الرئيسية » » مساندة الجمهور نصف الانتصار او (هوبة كل 15 دقيقة)

مساندة الجمهور نصف الانتصار او (هوبة كل 15 دقيقة)

Written By Admin on الجمعة، 14 سبتمبر 2012 | 7:25 ص

وان طال السفر - محمد عبد الماجد                                                    

< قديما كنا قبل ان (نُحشر) في غرف الامتحانات ...كانوا يقولون لنا ونحن بكل التوجس (مثل الطلاب الافغان سنة 1904م) .......(فهم السؤال نصف الاجابة).
< الطلاب الافغان سنة 1904 ..الدخلهم هنا شنو؟.
< زول قريبك كدا ..يثبتك في الباب ...يحذرك بعيون حمر (تقول داخل معركة) ويقول ليك : (فهم السؤال نصف الاجابة).
< تقول اكتشف الذرة.
< الزول البقول ليك كدا ....خلاص ما قصر معاك.
< اتقطع معاك.ما خلى ليك شيء.
< لم نكن نفهم حتى تلك (الوصية) ..ولم نكن نبال بها كثيرا..كنا نعتقدها حكمة يونانية قديمة.
< بالمناسبة (الوصية) اغنية للفنان محمد وردي كتبها اسماعيل حسن ولحنها برعي محمد دفع الله.
< نرجع للموضوع.
< نحن كنا نتعامل مع (فهم السؤال نصف الاجابة) على انه قول صيني مأثور ..قلت لم نكن نفهم حتى تلك العبارة ...ناهيك من ان نفهم (الفهم) الذي تدعوا له.
< كان صديقنا (حماد ود العصيبات) لمن يدخل الامتحان بمر على الاسئلة - سؤال – سؤال وبقول : السؤال دا فهمتو ..(نص درجة) ..ويمشي على السؤال التاني ويقول في سرو – دا برضو فهمتو (نص درجة تانية) ...ويمر بهذه الطريقة على كل الاسئلة ...ويتأكد من انه فهمها ثم يخرج من الامتحان دون ان يكتب (الاجابة) وهو راضي بذلك محدثا نفسه ان الامتحان هذا كفاه ان يمر فيه ويجيب نص الدرجة ..اعتمادا على فهمه للاسئلة المكتوبة.
< قلت كثيرا ان هناك (الكثير) من الاقوال والملاحظات التى تخرج فتحسب في بواكير العمر على انها حكم هندية او صينية او اساطير يونانية قديمة.
< مثلا كنا نقف كثيرا مع الحكمة (السفرية) التى تقول : (العفش داخل البص على مسؤلية صاحبه).
< هذه الحكمة كانت بتقطعنا بالادهاش ...والاستغراب ..وكنا كلما (اتعنقلنا) في بص ..قعدنا على شباك ...و(صنقرنا) في المقعد زي صحن (ام فتفت) في الصينية.
< كنا اول ما ننظر ونحن في ذلك الوضع هو مراجعتنا للتذكرة ..للنظر تأملا فيها ان كانت عبارة (العفش داخل البص على مسؤلية صاحبه) ، مكتوبة ام لا؟.
< عندما نجد تلك العبارة مكتوبة اسفل التذكرة ..نطير من الفرح ..ونسبح في فضائيات بعيدة ...ونحن ننظر الي شنطنا (المدفوسة) في رفوف البص...(خلاص بقينا على سفر).
< وكل مرة كان بقيف زول ويقطع الطريق ..ويقول يا الجماعة (الشنطة) دي شنطة منو؟.
< نحن كنا تاني بنطير من الفرح ...وبنقول بصوت موسيقي (زي كورال سلاح الموسيقي سنة 1978م) ...كنا بنقول الشنطة دي شنطتنا نحن...في شنو في مشكلة؟.
< كورال سلاح الموسيقي سنة 1978 هسع ذنبو شنو؟.
< الواحد فينا كان بفتش للمشاكل فتيش.
< وما بنتغالط في الحكاية دي.
< لذلك حكاية (العفش داخل البص على مسؤلية صاحبه) كانت بتكيفنا كيف شديد.
< تخلينا من الفرح ..زي البلح (الدفيق).
< والبلح (الدفيق)...هو بلح لم يكمل نضوجه بعد ..مازال اخضرا ..لذا فان رائحته قوية ...وممكن كمان يمسك في الهدوم ويصبغ.
< يقال عن اثره في الملابس (بقرح الهدوم) أي بترك (بقعا) عليها.
< شفتوا كيف؟.
< نحن أي حاجة عندنا بي نظام.
< واظن ان ذلك شيء إلتفت اليه الشاعر السر عثمان الطيب في (بحر المودة) ...حينما اشار في مناجاته الى ذلك: واتذكرك يا يمه ساعة الناس يجونا من البلد ناعم ترابا على جسيماتن رقد ريحة التمر فوق الهدوم لون الخدار خانس لّبد
< شوفوا ناس البلد ..بجوا بي ريحة تمرهم ...وبترابهم الناعم ...وقلوبهم البيضاء ..وحنيتهم (المصرصرة).
< وعند الشاعر الراحل محمد الحسن سالم حميد مثل هذه (الاكتشافات) وشعره حافل بالتسجيل لهذه المواقف والتوثيق لها.
< اليوم الهلال يلعب مباراة هامة امام انتركلوب ..واهميتها لا تخرج من صعوبتها ..وانما اهميتها ناتجة من ان المباراة تأتي بعد سلسلة من المشاكل ومسلسل من الاشكاليات.
< نحتاج في مثل هذه الظروف ان ننتصر ..وان نثبت ان الهلال لا يتأثر بكل الصراعات ..وهو يعرف ان يثير في كل الطرق مهما كانت وعورتها وخطرها.
< اليوم نحن في حاجة اكثر للانتصار ..لنضمد في نفوسنا الكثير من الجراح ..وندمل في الروح اوجاع لا يسكتها إلا انتصار الهلال.
< في ام درمان ..ليس هناك اجمل من ان ينتصر الهلال ..عندما ينتصر الهلال ..ام درمان بتضحك من الاضان للاضان.
< شوارعها بتطلع على رؤوس اصابعها ..تقيف تقالد في الناس ..زول – زول.
< ام درمان بتعرف عزة الهلال ...لذلك هى تقدر انتصاره ..وتثمن قيمته.
< بتشعر بينا ..وتحس.
< نحسب ان مساندة الجمهور اليوم ...تمنح الهلال نصف الانتصار ...على نهج (فهم السؤال نصف الاجابة).
< الجمهور مطلوب منه ان يترك كل (الاراء) مع او ضد - خارج استاد الهلال ..لا تدخلوا استاد الهلال باراءكم.
< ما تدخلوا بي اراءكم.
< خلوها برة.
< طلعوها ..وادخلوا الاستاد.
< الساعة ونص ..هى عمر مباراة الهلال والانتر كلوب ..نريد ان تكون كلها خالصة للهلال.
< خالصة للهلال بدون تشنج ..او اعتراض ..او تنظير.
< هي للهلال بكل الحب والمساندة والتشجيع.
< اليوم غارزيتو يمثل الهلال (كرامته من كرامة الهلال) ..كفى انه مدرب الهلال ...يحتاج منا لوقفة خاصة ..ومساندة نؤكد فيها حبنا للهلال.
< كلهم يمثلوا الهلال اليوم ..ومن يمثل الهلال يفترض منا ان نسانده وان نشجعه.
< 90 دقيقة ...كلها للهلال.
< ولا دقيقة برة.
< بين الشوطين ما تقعدوا تتكلموا عن المشاكل.
< المريخ انتصر على انتر كلوب في الدقيقة 87 ...يعني ما تضيقوا ..واعلموا ان انتر كلوب يقاتل باخر روح له ..واخر روح بتكون لايوقة ..وطويلة.
< هذه هى الفرصة الاخيرة لانتر كلوب.
< يجب ان نعرف ذلك ...وان نعلم ان هذا الامر يحتاج منا مساندة اكبر ..وتشجيع اكبر.
< وعندها باذن الله وتوفيقه سوف ينتصر الهلال ..وانتصار الهلال ان شاءالله اليوم سوف يكون كبيرا.
< ح نثبت ان المشاكل ما بتأثر في الهلال.
< وح نعرف كيف نتعامل مع المباراة ..يجب ان نفصل بين الاشياء ..(الهلال هلال).
< شجعوا جمعة ...يقف في المرمي بتجربة ليست كبيرة ...لكن جمعة متى ما وقف كان في الموعد.
< جمعة يحتاج اكثر لمساندتكم ..لتشجيكعم ...حتى يغطى قلة تجربته ويعوض ضعف خبرته.
< شوفوا ميساوي ...يلعب بكل احترام وتقدير واحترافية ...يلعب (زي الكتاب ما بقول).
< ميساوي يجب ان تقفوا معه.
< خليفة ..الذي يغيب ويرجع ...ما بهتم كثير بالتوقف ..متى ما طلب واستنجد به كان خليفة في الموعد.
< شجعوهم ..هم يحتاجوا اليكم اليوم اكثر.
< شوفوا مهند الطاهر ...كلما هاجموه رد عليهم بي (هوبة).
< ولما الغلاط بكتر ...برد بي هوبة تانية.
< على مهند الطاهر ان يعرف ان هوبة واحدة لم تعد ترضينا.
< الهوبة بقت ما بتبل اشواقنا.
< اتعودنا على الهوبتين.
< انظروا الي الصاقعة نزار حامد ..يتطور من مباراة لمباراة في صمت.
< الصاقعة ما شغال بي زول.
< يخش ويطلع ...تقول الكورة دي حقتو.
< انت يا جنا (الكورة) دي جايبها معاك من عطبرة.
< الصاقعة نزار حامد ..لمن يلعب بي مزاج ..ما بسأل في (محمدية).
< بطقطق ليكم الكورة دي زي (المرارة).
< ما عنده قشة مرة.
< الود دا شجعوه ..اقيفوا معاه ..عشان نستمتع.
< كاريكا.
< انا قلت حاجة.
< انا قلت كاريكا.
< كاريكا دا (مدرسة) براه.
< شغال (خراطة) عديل كدا.
< كورة بي اخلاق.
< الهدف ذاتو لو ما فيه (اخلاق) كاريكا ما بسجلو.
< كاريكا دا كوم براه ..قدم لنا (علوم) جديدة في عالم الكورة ....الكورة عنده ما كورة بس.
< الشيء دي عندو فيها نظام مختلف.
< جوة وبرة الميدان ..كاريكا اخر ابداع ..واخر روعة.
< شجعوه ..واقيفوا معاه لي اخر ثانية ..وشوفوا هدف كاريكا الليلة ح يكون كيف؟.
< هدف (شقلواني).
< شقلواني دي ح نشرحها ليكم بعد المباراة ان شاءالله.
< بس انتوا اصبروا ..وامشوا المكاتب من بدري.
< خلوه كاريكا ...شفتوا سادومبا.
< اعظم محترف على الاطلاق.
< اقوان بكل الطرق ..كل اللغات ..هندسة ..(شوالات – جركانات – علب).
< هسع الشوالات والجركانات والعلب ) الدخلها شنو؟.
< الظاهر عليك كدا عاوز تجيب سيرة بلة جابر.
< ظاهر ..بدردق في الكلام درديق.
< انتوا ناس بلة جابر وموسي الزومة ديل مالهم اختفوا من تشكيلة المريخ.
< عليكم الله لو ما ساكت (ليما) الشايفو دا بخت ليه لاعب في الاحتياطي.
< ليما يا موسي.
< اول مرة اشوف لي محترف زي (الطاقية) الما فيها زول.
< دي اشرحها ليكم كيف؟.
< اقول ليكم حاجة اقرب.
< زي الشراب بالسفنجة.
< يا جماعة عشان ما ادخل ليكم في حتة تانية.
< انا عاوز احصر الموضوع في كورة اليوم.
< اختصر ليكم الحكاية ..الليلة امشوا الاستاد من بدري.
< اقيفوا مع هلالكم ..وما تقصروا معاه ..وافصلوا لينا بين الاشياء.
< وتاني الحبة ما بتجيكم.
< والله الهلال الشايفو دا ...حاجة ما بتجيه.
< هلال ما فيه أي كلمة.
< قولوا ما شاءالله ..وامشوا لي قدام.
< ملحوظة : الباقى خلوا علينا.
هوامش
< ناس الخرطوم الوطني ديل حصل عليهم شنو؟.
< معقولة سبعة.
< لو دي كورتكم شيلوا منهم كلمة (الوطني).
< ما تخربوا الوطينة ساكت.
< في وطنى بتغلب سبعة.
< يا ناس الخرطوم كورتكم بقت زي (السيجة).
< عليكم الله انتوا لعبتوها وين؟.
< هسع البتعملوا فيه دا ...علاقتو بالكورة شنو؟.
< يا احمد عبدالله ..انت الناس ديل كنت بدربهم على شنو؟.
< على الف ليلة وليلة.
< انا عمري ما شفت لي حنية بالشكل دا.
< المضحك ناس المريخ صدقوا.
< امشي بي غشاوتكم دي لي ناس شندي.
< يمين ناس الاهلي ناوين عليكم من اول ربع ساعة.
< اسمعوا كلامي دا ..وشوفوا.
< كمان ناس شندي بيلعبوا.
< بالمناسبة دي.
< واحد طقتو كهربا.
< الناس اتلموا فيه.
< قال ليهم جيبوا لي (موزة).
< جابوا ليه موزة ..قال ليهم انا قلت ليكم جيبوا لي موزة ..تجيبوا لي بطيخة.
< انا الزول دا ما قال الكلام دا ..قنعت ليكم منو؟.
< عرفتوا ليكم انو (فوت).
< عندنا زول تاني.
< زول مختلف شديد.
< الزول دا وقت الهلال يكون لاعب من الساعة اتنين بكون طالع في رأس البيت.
< يا زول بتعمل في شنو؟.
< بقول لي عاوز اظبط الاريل.
< بقول ليه ..يا زول انت موش داخل الكورة ...موش ماشي استاد الهلال تحضرها جوة الاستاد.
< الزول بقول لي ايوة ..ماشي الاستاد ...لكن ناس مهند الطاهر ديل اهدافهم في الاستاد ما بتنشاف.
< اهداف ناس مهند الطاهر ديل ..بنجي نلحقها في الاعادة.
< زول طبعو كعب.
< عاوز يحضر الكورة سبع مرات.
< بعدين انا حصل قلت ليكم ..في لخبطة بتحصل.
< في جوطة.
< هوبة سانيه بقت تلخبطنا.
< الهلال بقى كل هوبات.
< تقول (حفلة).
< سيرك بس.
< والله ما شاءالله.
< انتوا الله يفرحكم.
< بكرة بكلكم كلام تاني.
< بس قوموا بدري.
< عندنا نظام جديد.
< عاجل : يا اكرم لو عاوز تقعد كتير في (الكنبة) اعمل ليك (ركشة)...استفيد من زمنك..لو مستواك نزل اكتر من كدا ..(ركشة) ما بتعملها.
Share this article :

إرسال تعليق

 
Support : Creating Website | Johny Template | Mas Template
copyright © 2011. مدونة تلفزيون الهلال السوداني - All Rights Reserved
Template Created by Creating Website Published by Mas Template
Proudly powered by Blogger