الرئيسية » » التانيين أحسن مننا بي شنو؟؟

التانيين أحسن مننا بي شنو؟؟

Written By نبتاوي زول on الخميس، 19 يناير، 2012 | 10:33 ص

بسم الله الرحمن الرحيم
***
الليلة و علي غير العادة ... قمت من النوم ، و انا متفائل شديد خلاص.
الظاهر يكون من الحلم الحلمتو بالليل. يعني بالواضح كدة شكلنا حا نطلع قوزاً اخدر.
بعدين هم ناس دروقبا ذاتهم شن طعمهم . ينضربوا عادي. و الله . المافي شنو؟
زي ما هم عندهم كرعين . أولادنا زاتهم عندهم. كمان كرعين أولادنا مارقات للتلاف.
لا خايفين عليهم لا في زول دافع فيهم المليارات. الواحد فيهم يجيك طاير جوز من بعد ستة متر. الكترابة .. الحاصل شنو. 
بعد شوية بنلقي نفسنا بقينا أربعة بس. الباقين كلهم بكونوا كرتوهم..خخخخخخ
هسي ما كنت متفائل ؟؟ ياخ التشاؤم دة كيف هو ؟ بعدين يا فردة . الشغلانية وما فيها . 
ثقة و حبة شفتنه. والله مش نطلع قوز أخدر. والله نطلع منصات التتويج ذاتو .. ياخي دلللل.
ليه دل .؟؟؟! التانيين ديل أحسن مننا بي شنو ؟؟ يعني شان بلعبو في أوروبا؟؟ هي أوروبا ذاتها شنو؟ أنحنا والله ما سائلين في أوروبا ولا الارجنتين ذاتو. 
والله نحن الواحد من أولادنا تلقاهو واقف في الميدان كدة. تتحير في راسك دة. تقول بس البلعب في أوروبا ياهو ولدنا .. والتانيين ديلك كرور ساي. لكن لمن الحكم يصفر والكورة تدور. الواحد التقول عندو شلل أطفال. خاااااخ. والله التقول شايل جبل أحد في ضهرو. لامن يجري ..!! ما تعرفوا جاري لي ورا ولا قدام. الكورة يتمغي ليها و يشوتها. تقول يوديها جنوب أفريقيا.. صدقوا!!؟ تمشي خمسة سنتي بس. طبعا ما منهم.. من الكورة . الكورة وزنها زايد و ما زي الكورة الكانوا متمرنوا بيها مع مازدا..واه واه واه.
لكن برضو .. الجماعة بتاعننا ديل يكون سرهم باتع. شكلهم كدة . جايين زعلانين.
و ناسنا ديل لمن يزعلوا ؟؟ حولاااا. بعملوا عمايل.    
Share this article :

إرسال تعليق

 
Support : Creating Website | Johny Template | Mas Template
copyright © 2011. مدونة تلفزيون الهلال السوداني - All Rights Reserved
Template Created by Creating Website Published by Mas Template
Proudly powered by Blogger