الرئيسية » » سمحة الهوبة والحساب بقى بالـ (سانيه) / وان طال السفر

سمحة الهوبة والحساب بقى بالـ (سانيه) / وان طال السفر

Written By Admin on الأربعاء، 1 أغسطس 2012 | 9:00 ص

محمد عبد الماجد


< ناس (زين) عندهم خدمة جديدة ...خفضوا بيها المكالمات ...وحسابهم بقى بالثانية.
< المسكول طبعا (مجاني)...لكن بعد دا قالوا عليه (ضرائب).
< ناس زين من غير شك (فرحانين) بهذه الخدمة .... (ينططوا) في عيونهم زي (الملايات الجديدة) او زي قميص (تحرمني منك) الزمان ..ناس زين ملأوا الشوارع (اعلانات) ..اي شارع تلف منو تلقى فيه لافتة كبيرة بتقول : (سمحة المهلة...اكبر تخفيض في الاسعار والحساب بقى بالثانية لكل الناس).
< وشفع زين في الفضائيات زي (كعك العيد) داخلين ليهم في جلاليب كبيرة ..يخوجلوا بيها زي ناس (اغاني واغاني).
< الشافع داخل في جلابية ابوه ...زي قلم البك لمن تدخلوا في بيت النضارة.
< لكن من غير مقاطعة.
< هسع العيد ..وينكم وينو؟.
< الواحد لو عاوز يرفع معنوياتك الايامات دي بس يقول ليك : (اها العيد وين ؟..معانا وإلا مسافر؟).
< نحن شفوت ..بنصوم في بورتسودان ..ونعيد في شندي.
< اها يا ناس بورتسودان بي (سخانتكم) دي بتعيدوا معانا.
< عارفين ناس هلال الساحل غلبو ناس اهلي شندي ليه؟.
< عشان ناس بورتسودان عندهم (رخصة) للفطور...وناس شندي لو ولعت فوق رؤوسهم ما بفطروا.
< نحن كمان بنلعب.
< لكن هسع دا ما موضوعنا.
< ناس زين قالوا : ( سمحة المهلة الحساب بقى بالثانية).
< ناس الهلال عندهم فهم تاني.
< عندهم خدمة جديدة.
< ناس الهلال قالوا : ( سمحة الهوبة الحساب بقى بالـ (سانيه).
< يمين هوبات الهلال بقت تطاقش....زي التيمان.
< هوبة مهند من هوبة سانيه ما بتعرف.
< لكن قالوا هوبة سانيه فيها (جلحات).
< زمان اهداف مهند الطاهر بنعرفها بالهوبة.
< هسع بقينا وقت نشوف (الهوبة) ...ننتظر (الاعادة) عشان نشوف الهدف الجابو منو؟.
< نسكت ساكت ..ونعلق على الهدف بعد ربع ساعة.
< بقينا ما بنفهم حاجة.
< باقي (الهوبات) اداخلت علينا.
< عندنا (عمنا) نظرو ضعيف النوع البغالطك في (صحن الفول)..بعرف ليك (الفول) انو فول بعد ما يقطع ليك منو شوط.
< لو كشحت ليه شوية كبدة ساكت في صحن الفول بتجهجهو.
< نظروا ضعيف ...يكون ماشي التلاجة ...نلقى مشي الحمام.
< شوفو كعب.
< عمنا دا قاعد في التلفزيون بحضر في كورة الهلال.
< شوية كدا عمك شاف ليك (الهوبات) تتخابط.
< عمك لا عرف الهدف جابو سانيه لا عرفو جابو مهند الطاهر.
< وما قدر يقول حاجة.
< زولكم ما كذب جري على (الراديو)...قال عاوز يشوف الهدف ...عشان (الهوبات) في التلفزيون بتلخبطو.
< طبعا الزول دا بشوف الهدف ...سمع.
< عشان كدا ...مهند الطاهر تاني وقت يجيب ليه قون مفروض يعمل لينا خطين تحت (الهوبة).
< او تحت (الهدف) ونحن بنفهم الباقى برانا.
< وبيني وبينكم (سمحة الهوبة).
< الهوبة اسمح من (المهلة).
< المهلة نعمل بيها شنو في (الخطف) دا.
< المحلية من تشوف ليها ميدان فاضي ....بتسوروا ليكم...شهر شهرين بتلقى الميدان بقى فيه عمارة من 12 طابق.
< عشان كدا نحن بقينا ما بنحب (المهلة).
< المهلة في (الرز) ما كويسة.
< عندي اقتراح لي ناس زين.
< عندى ليهم اعلان خطير ..بدل الاعلانات المالين بيها الشوارع دي ...والشفع الفاكينهم فينا ديل زي (دفتر الايصالات).
< ناس زين ديل مفروض يجيبوا (بلة جابر وموسي الزومة).
< انتوا قولوا ليهم عاوزين (نصوركم) ..عشان يبتسموا شوية...عشان يفكوها.
< بلة وموسي ديل ما بضحكوا إلا في (الصورة).
< الواحد من صورة الجنسية ما ابتسم.
< موسي وبلة جابر ديل ....جيبوهم لي (سانيه)...يدخل بيهم صالون حلاقة.
< يقطع ليك فيهم احسن حلاقة في اجمل صالون.
< بلة جابر وموسي الزومة وقت يجوا عشان يدفعوا حساب الحلاقة ....سانيه يثبتهم ليك ..ويقلع ليك (الفوطة) ويقطع ليك في كل واحد (هوبة) ويقول ليهم : الحساب بقى بالـ (سانيه).
< وتنتهي (الدعاية) على كدا ...بدل (الشفع) الفاكينهم فينا ديل.
< حلجوا لينا تلفزيوناتنا من الضحك.
< عندي (دعاية) تاني.
< عشان يفهمها بلة جابر ..وتقع ليه في رويسو دا.
< جابوا بلة جابر وموسي الزومة.
< ودوهم افخم فندق في الخرطوم ...فندق 7 نجوم.
< وافتحوا ليهم البوفيه المفتوح.
< خليهم يضربوا صاح.
< يضربوا زي ما هم عاوزين ...زول يقول ليهم شيء ما في.
< خلوهم على راحتهم.
< وقت خلاص يشبعوا ...ويبقوا على الحساب...يظهر ليك ليهم (سانيه).
< سانيه اول حاجة يقطع ليك فيهم (هوبة) ..ويقول ليهم الحساب بقى بالـ (سانيه).
< انتوا ما شفتوا (سانيه) دا بعمل في شنو؟.
< في 3 مباريات سجل ليه 6 اهداف.
< يعني يا بلة جابر (سانيه) دا عندو في كل مباراة (جوز).
< جوز اقوان ..ما زي الجوز البتأخد انت فيه (كرت) اصفر.
< 6 اقوان في 3 مباريات ...دي (الروس) ما عملوها قبل كدا.
< انتوا سانيه دا عندو جدو روسي...وإلا مركب ليه في رأسو دا (اريل).
< قولوا ما شاءالله ...خلاص عاوزين تسحروا لينا.
< سانيه دا قالوا في المباراة لو قعد في (الكنبة) بجيب قونو.
< ما عندو أي مشكلة.
< (قشارة) بس ..ما شاءالله.
< والله انا لو على مرادي ..يلقطوا ناس بلة جابر وموسي الزومة وسيد قدرين ومسلم الطيب والطاهر سادومبا وعبدالرحمن كرنقو وكل باكات البلد..
< شفتوا الباكات ديل كلهم لقطوهم لينا.
< ما يخلوا ليهم (باك) حايم.
< يكوشهم ليك زي الخدمة الالزمية.
< ويدخلوهم ليك في (فصل مسائي).
< بتعرفوا قراية المسا.
< انتوا ما قريتوا قراية المسا ...لكن ناس بلة جابر ديل بعرفوها.
< الباكات ديل ألحقوهم.
< الحقوهم من بدري ...خلوهم يدرسوا .
< انت يا موسي الزومة اول حاجة صلح (خطك) دا.
< خطك دا ما بقسم مع (سانيه) يا موسي ...احسن نكون واضحين معاك من بدري.
< احسن تعرف.
< وانت يا بلة ما نلقاك ما حافظ.
< سانيه دا اول حصة عندو (تسميع).
< بمسكك يسمع ليك القصايد دي قصيدة قصيدة.
< بعدين الزول الما حافظ ظاهر.
< في قعدتوا بظهر.
< اقصد في (جوزو) بظهر.
< سانيه دا صعب في (التسميع)...ما بفوت ليه حاجة.
< ببدأ من ورا.
< ولو طلعت ما حافظ ...شيل شيلتك يا بلة.
< لكن انتوا تحفظوا لي كيف؟.
< اذا كان فاروق جبرة ذاتو ما حافظ.
< انتوا تحفظوا لي من وين؟.
< والله سانيه دا مفروض يعذركم.
< لكن ما بعذر.
< نعمل ليه شنو نحن.
< سانيه لو بعذر ...ما كان بجيب ليه 6 اقوان في 3 مباريات.
< وفي رمضان كمان.
< في رمضان دا سكواها ضربة جزاء ما بجيبها.
< 6 يا سانيه.
< دي كلية طب براها.
< شفتوا كيف؟.
< نحن أي حاجة عندنا بي نظام.
< نحن ما عندنا حاجة ساكت.
< نحن شفوت.
< بنطلع الكراسي ..ونقعد في الواطة.
< نحن صعبين.
< شاي اللبن بنشرب لبنو براهو ..وشايهو براه.
< نحن شفوت.
< نضارة الشمس بنلبسها في الليل.
< ولا شغالين بي زول.
< والله بعد اهداف سانيه الستة ديل ...مفروض مشروع الجزيرة يكون ما فيها مشكلة.
< ازرعوا قطنكم ساكت مع سانيه دا.
< الحساب بقى بالـ (سانيه).
< شفتوا كيف؟.
< غايتو اكرم الهادي سليم عرفها.
< اكرم الهادي سليم قال عاوز يبطل الكورة.
< قال عاوز يعتزل عديل كدا.
< قنع من الكورة.
< اكرم عامل الحيلة الحضري.
< وانتوا ما عارفين السبب.
< السبب (سانيه).
< قلت ليكم الحساب بقى بالـ (سانيه).
< باسكال يقوم يسمع الكلام دا ..يقوم ما يخلي ليه (ضرس).
< باسكال شكلو كدا ح يقلع ضروسو كلو.
< ملحوظة : الضرس بحلك يا باسكال ...عامل شعرك الابيض دا زي الزول الدخل ليه (طاحونة) وطلع منها زي (العفريته).
هوامش
< احسن شيء ان الاتحاد الافريقي فصل بين مباراة المريخ وانتركلوب والهلال واهلي شندي بـ (24) ساعة.
< يوم السبت نشوف الحاصل شنو؟.
< وندخل يوم الاحد بي فهم برانا.
< اها يوم الاحد ...الحساب عندنا بقى بالـ (سانيه).
< يا ناس شندي بختكم.
< انتوا موعودين دون الناس بي اربع هوبات.
< اربع هوبات في رمضان دا.
< والله دي ناس عطبرة ما بلقوها.
< غارزيتو فرحان جنس فرح بـ (ايكانغا).
< سانيه يجيب في الاقوان وغارزيتو فرحان بـ (سانيه).
< يا ربي ايكانغا يبقى كيف ..لو ساينه بعمل كدا.
< بالمناسبة غارزيتو دا (غتيت).
< الفرنسي دا ما بفرح ساكت.
< الزول دا فرحو صعب.
< الله يديم الافراح.
< فرح الخواجة ...ما بكون ساكت.
< الجماعة ديل ما بفرحوا في الفاضي.
< نحن أي حاجة عندنا بي نظام.
< اكرم الهادي سليم ما بقعد (كنبة).
< اكرم ما بقعد ليه كنبة لي زول عمرو 45 سنة.
< انت يا الحضري القدرك بقى مدربين ..عاوز تنافس ود الناس في خانتو.
< لمعلوميتك تاني مافي (تورتة).
< خلاص ...المريخ فيه (تقشف).
< تاني التورتة دي ما بتشوفها إلا في المسلسل.
< فاروق جبرة ...رجع المريخ.
< اسبوع في النيل.
< واسبوع في المريخ.
< الحالة واحدة بين المريخ والنيل.
< لدرجة ان مدربهم بقى واحد.
< هو نائب رئيسهم واحد ...مدربهم ما يكون واحد.
< يا اكرم ...انت خلاص ايامك كملت في المريخ.
< يا اكرم امشي النيل.
< لكن الحضري دا ما مضمون.
< في النيل ممكن يلحقك.
< الزول دا قاصدك عديل كدا.
< اقول ليك حاجة يا اكرم.
< اقنع من الحراسة ..جرب ألعب (باك).
< ممكن تنافس بلة جابر.
< بلة جابر بتقدر عليه ...لكن الحضري دا ما بتقدر عليه.
< دا زول خبرتو في الملاعب 25 سنة.
< ربع قرن يا اكرم.
< خبرة الحضري متل عمر اكرم الهادي سليم.
< خالد عبدالرحمن يقود تحكيما مباراة مازمبي والزمالك.
< نحن مازمبي دا ح يظل ورانا ...ورانا.
< انا خايف تحصل لخبطة.
< خايف ناس مجدي شمس الدين ديل يلخبطو ..يقوموا يدخلوا انتركلوب في الدوري السوداني.
< خايف القى انتركلوب في الاسبوع الخامس للدوري السوداني.
< انتركلوب ح يلعب 6 مباريات مع الاندية السودانية.
< يعني انتر كلوب زي جزيرة الفيل.
< ما عندو أي فرق.
< غايتو لقينا لينا طيش لي مجموعتنا.
< يا جماعة انا قاصد المريخ ..ما قاصد الانتر.
< مجموعة اولادنا تقيم اليوم افطارها السنوي في حدايق الهيلتون ..ليكون
ذلك منهم تجمع اسري اخر.
< عاجل : يا اكرم اصلو الدنيا كدا.
Share this article :
 
Support : Creating Website | Johny Template | Mas Template
copyright © 2011. مدونة تلفزيون الهلال السوداني - All Rights Reserved
Template Created by Creating Website Published by Mas Template
Proudly powered by Blogger