الرئيسية » » الزول الورا السواق

الزول الورا السواق

Written By Alhilal Alsudani.tv on الثلاثاء، 7 فبراير 2012 | 8:20 ص


 
وان طال السفر· كتبتنا وكتب الكثيرون عن الشخص الذي كان يقف خلف عمر سليمان في خطاب الاخير الشهير عن محمد حسني مبارك حينما (تنحي).
· ومثلما كسب هذا الخطاب شهرة كبيرة بسبب تنحي مبارك ...اكتسب هذا الخطاب شهرة كبيرة ايضا من (كارزيما) الشخص الذي كان يقف خلف عمر سليمان.
· الغريب في الامر ان الشخص الذي كان يقف خلف عمر سليمان سحب الاضواء من عمر سليمان الذي تلأ خطاب التنحي.
· بل ان الشخص الذي كان يقف (ورا عمر سليمان) تجاوزت شهرته الرئيس المصري المخلوع محمد حسني مبارك...الذي لم يهتم به احد بعد رؤية الشخص (الورا) عمر سليمان.
· هذا الشخص عملوا ليه حساب في الفيس بوك ..ومنظمات ومدونات ..واعتذارات ..واصبح هو مركز الحديث في العالم العربي كله.
· لدرجة ان بعضهم رشحه ان يكون هو رئيس مصر القادم ...وقالوا اذا نافس هذا الشخص عمرو موسي واحمد شفيق في الانتخابات القادمة سوف ينتصر عليهم ويفوز بالانتخابات.
· الان أنا لا يهمني هذا الشخص ...لا هو ولا عشرة مثله.
· يهمني اليوم الشخص الذي يكون ورا السواق.
· الزول (الورا السواق) في أي عربية بكون بالمواصفات نفسها...زول شفقان ..وضايق واخلاقو في نخرتو...وما عندو صبر.
· تقول بعملوا ليه (معاينات) قبل من يقعدوه ورا السواق.
· في أي عربية ...العربات العامة ...والعربات الخاصة..الملاكي والاجرة بتلقى الزول دا شايل اخلاقو في نخرتو.
· شوفو في الشارع.
· أي شارع بدون تحديد.
· لما تحصل حاجة ....حادث او حتى زحمة عادية ...تلقى أي راكب قاعد (ورا السواق) مادي رأسو بي شباك العربية وبتشمر في الحاصل شنو؟.
· عاوز يعرف أي حاجة.
· وممكن كمان تلقى الزول دا (الزول الراكب ورا السواق) شغال شغل رجال المرور.
· يمرر في العربات...يوقف دي ويمشي دي.
· انت هناك ...ارجع شوية ...اسمع يا ابوالشباب افتح الشارع.
· وهو في كل الاحوال زول ضايق وما عندو صبر ...وعاوز يصل في اسرع وقت.
· لو لي مراده يوقفو العربات دي كلها ...ويمررو عربيتو.
· الزول دا شفتوا ...لما تكون في عربة اسعاف او عربة رئاسة وقفوا ليها العربات عشان تمر ..الزول دا بنقنق نقنقة شديدة.
· كأنو هو مقصود بالحكاية دي.
· الطريف في الموضوع دا ...انو الزول وقت العربية الراكبها تعمل غلطة ..او تخش ليها في شارع ما شارعها ..بطلع رأسو ويقعد يدافع عن السواق.
· بشتغل كسار تلج.
· معليش يا ابوالشباب.
· هى الدنيا طارت.
· اما كمان لو الغلط كان من العربية التانية ...فان هذا الشخص بطلع لي نصو وبسمعك كلام فارغ ..وبقعد يشاكل.
· وما بعيد ينزل يضارب.
· انا ما عارف لو كان سايق العربية هو كان حصل شنو؟.
· العربية التانية لو بقى فيها زول راكب ورا السواق برضو ما بعيد يحصل ضرب وتجيب ليها (دم).
· عشان الاتنين بكونو ما بستحملو.
· الغريبة السواق بكون ساكت وماسك خشمو عليه.
· لكن الزول الورا ...عيونا من (الشرار) متل صاج الزلابية.
· ما بستحمل.
· أي حاجة تحصل تلقاه دور.
· بدور اول زول.
· هسه دي سوايقة ...تسوقها...
· الشارع دا جايبو معاك في (ملاحة).
· كلام زي الحنضل.
· يسمعك كلام فارغ عمرك كلو ما سمعتو.
· والله سواقتك دي في (عجلة) ما بتأكلك عيش.
· انتوا الخرطوم دي متين جيتوها عشان تعملوا ليكم عربات تعطلوا بيها بس الحركة.
· انتوا مفروض يودوكم جنينة الحيوانات.
· اسمع يا ابوالشباب ...انت رخصة القيادة دي طلعتها من (فرن).
· وإلا وقعت ليك (قرعة).
· رخصتك دي الظاهر عليك ادوك ليها (هدية) مع كيلو (خيار).
· اشمعنا (خيار).
· هسه (الخيار) ذنبو شنو؟.
· العجب لو سواقتك كانت (اربعة).
· يسمعوك كلام ....في حلبة مصارعة ما سمعتو.
· سواقتك متل (النزول) الما تام.
· الكلام دا كلو بتسمعو من الزول (الورا السواق).
· السواق ذاتو ما بقول ليك أي حاجة.
· انت وقت ما بتعرف تسوق (النظارة) دي لابسها لي شنو؟.
· النظارة ذنبها شنو؟.
· والله سواقتك متل الفول بالفطير.
· سواقتك متل حبوب الملاريا ...انتوا الله يلعنكم.
· انت الشارع دا شوفو مكتوب فيه (شارع السيد عبدالرحمن)...وإلا مكتوب فيه اسم ابوك.
· والله السيد عبدالرحمن سيد الشارع دا ذاتو لو جا هسع دي ما بعمل البتعمل فيه دا.
· سواقتك متل المسكول البقطع من جرس واحد.
· زي (الكمونية) النسوا يدخلوها التلاجة.
· انت اتعلمت السواقة وين يا ابوالشباب ؟...علموك ليها في (مركب)؟.
· دا شنو بالتعمل فيهو دا ؟..بتدخل الشارع ساكت كدا..المريات القدامك دي مركبنها عشان تسوك فيها.
· تعرفوا أي زول بكون راكب (ورا السواق) بتلقوا بالطريقة دي ...زول فصيح ومسيخ ..وقميصو واحد.
· قميصو واحد.
· بطلعو يوم الجمعة ..عشان يوم السبت يجيبو (نضيف).
· مرة كان عندنا حفلة.
· خلاص عاوز تدخل لينا في (الحفلات).
· كانت عندنا (ربه).
· زمان الحفلة كانوا بقولوا ليها (ربه)....هسع ما عارف بقولوا ليها شنو؟.
· المهم يا جماعة كان عندنا حفلة.
· اتذكرت.
· هسع بقولوا ليها (كتمة).
· وزولكم ابو قميص واحد دا ...كان شايل هم قميصو الواحد دا.
· ما عارف يتصرف كيف؟.
· في واحد عامل فيه مفتح ...قال ليهو (اقلب) القميص.
· قميصك دا من جوة باهت.
· قميص هو وإلا هيثم طمبل عشان (يقلبو).
· في واحد تاني قال ليهو صبغو.
· ليه؟.
· قميص هو وإلا (باسكال).
· المهم الزول دا في النهاية صبغ القميص ومشى الحفلة.
· في الحفلة زولكم حظو كعب ...وش كدا قابلوه ليك ناس (افراح افراح).
· تصوروا ناس امجد افراح قالوا ليهو شنو؟.
· ناس افراح افراح قالوا ليهو : اها شعورك كيف وانت مصبغ (القميص).
· طبعا ناس (افراح افراح) جنهم يسألوا الواحد عن شعرو.
· شعورك شنو؟.
· العريس بقولوا ليه : شعورك شنو؟.
· ابوالعريس بقولوا ليه : شعورك شنو؟.
· ام العريس بقولوا ليها : شعورك شنو؟.
· العروس بقولوا ليها شعروك شنو؟.
· في (عروس) قالوا ليها ناس (افراح افراح) ...شعروك كيف؟.
· قالت ليهم : والله انا (شعورو) دي طبيعية ...ما تفتكروا (الكوافير) عملت لي حاجة.
· شعري اصلو كدا.
· غايتو يا ناس النيل الازرق لو مدير القناة حسن فضل المولى طلع قرار ما في مذيع او مذيعة تسأل عن (الشعور).. إلا (افراح افراح) دا تقلبوا (ألو مرحب).
· كنتوا ح تمشوا المناسبات بس ...تتعشوا وترجعوا.
· ما كنتوا بتقدروا تقولوا أي حاجة.
· احكى ليكم حاجة تانية.
· ما عندها أي علاقة بي (افراح افراح).
· زول طقتو عقرب.
· هسه دي فيها حاجة.
· الزول شالو وجرى على الدكتور.
· الدكتور عاين ليه كدا ...وقال ليهو اسمع العقرب الطقتك دي ...عقرب خلا والا عقرب جبال؟.
· الزول الطقتو عقرب قال للدكتور ..والله يا دكتور انا ما عارف ...لكن لو كنت واضع احتمال ساكت انو العقرب الطقتني دي عقرب جبال كنت دخلت معاه في مفواضات ...وما كنا وصلنا للحتة الصعبة دي.
· ان شاءالله نمشي (الدوحة).
· الدكتور قال ليه كمان بتتفاصح...قشطو ليك طوالي بي 4 (دربات).
· طبعا دربات المستشفيات الحكومية طوالي بتكتل.
· زي الاوكسجين.
· الاوكسجين هسه تطير عيشتو.
· ملحوظة : غايتو الواحد وقت يكون عاوز ليه سبب.
هوامش
· المنتخب طلع من دور التمانية.
· ودا بي كل الحسابات يعتبر انجاز للمنتخب ...للجهاز الفني وللاعبين.
· لكن في ناس تصوروا عاوزين يختزلوا انجاز المنتخب في تألق (اكرم).
· انتوا براكم ما قلتوا ما عاوزين الحاجات دي؟.
· الحمدلله (اكرم) اتألق ...وخلاكم تتكلموا عن المنتخب.
· قبل كدا كانوا عاملنها لينا كلها (الوطنية).
· نقول نزار.
· يقولوا ما في داعى للكلام عن اللاعبين.
· نقوم مهند.
· يقولوا الوطنية.
· نقول فييرا.
· يقولوا الوطنية.
· نقول مساوي.
· يقولوا الوطنية.
· هسع الوطنية مشت وين؟.
· الحضري قال عاوز يرجع.
· الحضري كراعو حارة.
· وقف الدوري المصري.
· في كراع حارة اكتر من كدا.
· اوعكم تجيبوا لينا ..بوقف لينا دورينا.
· زول كراعو زي (المكوة).
· الدوري المصري دا يام الثورة مسخنة كان ماشي زي الطلقة.
· الحضري رجع ...مصر ولعت.
· بورسعيد مات فيها 77 شخصا.
· استاد القاهرة اتحرق.
· وتقولوا لي (الحضري).
· حالتو لعب مباراة واحدة.
· عشان كدا ناس مصر قالوا عاوزين يرجعوا (الحضري) للسودان.
· يا جماعة ...نحن الفينا مكفينا.
· كفاية علينا (اكرم).
· الدوري السوداني ح يبدأ متين.
· تاني ح يجلوه.
· السنة دي احتمال دوري يكون مافي.
· بالطريقة دي ...(قرعة ) ما بقدروا يعملوها.
· ان شاءالله بس يلقوا ليهم (خميس) فاضي.
· الظاهر كدا ...ناس الاتحاد العام ما لاقين ليهم (خميس) فاضي يعملوا فيه (القرعة).
· المنتخب المصري فاز 3 مرات ببطولة الامم الافريقية ..وما في لاعب مشى من المنتخب واحترف في اوروبا.
· احسن لاعب في البطولة كان حسني عبده ربه احترف وقتها في الامارات.
· تجوا انتوا تتكلموا عن احتراف لاعبي المنتخب.
· ما تحلموا ساكت.
· انتوا يا دوب وصلتوا دور التمانية.
· لو وصلتوا دور الاربعة كنتوا قلتوا اكرم ح يلعب في برشلونة.
· اما لو وصلتوا النهائي كنتوا قلتوا ريال مدريد يعفي مورنيهو ويعين محمد عبدالله مازدا مديرا فنيا للريال.
· ناس المريخ ديل بعملوها.
· ما في حاجة بعيدة عليهم.
· على شوية كدا...كانوا عاوزين يودوا بلة جابر اليوفي.
· لو كان عندكم لاعب زي (نزار) ما عارف كنتوا عملتوا شنو؟.
· بشة دا على الميت كدا مفروض يحترف في مانشيستر.
· اكرم لاعب ليه مع (8) لاعبين من الهلال ...ما لازم يتألق.
· نوع دي ما بحلم بيها.
· ولا بلقاها.
· عشان كدا ...ليه حق يتألق.
· زول قداموا مساوي وفييرا ونزار.
· عاوز شنو تاني.
· في المريخ المسكين بيلعب قدام نجم الدين والباشا.
· خلوها مستورة احسن.
· عاجل: يا بلة لو لعبت في كأس العالم ...ما عارف كنت عملت شنو؟.
قوون
Share this article :
 
Support : Creating Website | Johny Template | Mas Template
copyright © 2011. مدونة تلفزيون الهلال السوداني - All Rights Reserved
Template Created by Creating Website Published by Mas Template
Proudly powered by Blogger