< غايتو البرير الله يسامحو شغلنا بازمة الهلال الاخير ومشكله التى
افتعلها مع هيثم مصطفى حفظه الله ورعاه ...وضيّع علينا الكثير من
الاحداث والمواضيع التى كان يمكن ان تكون مواضيع مثيرة وممتعة.
< لم نكتب حتى الان عن استاذ اللغة العربية عصام الحضري ..او عصام
شلوت...بالمناسبة عصام الحضري دا من الليلة ...اسمو (عصام شلوت) ..والما
عاجبو تاني ما يشرب شاي بي لبن.
< هسع الشاي ابولبن ذنبو شنو؟.
< عندنا واحد لو عاوز يكرمك بعمل ليك شاي بي لبن ..ويفتح ليك المروحة.
< لو فتح ليك المروحة خلاص كدا اصلو ما قصر معاك.
< لو فتح ليك المروحة ما بعمل ليك شاي بي لبن.
< اول ما تدخل عليه بسألك : اها نفتح ليك المروحة وإلا نعمل ليك شاي بي لبن؟.
< اوعك تدقس وتقول ليه : افتح لي المروحة.
< عشان لو فتح ليك المروحة اقنع من (الشاي ابو لبن).
< هسع عليك الله ما تعملها لينا كلها (شاي بي لبن).
< ادخل لينا في المفيد.
< كلو من الامين البرير ..عملها لينا كلها حوامة بالعربية المفتوحة مع
(اتوبونج)...وجاء عشان يشطب لينا البرنس.
< انتوا اتوبونج يا البرير قبل ما يوقع في الهلال لفيت معاه العاصمة
كلها...البرنس 17 سنة عاوز تشطبو كدا في شربة موية.
< البرير فوت علينا موضوع (الشلوت) دا ..وهسع انا عاوز اعمل فيها حذق
..عاوز اعمل فيها حريف وارجع لموضوع (الشلوت).
< مواضيع زي دي ما بتتفوت.
< ولا بنجامل فيها.
< ولا بنكذب.
< هو نحن في (التورتة) ما رحمنا الحارس العجوز كما يقول الاخ خلف الله
ابومنذر ..تفتكروا كدا كنا ح نرحمو في (الشلوت).
< يمين كنا عملنا ليه صينية في شارع الاربعين.
< وكان عملنا ليه اسبوع ثقافي في الجامعات.
< حاجات زي دي ما بفوتوها.
< ونحن ناس ...من هنا ولاحقا أي حاجة عندنا بي نظام.
< خاصة في المواضيع الزي دي.
< كمان نحن بنلعب.
< غايتو يا الهلالاب عندكم جنس فصاحة...تقول شغالين في (عطارد).
< قالوا ليك الناس الشغالة في عطارد ...فصاحتها (تلخم) ...زي ازمة الغاز
الايامات دي.
< هسع الغاز الدخلو شنو؟.
< دخلو فصاحتكم دي.
< الواحد لو عاوز ليه انبوبة غاز ...تقول عاوز ليه ميدالية ذهبية في سباق
الاولمبياد.
< الزول في البلد دي ...ما يصدع اصلو.
< طبعا بيني وبينكم الصداع ما عندو أي علاقة بالغاز.
< لكن عاملها (قرزة) كدا.
< المهم ...نحن والله ..وانتوا ما طالبني حليفة...موضوع (الشلوت) دا كان
عملنا فيه (معلقة).
< وبرندة وغرفتين.
< وكان طلعنا ليه ملف كامل ...كنا تابعنا ليكم فيه (الشلوت) دا من (كفر
البطيخ) الي ان وصل الي سويسرا.
< والله انا وقت قالوا لي جمهور المريخ كسر الكراسي في استاد الهلال
..قلت جمهور المريخ معذور.
< ما قدرو على الحضري ..اتشطروا على الكراسي.
< كمان الناس ديل المجموعات جديدة عليهم.
< لسع ماسكهم (البرلمة) في الحتة دي.
< هسع ناس اهلي شندي ديل (برالمة) وشفوت.
< يا اخوى أي زول بجي من شندي ..بجي (شفت).
< طوالي المجموعات ..حكاية اقعد ..وانتظر ..واكتسب خبرة واحتكاك ما عندهم.
< ناس المريخ ديل في البطولات الافريقية كلو ما يشاركو بقولوا نحن
مشاركين في البطولة دي من اجل اكتساب الخبرة...ويطلعوا ليك من دور الـ
(32).
< وكل ما يطلعوا من بطولة بقولوا ليك استفدنا من (الاحتكاك).
< احتكاك شنو؟...ناس المريخ ديل طلعوا ناس (احتكاك) ساكت.
< انتوا ما شفتوا نمور شندي دي عملت شنو؟.
< نمور شندي طوالي صعدوا المجموعات.
< لكن هسع دي ما موضوعنا.
< موضوعنا (الشلوت).
< عصام شلوت كورك شديد في الجماهير واداهم بالشلوت.
< الجمهور ليه حق يزعل...ويقوم يكسر كراسي استاد الهلال.
< بعدين الكراسي ما مشكلة ...نحن بنردها ليكم في (شبكتم).
< والله كراسيكم ما عندنا معاها أي مشكلة.
< نحن بنعرف بنرد كيف؟.
< اصبروا انتوا بس ..وروقوا المنقة.
< واذا عذرنا جماهير المريخ على تلك الفوضي التى احدثتها ..فاننا كذلك
اعذر عصام شلوت.
< عارفين انا عذرت عصام شلوت ليه وهو يقوم بتلك الحركة متوجها نحو جماهير
المريخ...عذرتو عشان الباشا قبل شهر سكت جماهير المريخ وقال ليهم (هس)
زول سألو مافي.
< عصام شلوت ..شاف الباشا بعمل كدا ..قام ادى ليك جمهور المريخ (شلوت).
< اما عن الحركة التى استفز بها جمهور الهلال فهى بالتأكيد سوف تجد الرد
الشافي من جمهور الهلال ..ومن اخوان البرنس.
< الغريبة جمهور المريخ سكت للحضري ...ما زي الاعتراض الذي وجده الباشا.
< قاموا على الباشا ساكت.
< الحضري ما قالوا ليه أي حاجة..ما قدروا يقولوا حاجة.
< انتوا إلا يشتغلوا معاكم بالشلوت.
< عالم ما بتجي إلا بالشلوت.
< لكن يا مريخاب ما تزعلوا ..سادومبا اخد ليكم حقكم.
< سادومبا جاب ليه هدف في عصام شلوت ...خلى ليكم عصام الحضري زي غسيل يوم الخميس.
< مشرور في الحوش من بداية السلك لي اخر السلك.
< يا الحضري انت لبه بتتبهدل كدا.
< الحضري طاير اسبوع كامل عاوز يلحق الهدف ...ما حصل حاجة.
< مسكين زول عمرو 44 سنة كورة زي كورة سادومبا دي لو رسموها ليه ما بثبتها.
< تقول محنن.
< يثبت شنو؟...الحضري الكورة في (الاعادة) بعد 48 ساعة من المباراة ما شافها.
< اها نوع دا نقول عنو شنو؟.
< نسوى ليه شنو؟.
< نشرحها ليه كيف؟.
< الحضري بعد المباراة قالوا ليك لقوه في كوبري الفتيحاب ..قالوا ليه يا
زول بتعمل هنا في شنو؟.
< قال ليهم بحسب فيها.
< بتحسب في شنو؟.
< بحسب في كورة سادومبا دخلت كيف؟.
< واحد قال لي عصام شلوت ...انت لو بتعرف تحسب كان جيت تلعب في المريخ.
< والله ساودمبا يلم فيك في الكوبري دا وفى سنك دا ...يفرتكك زي (البرتكانة).
< غايتو يا البرير ...الله يسامحك ...شغلتنا بي موضوع البرنس ..وفوت
علينا جنس مواضيع.
< شلاليت ..واهداف ..وكروت حمر ..وكروت صفر ..وكسير كراسي.
< نحن سمعنا بي كسير التلج ..لكن كسير الكراسي دي اول مرة نسمع بيه.
< مباراة الوقفة ...كان فيها حاجة غريبة ...حكمها اسمو (حمادة).
< حمادة دا (حنان بلوبو) خلت الغنا ليه.
< انا وقت سمعت انو الحكم اسمو (حمادة) ...قلت خلاص المباراة ح تكون زي عيد الحب.
< والله دي ناقصة فلانتاين.
< المبارأة بدأت ..ساعة وانا بفتش في (حمادة).
< قلت اكيد الحكم دا يكون زي شاروخان.
< الحكم يمشي ويجي فيني ..وانا ما عارفو.
< اخر حاجة اكتشفت ليكم حمادة.
< معقولة يا هو دا (حمادة) البتتكلمو عنو.
< دا حمادة.
< غايتو يا ناس مدغشقر عندكم جنس حمادة...دا هنا بنسمي عطرون وإلا جاب الله.
< حمادة شنو؟.
< دا القضنفر عديل كدا.
< انتوا بتلعبوا على منو؟.
< بتغشوا منو انتوا؟.
< حمادة دور ليكم كروت في المريخ ..اي لاعب في المريخ لاقهو ليك اداهو (كرت).
< 8 كروت صفر ..وكرت احمر ...ناله لاعبو المريخ.
< غايتو (حمادة) طبق اسمو عليكم.
< ناس قلق ديل ما بقعدوا معاه في ملعب واحد.
< من الدقيقة 23 اتخارج ليك من قلق.
< والله لو ما الحكم لاوز كان اتخارج ليك من الشغيل ومصعب عمر ونجم الدين.
< الحكم عاوز يتمتع بالفن الاصيل.
< بالابداع ..والهوبات.
< ملحوظة : غايتو يا البرير فوت علينا جنس (حفلة).
هوامش
< هيثم مصطفى حتى في ازمته ..ببحث عن مصلحة الهلال.
< هيثم مصطفى طلع اوعى من المجلس.
< مجلس الهلال وحده هو الذي ينسف في الاستقرار.
< تقول مجلس فريق تاني.
< غدا النمور جاهزة.
< النمور لازم يرجعوا من استاد المريخ بالنقاط الثلاثة لو عاوزين يتأهلو.
< لو ما عملوا كدا ..موضوع التأهل دا ينسوه خالص.
< بكرة مزمل ابوالقاسم قال ح يكون مع النمور حتى التسخينة.
< بعد كدا قال ما تسألوه.
< نحن في انتظار قرار الكاف.
< المنتخب سافر واتغلب ورجع ...وما في زول اشتغل بيه.
< معتز كبير ...لأنه كبير ..يظل بهذه القيمة.
< معتز كبير دائما يثبت انه يحمل اسمه.
< لو سألتو هيثم طمبل لشهد لكم بحسن قيادة هيثم مصطفى وباخلاقه ..وتعامله الراقي.
< انا ما عارف الناس الببتكلم عن افتراء هيثم مصطفى دا بتجيب الكلام دا من وين؟.
< طيب لو البرنس مفترى ..البرير يكون شنو؟.
< خلوا الجاني وقعدوا يحاسبوا في الضحية.
< أي واحد الايامات دي عامل فيها مرشد الاخوان.
< الجماعة كلهم قعدوا يتحدثوا عن العاطفة.
< هى العاطفة دي اكتشفتوها الليلة.
< فجأة كدا بقيتوا عقلانيين.
< انتوا لو عندكم العقل دا ما تموا لينا المدينة الرياضية.
< استثمروا لينا عقليتكم دي في المدينة الرياضية.
< أي واحد عامل فيها ابوفراس الحمداني.
< وهاك يا نصائح.
< وهاك يا نظريات.
< خلاص هى وقفت هنا.
< بقت على هيثم يعني.
< فيصل العجب دا بظهر في السنة مرة ...ما في زول قال عنه حاجة.
< قاعد.
< وممكن كمان يلعب تاني عشر سنوات في المريخ.
< انتوا بتلعبوا دا (العجب).
< البرير قالوا احتمال تاني يرجع.
< قلنا ليهم يرجع وين؟.
< قالوا احتمال تاني يرجع يردم حوض البط.
< ما بعيد.
< أي حاجة جائزة في الزمن دا.
< الهلال وضح انه يحتاج للواعي والراعي ميرغني ادريس.
< هذا الرجل حكمة وقوة ووعي.
< لو اصبح ميرغني ادريس رئيسا للهلال ...عندها فقط يمكن ان نقول ان
الاحترافية والعلم سوف تدخل في المجال الاداري.
< اظن ان السنوات القادمة كلها سنوات ميرغني ادريس.
< رجل تتوفر فيه كل صفات الكبار.
< هو وحده يمكن ان يعيد لنا سيرة الراحل الطيب عبدالله.
< لذلك يجب ان يستفيد الهلال من ميرغني ادريس.
< اليوم الذي سوف يصبح فيه ميرغني ادريس رئيسا للهلال ..سوف يكون هو
اليوم الذي لا نخشي فيه الهلال.
< عندها يمكن ان نقول ان كل الاحلام والطموحات سوف تتحق.
< ادركوا الهلال بي ميرغني ادريس.
< هذا الرجل...هو رجل المرحلة.
< اقلبوا الصفحة.
< عاجل : نسيت وارغو!!.
