الضلع).
 
< وفي ناس فاتح ليهم على (الباسطة).
 
< وناس على (الدولارات).
 
< وناس فاتح ليهم على البحر.
 
< دحين هسع رفعوا الدعم عن المحروقات.
 
< وعن المريخ ايضا.
 
< عليكم الله لو المريخ ما رفعوا الدعم عنه ...بسجلوا ليهم محترف زي (ليما).
 
< الزول دا اعارتو قربت تنتهى ..ولي هسع قاعد برة.
 
< ح يلعب متين يعني؟.
 
< هسع (ليما) دا فريق درجة تانية بسجلوا ...ولو ما الموضوع بقى (محروقات) ساكت.
 
< المحروقات ظاهرة على تسجيلاتكم.
 
< تسجيلات المريخ ...ظاهر عليها تسجيلات (فلس).
 
< الظاهر المريخ في تسجيلات ديسمبر القادم ح يرجع لتسجيلات (الاتوس) من جديد.
 
< المحترف النيجيري بـ 7 اتوسات.
 
< المحترف البرازيلي بـ 4 اتوسات.
 
< اللاعب الوطنى بـ اتوس واحدة.
 
< نجم المباراة في المريخ ح يمنحوه (لستك).
 
< موش قلتوا في (تقشف).
 
< انتوا قايلين (التقشف) دا لعب.
 
< هو عليكم الله لو ما في تقشف ...(وارغو) دا بقعد في كشوفات المريخ.
 
< وارغو غلبهم يتخارجو منه.
 
< قاعد ليهم كدا زي (النسيب).
 
< تاني المريخ ما بغلب اكتر من 2- صفر...مع (التقشف) دا.
 
< حكاية يغلب 4 او يغلب 5 دي تاني ما في.
 
< قلنا في (تقشف).
 
< والتقشف ..بعمل اكتر من كدا.
 
< بس الحمدلله ...المريخ وقت الدنيا بي خيرها ...وقت كانت (مبهولة)..عمل
 
ليه (مقصورة).
 
< وعمل ليه طابق تاني.
 
< وسور...و..و...
 
< تاني غرف اللاعبين ما بتقدروا (تجيروه).
 
< جير ساكت تاني في (تلتلة).
 
< تاني ما في حاجة ساكت.
 
< ناس بلة جابر تاني بجوا التمرين بالركشات.
 
< ويرجعوا بالركشات.
 
< قلنا ليكم في (تقشف).
 
< لازم تستحملوا شوية.
 
< ناس المريخ ديل يمكن الظروف تعصر عليهم اكتر من كدا ..بعد رفع الدعم.
 
< يعني تاني بين الشوطين في استاد المريخ يمكن يطفّوا الكشافات عشان
 
يوفروا (كهرباء).
 
< كهرباء تروح ساكت كدا ...تاني ما في.
 
< باقي انا قلت ليكم من اول.
 
< نحن أي حاجة عندنا بي نظام.
 
< موش رفعوا الدعم.
 
< لكن يمكن لو رفعوا الدعم عن المريخ ...الاوضاع تصلح.
 
< اصلها القروش كلها كانت رايحة في (الطابق التاني).
 
< ملحوظة: كورتكم يا مريخاب بعد (التقشف) دا ما بتلعبكم في الممتاز.
 
هوامش
 
< الهلال في تقشف ....او ما في تقشف ..برضو في طلبات ..وفي ديون
 
...واللاعبون عندهم حقوق ومتأخرات.
 
< التقشف دا (كردينال) واحد ما بحلو.
 
< الهلال عاوز ليه 10 كردينالات.
 
< المريخ عاوز ليه 7 حكومات.
 
< حكومة واحدة ما بتخارجو ليكم.
 
< المريخ لعب بعض المباريات الودية مع ام بدة والجريف.
 
< والهلال كان يفترض قبل مباراة الاسماعيلي ان يلعب مباريات ودية محلية.
 
< لا سيما وان مباراة الهلال في دور الترضية اقتربت.
 
< وبعد مواجهة الاسماعيلي قد لا يكون هناك وقت لمقابلات اخرى.
 
< فلانتياين قال طفلتو مريضة.
 
< غريبة.
 
< السنة دي والدة سادومبا ما مرضت.
 
< لكن ظهر لينا مرض بنت فلانتاين.
 
< الحمدلله ما عندنا محترف قريب حسني مبارك.
 
< كان عمل لينا مرض مبارك دا سبب.
 
< سنة ما كان رجع.
 
< نحن أي حاجة عندنا بي نظام.
 
< الفاصل بين الدورة الاولي ...والدورة الثانية للممتاز ...بقى اكبر من
 
الفاصل بين الدوري والدوري.
 
< ايقاف مساوي ...وإلا ايقاف الدوري الممتاز.
 
< في واحد قال لي والله مساوي ما عندو أي ذنب.
 
< الذنب كلو من بلة جابر.
 
< غايتو يا الهلالاب ..انتوا بلة جابر في الضلمة تحدروا ليه.
 
< هيثم مصطفى حفظه الله ورعها ...رجع.
 
< العجب دور بي غادي.
 
< انت يا العجب كنت وين؟.
 
< زول شاعر بيك مافي.
 
< العجيب العجب بتألق قدام الجريف وام بدة.
 
< تجربة الهلال امام الاسماعيلي الجماهير سوف تكون متشوقة فيها على رؤية
 
ساني ومحمد احمد وكايا...رغم عدم مشاركتهم في المباراة الافريقية
 
القادمة.
 
< مع هذا نفضل مشاركة نجوم التسجيلات في المباريات التجريبية ..من اجل
 
الدفع الجماهيري.
 
< برازيلي المريخ قالوا بدأ (يسخن).
 
< تسخينتو دي حسب سنه بتنتهى مع نهاية الموسم.
 
< يعني مع انتهاء الاعارة.
 
< غايتو المريخ لقى ليه خانة شاغرة في ديسمبر.
 
< الحضري دا مع (التقشف) ما عارف موقفو ح يكون كيف؟.
 
< تقشفكم دا الحضري ما بنفع معاه.
 
< ولا بجاملكم فيه ...ولا بكذب.
 
< عشان كدا ما تتبعبوا معاه ساكت.
 
< التقشف دا تقشف (يس) عديل كدا.
 
< غير يس ما عندكم حل.
 
< انتوا قايلين (التقشف) دي لعب.
 
< التقشف دا يعني يس في حراسة المرمي.
 
< وضفر قدامو.
 
< التقشف دا يعني تسجيلات المريخ (ليما).
 
< كاسولي اليوغندي ...رجع ما لقى ليه (خانة).
 
< عليكم الله في (تقشف) اكتر من كدا.
 
< حالة صعبة بالجد.
 
< وبعد دا يقولوا ليك لاعبو الهلال عاوزين حقوقهم.
 
< نحن تقشفنا بي حقنا.
 
< الكلام انتوا التقشفكم مع رفع الدعم عن المحروقات.
 
< الظاهر ما عندنا امل السنة دي غير (المطر).
 
< قنعنا من محروقاتكم دي.
 
< ركزوا في (الخريف).
 
< اما انتوا يا ناس المريخ ...من الافضل ليكم مع (التقشف) دا ان تركزوا مع (يس).
 
< ما عندكم حل.
 
< سنة ..وسنتين كدا ...(ضفر) يبقى كابتن المريخ.
 
< هانت الزلابية.
 
< مع الظروف التى تعيشها مالي ..لو لم ينتصر الهلال في مباراته القادمة
 
في دور الترضية بام درمان بلاثة اهداف نظيفة ...يبقى ان فرصة الهلال في
 
التأهل سوف تكون صعبة.
 
< بل قد تكون مستحيلة.
 
< لذلك مطلوب من الهلال الانتصار بثلاثة اهداف او اكثر من ذلك ...اذا
 
اراد التأهل لمرحلة المجموعات في الكونفدرالية.
 
< غير كدا ..فكروا في حاجة تانية.
 
< الفريق المالي اقصى انبي المصري الذي كان قد انتصر عليه في مصر 1-3.
 
< ظروف مالي العصيبة ...سوف تنعكس سلبا على الهلال...وسوف تشكل ضغطا
 
اضافيا على الهلال.
 
< لذا من الان يجب ان يرتب الهلال على الانتصار الكبير في ام درمان.
 
< ابوشامة قال صالح الامين غير موقوف.
 
< ابوشامة ربما يكون اخر من يعلم.
 
< الهلالاب لو اتكلوا على ابوشامة ...واطتهم اصبحت.
 
< ابوشامة دي لي هسع مركز مع حي العرب.
 
< مازالت دائرة الكورة هى المشكلة الاساسية في الهلال.
 
< واوضح دليل على ذلك ان دائرة الكورة لم تحسن التعامل مع حقوق اللاعبين.
 
< وقد ظهرت حقوق اللاعبين على الصحف.
 
< ودائرة الكورة قاعدة تتفرج.
 
< مع ذلك هناك من يدافع عن هذه الدائرة.
 
< توقف مساوي.
 
< وتوقف معز.
 
< وتوقف علاءالدين يوسف.
 
< ودائرة الكورة قاعدة تتفرج.
 
< وقبل ذلك كان دور دائرة الكورة في مشكلة هيثم مصطفى حفظه الله ورعاه سلبيا.
 
< يا البرير دائرة الكورة دي لا بتحل..ولا بتربط.
 
< وفي ظل وجودها ..سوف تظل مشاكل الهلال في الجرايد....تحل عبر الضغط الاعلامي.
 
< قبل ذلك دائرة الكورة فشلت حتى في الوصول لمعتز رابح.
 
< معتز رابح قالوا قفل تلفونو.
 
< عليكم الله في دائرة كورة بالعين القوية دي.
 
< عاجل : الله يحلنا من الدائرة دي.
 
المصدر : قون
Share this article :
 
Support : Creating Website | Johny Template | Mas Template
copyright © 2011. مدونة تلفزيون الهلال السوداني - All Rights Reserved
Template Created by Creating Website Published by Mas Template
Proudly powered by Blogger