الرئيسية » » بعد هيثم وفييرا وانهيار المجلس ..المريخاب فاضل يعيّنوا ليهم (عسقلاني)

بعد هيثم وفييرا وانهيار المجلس ..المريخاب فاضل يعيّنوا ليهم (عسقلاني)

Written By Admin on الأربعاء، 26 ديسمبر، 2012 | 4:50 ص

وان طال السفر/ محمد عبد الماجد                                                                      
                                                            
قلنا في كتابات سابقة ..ان المريخ الوصيف او (الضل) ..يسير على خطوات الهلال ، ويعيد انتاج كل الاشياء الجميلة في الهلال لكن بتشويه واضح.
زي الطالب البشف (يبص) ، من الطالب القاعد جنبو الاجابة الصحيحة ..وبنقل أي حاجة في ورقة اجابة زميله بما في ذلك اسمه ورقم جلوسه.
خاصة في امتحان الانجليزي.
ما بخلي حاجة.
في زول بشف (رقم الجلوس).
ناس المريخ عملوها.
وهذا هو المريخ (الضل) يؤكد ما نقول ..ويثبت يوم بعد يوم انه نسخة مشوهة من الهلال.
وان كنا نقول ان الهلال لا توجد منه نسخة مشوهة.
الهلال جميل ..اينما كان.
المريخ بعد ان وقع في كشوفاته هيثم مصطفى ..يكذب ..ولا يتجمل ، وان ظنوه تجملا. والتشبه بالهلال فلاح كما يقول الاستاذ يس عمر حمزة.
المريخاب وصلوا حد انهم اصبحوا يقلدونا حتى في (عدم شرعية) المجلس ..عليكم الله في هوس اكتر من كدا.
انتوا يا مريخاب ...فاكرين (عدم الشرعية) دي حاجة سمحة؟.
ديل في مشاكلنا بقلدونا.
والله عدم الشرعية حاجة ما حلوة....وحاجة كدا ..بتقطع المصارين ...(ليس من الضحك بالتأكيد).
ناس همد ديل يكونوا فاكرين عدم الشرعية دي فيها (اراضي)...قايلنها (باسطة).
وإلا يكون فاكرين (عدم الشرعية) دي بوزعوا معاها (سكر).
دي زي الزول الصحي الصباح ..لبس قميصو (المشخط) ..داك ..وطلع من البيت.
في اثناء طلوعه من البيت ..لقي ليك (صف) طويل واقف قدام احد المؤسسات الكبرى.
زولكم ما كضب ..مشى وقف في (الصف) دا...قال في نفسو ..الناس ديل ما بقيفوا في (صف) ساكت.
يكون بوزعوا (جداد) مشوي في الصف دا..(طبعا انا ما محتاج اقول ليكم زولكم دا كان في هذا الوقت الصباحي نفسو في جداد مشوي).
ولا عاوز المح ليكم ..تلميح ساكت.
قال بينو وبين نفسو : اكيد في حاجة سمينة في المركز دا.
وقف واتسنتر في الصف ..وبقى كمان يوقف في الناس.
بقى في صفو بنظر ..يا زول امشي قدام ..اقفل الصف هناك ..يا جماعة ما تخلوا زول يدخل ساكت...يا شباب صفكم بالطريقة دي ما بمشي ..سدوا (الفرقات).
يلا مشي ..ادتونا (البرد).
زولكم وقت قرب للباب ..قال اخير يعرف حاجة ..قال للزول القدامو ..اسمع انت (الصف) دا صف شنو؟.
الزول الواقف قدامو قال ليه دا صف (الجلد) ..اي زول واقف في الصف دا مقررة عليه عشر جلدات...انت جاي من وين؟..ما عارف حاجة..انت بتقيف ساكت.
فاكرها (تأشيرة) للسعودية!!.
موش مفروض زولكم بعد ما عرف المعلومة دي يتخارج من الصف دا ..وينكشح.
زولكم ما انكشح .. صلح نظارتو (تقول طلب فول ) ، وقال للزول الواقف قادمو احسن اقيف وانجلد عشر جلدات ..عشان الجماعة ديل ..بكرة بزيدوا الحكاية.. بدل عشر جلدات بعملوها عشرين ..احسن الزول يخلص.
والله الناس ديل ما مضمونين.
زمان (الكبريتة) كان فيها مية عود.
هسع (الكبريتة) بقت زي المشروع فيها (عود) واحد ..تقول عاوزين يزرعوه.
الغريبة بعد ازمة الغاز والحصل في (الكبريت) ...الجماعة ديل الي الان بغنوا في (النار ولعت).
النار دي ح يولعوها بي شنو؟..مع (كبريتكم) البقى فيها (قشة) واحدة.
الموضوع دا والله لا بخصنا لا من بعيد لا من قريب ...ولا عندنا معاه قضية ...تولع ما تولع بي طريقتهم.
حكاية التقليد ..دي بذكرني بي حاجات عابرة كدا.
زول مشي ليه (مطعم)...جر ليه كرسي وقعد ...(زي ما أي زول يمشي ليه مطعم ويجر الكرسي ويقعد فيه)...ويكورك ..قبل أي حاجة يا ولد تعال نضف التربيزة دي.
زولكم نادي الجرسون طلب ...(عدس).
الزول القاعد جنبو في نفس التربيزة قال للجرسون ..عليك الله جيب لي معاك (عدس) برضو.
في زول بقلد ليه زول في (عدس)...نحن العدس عند (ايمان لندن) مكجننو.
الله يقطع سنين العدس ..محل ما يكون.
الزول ضرب العدس ..قبل ما العدس يكمل ..كورك للجرسون ..وقال ليه عليك الله جيب لي نص فرخة مشوية.
الجرسون قبل ما يرجع من التربيزة ..الزول القاعد جنبو رفع رأسو ..وقال للجرسون عليك الله جيب لي معاك برضو نص فرخة ، وتكون مشوية كمان.
ما طبيعي تكون (مشوية) ..يعني ح تكون بتقرأ (طب).
ضرب نص الفرخة ..الزول (الاصلي) تاني كورك للجرسون وقال ليه جيب لي عليك طلب (كمونية)...قال النشوف الزول دا بقلدني في (الكمونية) دي ..وإلا الموضوع دا كلو (صدفة) ساكت.
صاحبكم قبل ما الجرسون يرجع ..قال للجرسون : وانا كمان جيب لي معاك طلب (كمونية).
الله ..الله ..الله ..دي الحكاية مقصودة بقأ.
الزول (اتجوغر) ..واكل الكمونية ...ونادي تاااني الجرسون وقال ليه جيب لي (نيفة).
اصلها بايظة ..بايظة.
الزول الجنبو ..برضو طلب (نيفة).
اسمع مع (النيفة) جيب لي كوارع.
الزول برضو قال عاوز مع (النيفة) كوارع.
المسكين ..ضرب (النيفة) ..وضرب (الكوارع) ..وما قدر يتحلى من الزول المارضو دا.
قال في نفسو ..(في السر) يعني بينو وبين نفسو ..يا ربي (احلي) هنا وإلا امشي (احلي) في البيت؟.
زولكم القاعد جنبو ..قال ليه احسن نمشي نحلي في البيت.
اها ..في (تقليد) اكتر من كدا.
ناس المريخ شغالين معانا بالنظرية دي ..(التحلية) بقلدونا فيها.
والله انا لو رئيس نادي الهلال ..كنت جبت لي عشرة (رباطة) وسجلتهم في كشوفات الهلال ..وشطبتهم في اليوم التاني...عشان تسجلوهم ..وكشفكم يبقى كلو (رباطة) يا مريخاب.
يا جماعة ..انتوا دي سمعتوا بيها ..حصل قابلتكم؟.
حصل في نادي قلد ليه نادي في (الاستقالات).
ناس المريخ ..عملوها ..بقوا اليوم والتاني واحد فيهم (يستقيل).
كل ما نصحي الصباح ..نسمع ليك بي واحد استقال من المريخ.
استقالاتكم دي العاقبة تحصل في مجلس الوزراء.
نحن في الهلال عندنا نائب الرئيس ابومرين (استقال) ...المريخ فيه نائب الرئيس عبدالله حسن عيسي برضو (استقال).
دا يقولوا عليه شنو؟.
زي الحفلة البتكون بالنور الجيلاني في البرد دا ..يمين ما تفهم أي حاجة..بتاع العشا ..كل ما يمر فيك ..تنزل ليك صحن...تقول شغال في الميناء.
عندنا الامين العام للهلال الكاروري (استقال) ..عندهم في المريخ الرئيس جمال الوالي (استقال).
طبعا الحتة دي عاوزة ليها شرح.
تلقاكم قلتوا ليه ..ما استقال في المريخ الامين العام زي ما استقال في الهلال الامين العام..طول ما المريخ ..بقلّدوا الهلال ..وبشيلوا منو الحاجة بي ضبانتها.
والموضوع بعد ما ابينو ليكم ..سوف يظهر ليكم بوضوح ..لأن هناك تفسير وتعليل منطقى ..يتمثل في ان الامين العام في الهلال ..بعادل رئيس في نادي المريخ.
هسع الدولار بساوي كم جنيه؟.
اسكتوا خلوه ساكت ...ما عاوزين نقفل نفسكم ساكت.
عندنا قريبنا ..برة البلد ...كل ما يقول راجع البلد اجازة ..يسمع بارتفاع الدولار يخلي الرجعة.
الزول دا عرسو ..كل سنة بأجلو سنة ...تقول عرسو دا واضعاه اللجنة المنظمة للدوري الممتاز ....كل مرة يأجلو.
على العموم عشان جمال الوالي بس ..نحن ح نجاملكم..لأن (المشجع) في الهلال بعادل (رئيس) في المريخ.
عملنا ليكم تخفيضات 10%.
لكن يا مريخاب عشان ما تتحرجوا في (البرد) دا ..نزلنا ليكم في القيمة.. خاصة ان رئاسة الهلال يشغلها الان الامين البرير.
الاحراج في البرد ...زي الزول الببيع ليه (تلج) في هذه الايامات فى موسكو.
في زول في حلتنا ..بقوم ..كل يوم الصباح ...من دغش بدري..وبمشي ليه لي تلاجة تلج ..وبقول للولد ..اسمع يا ولد عندك تلج.
الولد طبعا في البرد دا ..بقول ليه : لا ابدا ما في تلج.
زولكم كل صباح بمشي للولد ويسألو من (التلج).
يوم الولد ...قال والله انا إلا اشوف نهاية الزول دا شنو؟...قام اشتري ليه لوح (تلج) ووضعو في التلاجة.
اول ما الزول جاء الصباح وسألو ..وقال ليه : اسمع في تلج.
الولد قال ليه : ايوا في تلج.
عمكم قام ليك فيه ...قال ليه ..عليك الله هسع دي عملية تعملها ...هسع دا برد يجيبوا فيه (تلج).
هسع موضوع التلج دا ...خليه ..واصل لينا في الموضوع الاساسي ..ما تبقى زي سواق الحافلة ..اول ما يتحرك من الموقف بكون بتكلم ليك عن (برشلونة) وميسي وفرق الـ (16) نقطة من ريال مدريد ...واول ما تصل المحطة الاخيرة ..تلقى سواق الحافلة بتكلم ليك عن (التوب) الاشتراه اول امس للمدام...وعن رسوم الجامعة للبنت الكبيرة.
نظام شنو؟....نظام الحالة بقت واحدة ...ودخلنا في المواضيع الاسرية.
نرجع للاستقالات.
العضو المحترم عصام كرار في الهلال براهو بساوي ليه 7 اعضاء في المريخ.
عشان الحساب ..يبقى ليكم واضح.
ما عاوزين غلاط.
عصام كرار بساوي متوكل احمد علي ومحمد الريح وجمال الكيماوي و4 همد..والموضوع دا برضو جاملناكم فيه.
المريخاب ..انتهوا من موضوع (الاستقالات)..ودخلوا لينا في حتة (المجلس غير شرعي).
والله مجلسكم دا من يوم ما جاء ...حسيت ليك انو المجلس دا ما شرعي.
ما عارف ليه جاني الاحساس دا؟.
نفس الجدل الدخل فيه الهلالاب ..دخل فيه المريخاب ...شرعي ..ما شرعي ...النظام الاساسي وقانون الرياضية ..وابو القوانين.
محمد الشيخ مدني ..طبعا لو في صالون وقع ساكت ...بفتي ليك فيه.
يطلع ليك النظام الاساسي للفيفا...ولوائح الاتحاد المحلي لكرة القدم في الخرطوم.
ما عارف دخل (الصالون) باللوائح دي شنو؟.
الفيلم دا نحن دخلناه.
شاهدناه بكل هذه التفاصيل.
شفناه.
الحاجات دي كلها مرت علينا.
نحن هسع قاعدين نضحك عليكم ..عشان انتوا بتكرروا في نفس الاخطاء.
عصام الحاج بقى زي (الباب) الواقف براهو ..زي الامين البرير في الهلال.
عصام الحاج بقى زي بوابة عبدالقيوم.
والمواضيع دي طبعا كلها محركها جمال الوالي.
جمال الوالي في الاول كان عاوز ناس عصام الحاج وازهري وداعة الله يستقيلوا ...يوم ان قرر المجلس صرف النظر عن تسجيل البرنس وفييرا.
عصام الحاج وازهري وداعة الله (شفوت)..فوّتوا على جمال الوالي الفرصة.
قام جمال الوالي قال احسن اهد المجلس من الجهة التانية.
جمال الوالي جاب ناسو تاني وقال ليهم قرروا تسجيل هيثم مصطفى وفييرا ..وبالطريقة دي يمكن ان يستقيل عبدالله حسن عيسي والحاج زيدان ومحمد الريح ومتوكل ..يقوم المجلس يفقد شرعيته.
شفتوا جمال الوالي مشغل ومحرك الحاجات كيف؟.
حالتو دي (مستقيل).
المضحك في الامر ..ان هناك محاولات لعودة همد وجمال الكيماوي.
همد وجمال الكيماوي ..ممكن يرجعوا تاني بعد انتهاء التسجيلات.
خلاص ايام الدفع راحت.
يا همد ...انت زولنا ..اوعي تتمقلب.. لسع في قروش طالبها النادي الكاميروني من محترف المريخ الكاميروني مكسيم ..ما تتمقلب ساكت.
عليكم الله هسع مكسيم دا اسم محترف وإلا اسبير.
انتوا الناس ديل بتجيبوهم من وين؟.
اصبر شوية يا همد ..لمن الصورة تتضح بشكل واضح.
قالوا ليك محمد الريح عضو مجلس المريخ المستقيل ..قلبو انقطع في التسجيلات.
عصام الحاج ..البظهر كل اسبوع في التلفزيون ...في التسجيلات (قرش) ما دفعو.
عصام الحاج اكتفى بالظهور (الانيق) في التلفزيون.
شفتوا كيف؟.
ناس يدفعوا ..وناس يظهروا.
هسع بعد الاستقالات ..وبعد منوال (المجلس غير شرعي)..والمفوضية تتدخل ..والوزير يرجئ التدخل في استقالات المريخ.
المسلسل التركي ..الذي شاهدناه في الهلال ..هسع بنشاهد فيه في المريخ.
ما عاوز اقول ليكم فى النهاية (البطل) بموت..زي ما حصل في الهلال!!.
ما عاوز اخرب ليكم الحلقة الاخيرة.
لكن الحاجة البقولها ليكم.
هسع يا ناس المريخ ح يعينوا ليكم (عسقلاني).
عسقلاني ..زي عسقلاني الهلال.
موش انتوا بتقلدونا ..فاكرين ...الحكاية ساكت كدا.
الموضوع فيه (عسقلانيات) يا مريخاب.
ما تفرحوا ساكت.
باقي نحن ..عشان تكونوا عارفين ... أي حاجة عندنا بي نظام.
وبعد ما يعيّنوا ليكم (عسقلاني) ...العسقلاني بتاع المريخ ح يطلع ..ويتكلم ليكم كلام سمح.
في الكلام ما بتلفت.
العسقلاني حقكم يا مريخاب ح يقول ليكم ..ح نعمل توأمة مع ريال مدريد ..وح نطبق نفس النظام.
اصلو الناس البتجيبهم المفوضية ..وتعينهم ..بكونوا بي نفس الملامح.
وح يقعد يتكلم ليكم عن الاحتراف ..والنظام العالمي الجديد.
ما تشتغلوا بالكلام دا.
نحن (العسقلاني) العينوه في الهلال طلع بتاع كلام وشو... ساكت.
عشان كدا ..ما تضيعوا وقتكم ساكت.
الحاجات دي حافظنها حفظ.
بمناسبة الاستقالات دي....في واحد قال لي ناس اهلي شندي ديل عاوزين (فييرا)...عشان يستقيلوا اعضاء من مجلس الاهلي شندي.
قلت ليه لكن لو فييرا مشي الاهلي شندي ح يستقيلوا ثلاثة فقط من مجلس اهلي شندي ...والمجلس ما بفقد شرعيته.
الموضوع دا إلا تجيبوا ليه (البرنس)...لو عاوزين مجلس الاهلي شندي يفقد الشرعية.
انتوا فاكرين فقد الشرعية ...موضوع ساهل.
الموضوع دا ..ما لعب ...الموضوع دا فيه مفوضية ولجنة الاستئانفات.
الموضوع دا ما بقدر ليه إلا هيثم مصطفى.
تاني.
والله هيثم مصطفى دا لو دخل مجلس الوزراء ..بريحنا ليك من نص الوزراء ديل.
ومجلس الوزراء ذاتو ببقى غير شرعي.
استفيدوا من الحتة دي.
وما تقعدوا تصنقعوا لينا ساكت وتعليقايتكم كلها تبقى في (البرد).
في السودان ..ما تسمعوا الكلام دا ...ما في (برد) بكتل ليه زول.
ملحوظة : وإلا في زول عندو كلام تاني.
هوامش
دموع سادومبا ...هي الاخرى تثبت ما يرتكبه الامين البرير في الهلال.
محترف يبكي ..وجماهير معتصمة ..وتسجيلات مهددة بالانهيار.
اقل حاجة هو ان يخرج سادومبا بصورة جميلة ..وبعد ان يستلم حقوقه كاملة ..ليعطي انطباع جميل عن الهلال.
سادومبا ...يجب ان تكرمه روابط الهلال وان تودعه وداعا يليق بهذا النجم الخلوق ..والذي قدم مواسم اكثر من رائعة مع الهلال وكان هدافا للابطال وهدافا للكونفدرالية.
نتمنى ان يتكرر سادومبا الف مرة في الهلال.
الحمدلله ان قطب الهلال الكاردينال ..قام بالواجب ..ومنح سادومبا حقوقه كاملة.
لا نرحب ان يخرج احد من الهلال بأسي او وجع ...حتى الخارجين الي المريخ.
دموع سادومبا ..اثبتت ان الهلال جميل ..ورائع ..وان جماهير الهلال قادرة على ان تمنح الالفة ..والانس.
يختلف الهلال عن كل الاندية في العالم ..بجماهيره الرائعة.
في كل الظروف ....لا اخشى على الهلال في ظل هذه الجماهير الوفية والمخلصة والواعية.
رهاننا دائما وابدا على الجماهير.
تسجيلات الهلال باذن الله وتوفيقه سوف تكتمل.
ولكن الوقوع في مثل هذه الاخطاء ...امر غير مقبول ...كما ان الجماهير لم تعد تستحمل مثل التهور.
سيدي بيه اهلو لقبوه (الساحر)...وان شاءالله سوف يكون هذا المحترف اضافة حقيقية للهلال.
لا نخاف على الهلال إلا من مجلس الادارة.
السنة دي في المريخ ح نفقد (وارغو).
غايتو الحاجة العملها وارغو... عبدالجبار الما بعرف يلعب كورة ما عملها.
عبدالجبار دا جنسو شنو كمان ..وعمل شنو؟.
ناس الهلال ديل الي الان ما اتحركوا ..وما عرفنا برنامجهم الاعدادي.
ناس المريخ برنامجهم طلع ...وحتى المباريات الودية عرفوها.
ناس خالد بخيت ديل ...ما يتحركوا.
اعملوا ليكم همة شوية.
الموسم الفات عملتوا لينا الموسم كلو مشاكل مع هيثم مصطفى ...اها الموسم دا ما عندكم أي عذر.
الاضافات الجديدة لكشف الهلال تحتاج لمعسكرات طويلة حتى يتم التجانس والتآلف بين المجموعة ككل.
من الاشياء الجميلة ...والتى لم يضع لها حساب ...هي عودة محمد احمد بشة لكشوفات الهلال.
بشة ان شاءالله سوف يكون اضافة كبيرة لوسط الهلال.
دفاع الهلال طبعا بقى ما فيه أي مشكلة.
بس غارزيتو دا مفروض يرجع بدري ...ويشوف شغلو.
بالمناسبة ..خايف غارزيتو يرجع ما يلقي هيثم مصطفى ..يقوم يعمل ليه مشكلة من البواب.
الزول دا ما بقعد من غير مشاكل.
وخايف كمان وقت يعرف انو هيثم مصطفى مشى المريخ ..يقوم يشاكل الحلة كلها.
شد حيلك ساكت يا غارزيتو.
السنة الفاتت مبارياتك كلها كانت ضد هيثم مصطفى.
هسع هيثم مصطفى بقى ضدك بالجد ...جد.
لو حصل أي تعطيل او خلل ادي لعدم اكتمال تسجيل أي محترف من محترفي الهلال ..يمكن ان تحدث كارثة.
يمكن ذلك ان ينسف الموسم بحاله.
جماهير الهلال ..ما بتحتمل أي خطأ تاني.
لا من المجلس ...لا من الاتحاد العام لكرة القدم السوداني.
ما عاوزين أي لخبطة.
الجماهير معتصمة.
انت يا مجدي شمس الدين ما عارف الكلام دا.
ما تقعد تصرح فينا ساكت.
لموا تصريحاتكم عليكم.
يعني انتوا الا يجبوا ليكم (ليما).
بالمناسبة ...الاحداث الاخيرة ..نستنا نودع ليما ...(تقول سايق ليه عربية باسطة).
نفسي استوعب ..بلة جابر وموسي الزومة ح يلعبوا مع هيثم مصطفى كيف؟.
المعادلة دي (رياضيا) ما بتجي.
هيثم دا في المريخ ..لبسوه شعار براهو ...عشان ما تخربوا ليه كورتو.
بلة جابر الي الان ما استوعب حكاية تسجيل هيثم مصطفى في المريخ ...عاوزنو يستوعب تمريراته.
يا بلة دي فرصتك ..السنتين دي ممكن تقرأ فيها طب.
سلك ذاتو قالوا الايامات دي بضرب في (الباسطة) ويكتب.
زمان كان مكتول بـ (فتة العدس).
ومعاوية الجاك ..قالوا غيّر تلفونو.
والله (الخلعة) ما سمحة بعد العمر دا.
زمان كنا بنقول ليكم الفرق كبير بين هيثم مصطفى وفيصل العجب..انتوا كنتوا بتقعدوا تغالطوا.
مزمل ابوالقاسم عمل حوار مع هيثم مصطفى بعد 24 ساعة اربع صفحات.
العجب المسكين ...عملوا معاه حوار (330) كلمة بي التلفون ايام كان في المخبأ السري.
والعجب ذاتو الوقت داك لو ما كان عاوزو الهلال ...ما كان في زول اشتغل بيه.
قالوا ليك ..هيثم مصطفى في المريخ ...بضع برنامج الزيارة لعبدالله حسن عيسي ..ولنادي المريخ ..ومتوكل.
هو البحدد البرنامج.
وبعتذر كمان على كيفو.
انتوا وين ضفر؟.
اقطع (ضراعي)..ان كان ضفر فاهم حاجة.
عاجل : كورتكم يا ناس المريخ بقت زي الزول البياكل (العصيدة) بالشوكة والسكين.
Share this article :

إرسال تعليق

 
Support : Creating Website | Johny Template | Mas Template
copyright © 2011. مدونة تلفزيون الهلال السوداني - All Rights Reserved
Template Created by Creating Website Published by Mas Template
Proudly powered by Blogger